الجزء التاني
_يا انسة …اصحي اذا بتريدي
فتحت عيوني هو و عم يصحيني و يرش على وجهي مي
سالي:شو صار؟
قام وقف ،ضبيت تيابي على بعض انا و متلبكة
_كيف صرتي احسن،قادرة توقفي
سالي:ايه ايه
مد ايدو ،حطيت ايدي بايدو و شدني لقمت و انا عم اطلع حولي
سالي: …شكرا الك كتير
_هيدي سيارتك شكلا ؟
سالي:ايه
_كيف بدنا نطالعا من هون ،شغلتا عويصة شوي،طيب ماشي الا ما نلاقيلا حلا ،هلأ انت بتطلعي معي بسيارتي بوصلك على البيت و برجع انا و شي حدا منطلعا من هون و منوديا على التصليح
سالي:عفوا !
_اه نسيت عرفك عن حاالي …انا عماد الصديق
سالي:اه انت عماد
عماد:ايه انا هو
سالي:غريب
عماد:شو الغريب فيني؟
سالي:يعني قصدي توقعت عماد يكون شخص عمرو بال 60 سنة بما انو كان صديق ابي …
عماد:ايه صح معك حق ،تفضلي معي
سالي:اي يلا …
مشي قدامي بدون ما يعطيني اي تبرير لفارق العمر ،طلعنا على الشارع الرئيسي
سالي: ….اه لحظة نسيت اغراضي بالسيارة
حطيت ايدي على تمي و بلعت ضحكتي ،شو صرلي ما االي شايفتو غير ربع ساعة و ضيعت عقلي ،حطيت ايدي على وجهي ،كان سخن كتير ،رجعنا نزلنا لتحت على الوادي ،فتح الباكاج و طلع الشنتا
عماد:فيه غير هالشنتة بدك تاخديا معك ؟
سالي:ايه …لا …في موبايلي لسا …يلا انا بجيبو
طلعت بسيارتو انا و ساكتة ،بعد تلت ساعة ،صفا قدام بيت من طابقين بس كان عمار قديم ،نزل قبلي و حمل الشنتا
عماد:تفضلي
استقبلتني اختو لعماد يلي كان اسما سحر،صبية عمرا تقريبا 30 سنة ،عيون بني و شعر خرنوبي ما كانت بتشبه عماد ابدا ،اول ما شافتني دققت بمظهري كتير ،كانو تيابو وسخين و مشرطين
سحر:شو صاير معك على الطريق ؟
قبل ما انا جاوب ،جاوب عني عماد
عماد:حادث بسيط ،ثريا..تعي خدي الانسة على غرفتا يلي جهزناها مبارح
التفت لعندي
عماد:اكيد تعبانة من مشوار الطريق و بدك ترتاحي
سالي:اي كتير ؛شكرا الكن على استضافتي
عماد: اهلا و سهلا فيكي ،السيد خالد كان صديق عزيز على قلبي
اطلعت على غرفتي ،تحممت و غيرت تيابي و بعد ساعتين نزلت لتحت ،قبل ما وصل على الصالون كان عماد و سحر قاعدين عم يحكو
سحر:افرد وجهك شوي ،كلها اكام يوم و بتلتقى انشالله و منرتاح كلنا
عماد:داق خلقي من هلأ من هيك جو و هيك وضع
سالي:مسالخير
اطلعو علي و بعدين اطلعو الاتنين ببعض و كانو وجودي المفاجئ لبكن
سحر:اهلين حبيبتي سالي تفضلي ارتاحي
قربت انا و عم العب باالساعة يلي بايدي و قعدت على كنباية جنب المدخنة
سحر:يلا دقايق و الاكل بكون جاهز
قامت سحر و راحت على المطبخ و انا بقيت قاعدة و عم اطلع بالحطب يلي عم تاكلو النار و اطلع شوي بديكور البيت القديم اما عماد كان قاعد و شارد ،كأنو ما مرتاح بالقعدة
سالي:ليش رجعت من بريطانيا ؟
بعد دقيقة لانتبه علي انو كنت عم احكي معو
عماد:عفوا !ما انتبهت شو حكيتي
سالي:عم قول ليش رجعتو من بريطانيا ؟
عماد:ايه ….(اخد نفس و جلس قعدتو)انا سافرت كرمال سحر كانت تعبانة و مريضة و ما في حدا جنبا ،لتحسنت رجعت انا و اياها نستقر هون ،يعني بضل شغلنا و بلدنا هون
سالي:امممم
اجت سحر هي و عم تبتسم ابتسامة مصطنعة
سحر:يلا تفضلو على الاكل صار جاهز
قمت وقفت بسرعة و بقي عماد قاعد بمحلو ،خجلت شوي بعدين سحر اتدخلت بسرعة و اتداركت الموقف
سحر:يلا سالي …هلأ بيلحقنا عماد
رحت مع سحر و سحبت الكرسي و قعدت قبالا ،بعد دقايق قصيرة اجا عماد و قعد ياكل هو و ساكت و بكل برودة اعصاب و لا كانو في حدا قاعد معو ،كنت انا و سحر بس يلي عم ندردش و تسالني عن دراستي و تخصصي و حياتي
سحر:و هلأ بقيتي لحالك بعد وفاة ابوكي ؟
سالي:ايه بس معي ام العبد،هيدي انا ما بعتبرا مجرد شغالة ،بحسا من العيلة ،وعيت عليا من انا و صغيرة بتشتغل عنا
سحر:امممم ، و هلأ انت رح تشتغلي بمجال دراستك او بمجال شغل ابوكي؟
سالي:ما كتير بفرقو الاتنين عن بعضن بس انا بعدني لسا عم ادرس و ما عندي خبرة عملية ،و صراحة لبيت دعوتكن كرمال هالموضوع ،يعني السيد عماد كان رفيق و شريك بابا بالشغل،و انا حابة يعلمني اساسيات استفاد منا كرمال الشغل و خاصة انو الوضع سيئ كتير و بعد وفاتو بسكتة قلبية عرفت انو افلس ،بعتقد هالشي كان فوق قدرتو انو يتحملو ..
اطلع سحر بعماد و نكشتو بايدا
سحر:ايه اكيد
اطلع فيني و هز براسو
عماد:اي طبعا ،بيسعدني هالشي
خلصت اكلي و طلعت على غرفتي بعد ما تذكرت انو اتصل بام العبد كرمال طمنا عني اني وصلت ،بس ما كان فيه اي تغطية بموبايلي ،رجعت نزلت على الطابق التحتاني
سالي:سحر هلأ هون عنكن وين فيه تغطية؟
سحر:للاسف يا سالي هون ما فيه ابدا تغطية بس ممكن على الطريق العام يعطيكي شي شخطين ،ليش بمين بدك تتصلي؟
سالي:بدي اتصل بام العبد و طمنا اني وصلت لانو بتكون قلقانة علي
سحر:ماشي خليا لبكرا ،هلأ تاخر الوقت و ما فيكي تطلعي لبرا ،هون المنطقة خطرة بالليل
سالي:خطرة!شو فيا ليش؟
سحر:ذئاب و كلاب
ساالي:ايوا ،طيب ماشي تصبحو على خير
سحر:و انت من اهلو ،اذا لزمك شي قليلي ؛انا غرفتي جنب غرفتك
سالي:اوك
طلعت لفوق و انا ماسكة الموبايل و عم ارفعو لفوق لدور على الشبكة ،كان الوقت بمزرعة عماد بطيء كتير و ممل ،ندمت كتير انو جيت و خاصة انو عماد معظم وقتو ساكت و سحر حسيتا عم تحدثني لتسايرني بس ،تاني يوم العصر كان عماد عم يقطع خشب برا ،طلعت لعندو
سالي:انا كنت بدي اسالك شو صار بسيارتي
عماد:سيارتك !
سالي:ايه يلي ضربت بالعامود و قلتلي رح تجيبا انت و حدا و تبعتا عالتصليح
عماد:اه صح نسيت ؛بس يهدى الريح شوي و يتحسن الطقس انشالله
سالي:طيب
بقيت واقفة عم اتفرج عليه ،دار وجهو
عماد:في شي تاني لسا؟
تفاجأت بسؤالو و رجعت لورا انا و عم انسحب من المكان
سالي:لا ابدا
رجعت فتت على البيت انا و عم نفخ و مزعوجة لانو بلشت حس انو قعدتي معن غير مرغوب فيا ابدا و بنفس الوقت خفت كون عم اظلمن لانو هن يلي عزموني لعندن و لو ما بدن اياني ليش ليعزموني ،رحت قعدت على الكنباية و عم اتفرج على عماد من الشباك،كنت عم انعجب بشخصيتو بدون ما حس على حالي ،شفت سحر عم تصف سيارة عماد و نزلت منا و توجهت لعند عماد و وقفت تحكي معو ؛ما فهمت شو حكت معو بس يلي شفتو بعد هالحكي عماد عصب كتير و مسك الفاس يلي كان عم يقطع فيه خشب و رماه بالارض بعصبية و سرح شعرو بايدو بتوتر هو و عم يحكي ،انا قمت و رحت لاطلع و شوف شو عم يصير بيناتن
سحر:الن من مبارح عم يدورو ،فتشو البيت زاوية زاوية و ما لقوا
عماد:ارجعي خبرين و قليلن بقلكن معتصم لو بدكن تكسرو البلاط و تهدو الحيطان و تحرقو الدني بدكن تجيبوا من تحت الارض ،المهم ما بيطلعو الا و هي معن
سحر:طيب طيب بس انت هدي حالك و ما تعصب ،بدنا نلاقيا بالاخير ،يعني وين بدو يكون حطا و ما لحق يبيعا
قربت اكتر لحتى شافوني الاتنين
ساالي:خير في شي ،على شو عم بدورو اذا بقدر انا ساعدكن
اطلع فيني عماد نظرة خوفتني كتير و قبل ما يحكي ،قاطعتو سحر فورا
سحر:ولاشي حبيبتي ،شغلة صغيرة و ما مستاهلة فوتي حياتي لجوا ،هون برد كتير
رجعت فتت و قعدت جنب المدخنة و انا عم فكر بالكلام يلي سمعتو ،،حسيت الوضع غريب و في شي و ما عم اقدر افهمو حتى وجودي هون حسيتو غريب كتير؛تاني يوم الصبح فقت و فتحت الشبابيك،كان الطقس احسن من اليومين الماضين؛شفت سيارتي مصفوفة برا،لبست تيابي و نزلت فورا ،كانت مقدمتا مطعوجة،طلعت فيا و حاولت دورا و شغلا ،ما اشتغلت معي ،نزلت منا انا و مزعوجة و معصبة و ضربت الدولاب برجلي
سالي:يا الله شو جابني لهون انا ،هلأ كيف بدي ارجع ،ولله داق خلقي
رفعت نظري لفوق و شفت عماد واقف ورا الشباك و عم يطلع فيني و عم يشرب كاسة نسكافيه
سالي:انت التاني ما ابردك
فتت على البيت اخدت جاكيتي و طلعت ،تمشيت شوي بالمنطقة و انا عم دور على محل فيه شوية تغطية؛بعد عناء طويل لاجت شحطتين ،تبسمرت بمحلي و اتصلت بام العبد
سالي:كيفك ؟
ام العبد:سالي و اخير اتصلتي ،وينك انت
سالي:ما تخافي علي ،انا بمزرعة عماد و ….
ام العبد:سالي ارجعي بسرعة
سالي:ليش شو في ؟
ام العبد:عماد الصديق طلع ميت من سنة ببريطانيا ،انا ما كنت بعرف انو ميت لو ما قلتلو لمراد وقت سالني عنك و قلي انو السيد عماد توفى من سنة ببريطانيا و جابو جثمانو لهون و دفنو هون و مراد هو يلي اخد ابوكي ليحضر الدفن….
سالي:شووو…لحظة لحظة ….عماد ميت!…الو الو ..ام العبد ردي علي …وينك …الو
انا و عم احكي مع ام العبد ما شفت غير ايد انمدت و سحبت الموبايل مني ،نفض جسمي و التفتت لورا،شفت عماد بوجهي ،غمضت عيوني انا و عم ارجف
سالي:…يا امي …بسم الله بسم الله اعوذ بالله من الشيطان الرجيم ..لا منأذيكن و لا بتأذونا
