الجزء التالت:
صرت اقرأ ايات و معوذات بس بقي عماد واقف بمحلو ، قام االشريحة من الموبايل و حطا بتمو و علكا هو و عم يطلع فيني بهدوء ،رجع اعطاني الموبايل ،سحبتو منو بخوف و رجعت لورا وهو بزق الشريحة
سالي:انت انسان الا شبح ؟
ضحك ضحكة ساخرة كأنو عم يستهزأ مني
عماد:واضح شو امكانيات قدراتك العقليلة
سالي(تصرخ):ها …معناها انت مانك رفيق البابا و انت مانك عماد الصديق …عماد الصديق ميت من سنة
بقيت ملامح وجهو هادية و انا متوترة
سالي:مين انتو و ليش جبتوني لهون؟
عماد:قصة طويلة ،بس انا بوعدك ما رح نأذيكي اذا بقيتي هادية و مسالمة و مسايرة
سالي:انت واحد كذاب و محتال
فتلت ضهري و بلشت اركض انا و عم صرخ ،لحقني بشراسة ،نزلت من الطريق الفرعي و فتت بين الاراضي و الشجر ،كان بدي شوف اي بيت او اي حدا لاستنجد فيه و اتحامى فيه بس كانت المنطقة لا فيا اتصالات و لا مواصلات و لا حتى بشر ،لقطني من جاكيتي و قرب ليحملني ،ضربتو بكوع ايدي على صدرو و هربت ،كنت عم اركض انا و مقطوع نفسي و عم حس بصوت دعساتو عم يلحقني؛حتى تفشكلت و قعت على الارض،انقض فوقي متل الحيوان المفترس، كنت تعبانة و ما بقا قادرة اركض خطوة تانية
عماد:انا شو قلتلك ،كوني هادية و مسالمة …قومي يلا
قام وقف و ساعدني لقوم و مسكني من ايدي و سحبني لنطلع على الشارع الفرعي
سالي :ولله لاشتكي عليك و على اختك …
عماد:امشي انت و ساكتة
سالي:طب قلي شو بدكن مني ؟
وصلنا على سيارتو،فتح باب السيارة و طالعني هو و ماسك ايدي
عماد:ما بدي منك شي بس بدي من ابوكي
سالي:ابي ميت
عماد:بعرف انو ميت بس النا غرض عندو و بدنا اياه
سالي:شو هو ؟قلي بلكي بساعدك؟
عماد:……
رجعنا على بيت المزرعة ،نزل من السيارة هو و ماسكني و خايف اني ارجع اهرب ،شافتنا سحر
سحر:شو يلي صار؟
عماد:عرفت انو نحن لا عماد و لا عيلتو و اجت بدا تهرب لحقتا و جبتا
سالي:اتركني هيك
عماد:قفلي الابواب منيح و خلي عيونك مفتحة عليا
سحر:طيب
طلعت على غرفتي غيرت تيابي ، سمعت صوت حكي من برا ،ركضت على الشباك شفت عماد واقف مع سحر عم يحكو ،انتبه علي عماد مدتلو لساني على الاخر و رجعت برمت ضهري و تسطحت على التخت انا و عم فكر شو بدن مني و ليش انا هون ،حاولت اربط كل افكار مع بعض بس ما طلع معي شي ،رجعت وقفت على الشباك و شفت سحر و ثريا باالسيارة و عماد واقف و مرتكي على ازاز االشباك و عم يحكي معا بعدين شغلت السيارة و راحت ،وقف حاطط ايديه بجيبو و عم يطلع عليا حتى غابت عن نظرو ،فتل وجهو لعندي اطلع فيني هو و عم ينفخ و فات على البيت ،فتحت باب غرفتي و نزلت انا و عم اعلك علكة و نفخ بوالين ،كان مقرفص قدام المدخنة و عم يزت فيا حطب ،انتبه على وجودي و بقي هادي ،رحت قعدت على الكنباية
سالي:انت ما اسمك عماد …اسمك معتصم مو هيك
عماد:……
سالي:سحر وين راحت ؟
عماد:……
سالي:طيب قلي شو هالشي يلي عم دورو عليه و بوعدكن ساعدكن؟
عماد:…..
بقي ساكت و ما رد علي بشي غير انو عم يحرك بالحطب،سكتت و بقيت عم اعلك بالعلكة و هز برجلي ،قعد على الكنباية و تابع شرودو ،كل ما طق العلكة بصوت عالي يطلع فيني و يرجع يبعد بنظرو ، حتى نفخت بالون كبير و طقت العلكة بصوت عالي ،ما شفتو غير قام من محلو بسرعة البرق و صار عندي ،مسكني من وجهي
عماد:ابزقيا او ابلعيا
سالي:ما بقدر لا ابزقا و لا ابلعا ،انا بس اتوتر بعلك علكة
عماد:و انا صوت العلكة بينرفزني
سالي:طيب خلص بعلكا بهدوء
ركز بعيوني و بعدين بشفايفي بعدين ارتخت ايدو و رجع قعد محلو و شغل سيجارة ،و انا تابعت علك على الصامت ،عتمت الدنيا و ما رجعت سحر و انا و عماد بقينا قاعدين نفس القعدة كل واحد فينا سارح بعقلو ،قمت وقفت فجأة
سالي:انا جعت و بدي اكل
عماد:ليكو المطبخ جنبك
فتت على المطبخ لفيت سندويشات و عملت شاي ،رجعت على الصالون و حطيت قدامو صحن فيه سندويشتين و كاسة شاي
عماد:انا ما جوعان
رحت قعدت بمحلي و بلشت اكل
سالي:كان يقلي البابا ما تصدقي اول انطباع بتاخديه عن الشخص ،لازم تعاشريه حتى تعرفيه شو هو ،كل الناس مغطاية بقشور و انا وقت التقيت فيك اول مرة حسيتك كانك جاي من كوكب تاني
رفع حواجبو و اطلع فيني
سالي:ايه عنجد عم احكي ،حسيتك متل….متل ….حسيتك بطل ….كيف مسكت الشابين و ضربتن بايدك هيك ،انو لسا في رجال متل هيك
عماد:شو يعني متل هيك؟
سالي:يعني سوبرمان
ابتسم و نزل راسو
عماد:سوبرمان!
مد ايدو و اخد اول سندويشة
سالي:بتعرف انو البنت اول ما تكبر و توعى ما بتشوف ابطال بالدنيا كلها غير ابوا و انا ما كنت اتخيل ابدا بحياتي انو اطلع على حدا تاني متل ما بطلع على ابي بس بعدين …..
عماد:ايه؟
سالي:بعدين خربت كل شي ،يعني فكرتك عملت هيك شي اخلاق منك بس طلع شي تاني و ما طلعت كتير بتفرق عن الكلاب يلي هجمو علي بالطريق
عماد:حتى لو ما كنت بعرفك ،كنت رح اتصرف نفس الشي
سالي:شو هالتناقض،كيف فيك تكون خير و شر بنفس الوقت؟
عماد:كل البشر هيك ،ما في انسان منيح بالمطلق ،كلنا رمادين بس عندك الرمادي الغامق يلي بكون فيه الشر طاغي اكتر من الخير و الرمادي الفاتح يلي …
سالي:الخير طاغي فيه على الشر و انت الرمادي الفاتح اكيد!!!
عماد:ما بعرف …يمكن
سالي:انا ابيض
زم شفايفو كانو ما عجبو كلامي
عماد:ما في حدا ابيض
سالي:طب جرب و شوف انو انا ابيض
عماد:طيب … لنفرض انو انطلب منك تقتلي حدا كرمال تنقذي حدا من عيلتك شو بتعملي؟
سالي:شو هالسؤال؟
عماد:شفتي كيف ما فيكي تكون ابيض بكل الاحوال ،ما حدا بيقرر شو بدو يكون ،الظروف هي يلي بتشكل الانسان ..
ساالي:يعني انت بدك تقتلني لتنقذ حدا من عيلتك؟
حط كاسة الشاي و بلع اللقمة
عماد:لااا ما رح اقتلك و لو بدي اقتلك كنت قتلتك من اول ما جيتي لهون و خاصة انو ما هضمتك من اول ما شفتك ،انسانة مستهترة و اندفاعية و ساذجة
سالي:انا؟
عماد:ايه
سالي:ليش؟
عماد:لبيتي الدعوة بسرعة و جيتي لحالك طريق طويل و بعيد بدون ما يكون معك حدا و حتى بدون ما يكون معك وسيلة دفاع عن نفسك بحال اتعرضتي لذات الموقف يلي تعرضتيلو . …
سالي:لا هيدا ما تهور ،هيدي ثقة بالنفس
عماد:الثقة الزايدة عواقبا وخيمة
سالي:فعلا و انا ندمت كتير ليش جيت لهون و حسيت من اول يوم انو ما مرغوب فيني هون
سكتت و اطلعت على لساعة
سالي:تاخر الوقت وين سحر لهلأ؟
عماد:ما رح ترجع
سالي:امممم هلأ سحر اختك الا مرتك؟
عماد:شو بيهمك الموضوع
سالي(بتسرع)بهمني كتير
اطلع فيني كانو حكيت شي ما مزبوط ،عبق وجهي و تابعت حكي
سالي:يعني بهمني اعرف ….حتى اعرف…يعني كيف انا بدي اتعامل معك
ابتسم ابتسامة اقرب لضحكة مكبوتة
عماد:كيف يعني تتعاملي معي !يعني مثلا اذا قلتلك سحر اختي كيف بدك تتصرفي معي مثلا….ايه ….احكي ….شبك ساكتة
قمت بسرعة من محلي و حملت الصحن يلي قدامو و كاسة الشاي و بدي روح فين على المطبخ
عماد:بس انا لسا خلصت
تركتن من ايدي انا و عم اطلع فيه
عماد:قصدي ما خلصت حكي حتى تقومي و تروحي ،بدك تفتحي موضوع و تناقشي كمليه للاخر ايه
رجعت قعدت محلي و حطيت العلكة بتمي و هزيت برجلي ،اطلع فيني نظرة سريعة و تابع اكل
عماد:شكلو كلامي وترك مو هيك
سالي: لا ابدا انت شكلك فهمتني غلط
عماد:طب فهميني صح
بقي عم يطلع فيني و ناطرني لاحكي و اشرح الحكي يلي خبصتو و انا كل اعصابي مشدودة
سالي:انا ما بحب قلل بقيمة رجال قدام مرتو …هيك كان قصدي
عماد:ايوا فعلا جواب مققنع
سالي:ايه …طيب…ماشي ..انا بدي قوم نام …تصبح على خير
مشيت انا و عم اطلع عليه و هو صافن بالحيط قدامو ،تاني يوم الصبح نزلت انا و عم اتلفت حولي ،ما كان في صوت لحدا ،فتحت الباب و جيت لاطلع ضربت فيه ،رجعت لورا انا و حاطة ايدي على قلبي
سالي:رعبتني
عماد:وين رايحة؟
سالي:شم شوية هوا
عماد:ايه فوتي لجوا
فات و سكر الباب و برم ضهرو قفلو و فات و انا بقيت واقفة بمحلي
سالي:يعني لايمت انا بدي ضل محبوسة هون؟
عماد:…..
سااي:عم احكي معك جاوب ،عيب انو حدا يكون عم يحكيك و انت تبقى ساكت هيك ،سكوتك بيقتل …..اوووف ….طب شو صار بسيارتي ما صلحتا
عماد:….
سالي:طيب ماشي …خليك ساكت و انا هلأ بدي اطلع من هون…و هلأ هلأ
بقي ساكت و لا كانو حدا واقف عم يحكي معو ،اطلعت على الغرفة انا و معصبة على الاخر ،فتحت الشباك و مديت راسي انا و عم قيس المسافة بين الشباك و الارض ،كان نسبة 50 بالمية انو اذا زتيت حالي تنسكر رجلي ،بس ما كان عندي حل تاني،زتيت المخدات تحت الشباك مباشرة و بعدين جبت كرسي و طلعت حالي من الشباك انا و عم اطلع لتحت و عاين المطرح يلي بدي اوقع عليه ،قبل ما نط سمعت صوت باب البيت الخارجي عم ينفتح ،طلع عماد هو و عم يلحق الصوت ،حتى شاف كل جسمي برا معلقة ايدي بمجاري الشباك و ساندة رجلي على الحفة ،ركض لتحت الشباك
عماد:مجنونة …مجنونة ….اوعى تزتي حالك بتنكسري و بنبلى فيكي
سالي:قلتلك بدي اطلع من هون هلأ ،و قوم بعد من تحت احسن ما انزل عليك و انت يلي تنكسر
عماد:ما رح بعد قبل ما ترجعي تفوتي لجوا
سالي:ما رح فوت …بعد من هون
عماد:ياللله …شو هاالبلوة هاي ….طب فوتي و خلينا نتفاهم
ساالي:انا ما بدي اتفاهم مع واحد بحكي معو و بسالو و بضل ساكت كانو قاعدة مع حيط،بدي اعرف اولا ليش انا هون
عماد:طيب فوتي و بخبرك
سالي:لا هلأ بدك تقلي
عماد:قلت فوتي جوا و بخبرك
سالي:انا عنيدة و ما رح فوت
عماد:و انا اعند و قلت فوتي لجوا و بخبرك
شافني ما اتيت باي حركة ، بعد من تحت الشباك
عماد:يلا زتي حالك بس عم قلك اذا انكسرتي ما تفكري انو رح اركض فيكي و اسعفك اصلا هون ما في لا دكتور و لا مشفى ،انا يلي علي عملتو يلا زتي حالك
سكتت شوي
سالي:طيب رح فوت
ضل واقف عماد تحت عم يتفرج علي و انا حطيت ايدي و جيت لارفع جسمي حتى فوت بس فلتو رجلي و صارو معلقين بالهوا
سالي(تصرخ):رح اوقع رح اوقع
عماد:ضلك ماسكة منيح لبين ما اوصل لعندك
سالي:بسسسرعة
فات عماد لجوا و انا ماسكين ايدي بالشباك وصل لعندي مسكني من ايدي
عماد:امسكي برقبتي منيح
كان قلبي عم يدق كتير ما بس من خوفي من انو اوقع لانو كنت متأكدة انو ما رح اوقع لانو واثقة فيه ،بس كنت كل ما قرب منو لعماد و شم ريحة عطرو و اطلع بعيونو حس قلبي رح يوقف و رح غيب عن الوعي ،رفعني و هو ماسكني من خصري و سحبني لجوا ،وقعنا على الارض و انا فوقو ،جيت لقوم بسرعة بس التقت عيوني بعيونو و نسيت حالي و انا عم اطلع فيه كان بعيونو في جاذبية كتير سود مكحلين و رموش طويلة و نظرات قوية ، لوبقيت اكتر من دقيقة كان رح يغمى علي بس وقعت العلكة من تمي على وجهو ،غمض عيونو باشمئزاز ،مسك العلكة و رجع حطا بتمي
عماد:حنكك ما بيتعب ،ريحيه شوي
سالي:….
عماد:شكلك مطولة هيك
سالي:…..
.قمت بسرعة انا و عم سرح شعري بتوتر و نفض تيابي
قام عن الارض
عماد:ما بقا تعيدي هالتصرف ماشي
قرب على الشباك و سكرو و انا كنت عم احكي مع حالي
سالي:شحلو !يما الحب يما
عماد:اجت سحر
نزل بسرعة لتحت و انا لحقتو فورا متل المخدرة و المسيرة
عماد:شو صار معك؟
سحر:معتصم بسرعة اطلع من هون ،رجال سيراج كانو عم يلحقوني حتى يوصلولك و بصعوبة لضيعتن بالطريق بس بجوز باي لحظة يوصلو
هي و سحر عم تحكي؛سمعنا صوت سيارات عم تشحط ،ركضت سحر على الشباك
سحر:ليكن …اطلع من الشباك و انزل بين الشجر و لاقيلك شي مخبئ لبين ما يروحو
…..
الجزء الرابع:
معتصم:ما رايح محل ،و ما انا يلي بهرب و بتخبى متل الفيران
فاتو 5 رجال على البيت كانو فايتين مداهمة ،بقي معتصم واقف بمحلو
معتصم:اهلين بالشباب الطيبة
رد واحد منن كانو هو رئيسن
_اهلين فيك ،شو صار معك؟
معتصم:ما صار شي بعدين لسا المهلة ما خلصت و باقي يومين
_اي بعرف بس حبينا نعملك زيارة كرمال نذكرك بس مو اكتر
معتصم:ما نسيت و بعدني عم اشتغل على الموضوع و قلو لمعلمك معتصم بحياتو ما خيس معك ،بس يلي صار هالمرة شي فوق ارداتي و ارادتو و بعدني على كلمتي ،يومين و القطعة او المبلغ بكون صار عنكن
_ايه بس المعلم بقلك انو بدو القطعة و ما عاد بدو يبيعا
معتصم:طيب ،منجبلو القطعة
_و بقلك كمان انو ما تفكر تهرب او تتخبى لانو بجيبك من سابع ارض وين ما كنت
معتصم:ليش في بالعادة اهرب و اتخبى
_لكن ليش قاعد هون بهالمنطقة المقطوعة و هالبيت القديم بعلمي معتصم متل الطير الحر ما بهدي بعش
معتصم:ايه و انا هيك بس هيدا جزء من شغلي و انا ادرى فيه و انتو شو بدكن غير انو تاخدو هالقطعة و تفرقوني بريحة طيبة
_ايه صح
انتبه الشاب علي هو و عم يحكي مع معتصم ،اشرلو براسو علي
_مين هاي؟
معتصم:بظن ما دخلك
_طيب بس وضعكن مشبوه
معتصم:ايمن خليك بحالك و ما تغلط معي ماشي و خود رجالك و روح من هون و شي يومين انا بجي لعنكن
_طيب كل حال اذا ما جيت انت ،نحن رح نرجع نجي و نجيب ضيافة المعلم معنا و انت بتعرف المعلم اديش كريم و بيهتم بحسن الضيافة
معتصم:فهمت
طلع الشاب من البيت هو و عم يطلع فيني نظرات غريبة،وقف معتصم على الشباك هو و عم يراقبن حتى راحو ،التفت لعند سحر
معتصم:شو صار معك و الا قلك ما تحكي مبين من وجهك
اشرتلو سحر بعيونا علي
معتصم:انت اطلعي لفوق على غرفتك
سالي:طيب
اطلعت على غرفتي بس ما فتت طبقت الباب بصوت عالي لاوهمن انو انا فتت و رجعت على روس اصابعي و وقفت على راس الدرج لاتسمع علين
سحر:انا برايي تسالا،بجوز بتعرف
معتصم:هاي بدا تعرف !،بتحسيا بلهاء بضلا فاتحة تما هيك او بتكون عم تعلك،مستفزة
سالي(بصوت منخفض):بلهاء !انا بلهاء ،معقول هيك عم يشوفني بس شو يعني بلهاء؟
معتصم: و حتى لو بدي اسالا ،شو بقلا ؟،ولله عم ندور على قطعة حقا ملايين و هي عندك اعطينا اياها ،هيك بكون عم فتحلا عيونا و اذا كانت القطعة هي مخبيتا رح تنكر و تبطل تعطينا اياها ،سعرا ما قليل ابدا
سحر:طب معقول خالد يكون باعا؟
معتصم:لا لانو قبل ما يموت بساعة كنت عم حكيه و قلي لساتا معي و ما لقتلا زبون دفيع
سحر:طب شو الحل لكن؟الوقت عم يمضى بسرعة و حياتك على كف عفريت يا معتصم ،انا خايفة عليك كتير
سكتو الاتنين سوا و ما عاد عرفت شو عم يصير تحت ،بس قررت انزل و شوف ،نزلت بهدوء انا و موطية جسمي؛شفت سحر حاطة ايدا على وجه معتصم و عم تطلع فيه و عم تقرب عليه شوي شوي و بدا تبوسو هاللعينة ،ما قدرت ابقى واقفة عم اتفرج هيك و كبست علين ،اول ما سمعو صوتي ، جفل معتصم و رجع لورا
معتصم:انت شو عم تعملي هون؟
سالي:انا كان بدي بس …..موبايلي …نسيتو هون
قربت على الطاولة و عملت حالي عم دور عليه
معتصم:شو ما بين معك؟
سالي:لا بس بتذكر اني انا حطيتو هون ….طيب رح دور عليه مرة تانية فوق بغرفتي
رجعت طلعت لفوق انا و بالعة ضحكتي على شكلا لسحر يلي انزعجت كتير مني انو خربتلا الجو عليا،تسطحت على التخت انا و عم برم خصل شعري بايدي و حاول اربط خيوط هالقضية ،كان بدي اعرف بس شو هي القطعة يلي سعرا غالي و الكل مستنفر و بدو اياها ،و انا عم فكر انفتح الباب فجاة و فاتو معتصم و سحر لعندي ،بقيت هادية و متسطحة ،سحب معتصم كرسي و قعد قبالي و بقيت سحر واقفة جنبو
معتصم:قومي جلسي قعدتك بدنا نحكي كلمتين
جلست قعدتي و انا عم زم شفايفي و اعلك العلكة
سالي:تفضل عم اسمعك
معتصم:اسمعي منيح انا شو بدي قلك و ركزي معي …انا رح قلك ليش انت هون و شو بدي منك
سالي:و اخيرا رح تبقا للبحصة
معتصم:ايه…. نحن منشتغل بتهريب الماس
سالي:تهريب يعني شي غير قانوني و بتتحاسبو ..
معتصم:ابوكي كان مبلش يشتغل معنا بس ما كمل و نحسنا
سالي:ابي انا
معتصم:..المهم انا اعطيتو لابوكي قبل ما يموت بيوم قطعة الماس صغيرة لون بينك حقا بال 30 مليون دولار
سالي :30 مليون دولار؟؟؟؟؟؟
معتصم:ايه و كان على اساس هو يشتريا بعدين صار بدو لزبون عندو و يعطيني حقا و عمولتي بس ابوكي مات بسكتة قلبية قبل ما شوف فرنك منو ،و توقعت يكون حاطا ببيتو او سيارتو او محل شغلو لهيك جبتك لهون كرمال ابعت رجالي يدورو عليا
سالي:ايوااا ،طب مين هيدا سيراج ؟
معتصم:هو صاحب القطعة و انا اخدتا منو كوسيط لبيعا لابوكي و اخد نسبة الي و اعطيه الباقي و انا ما اخدت حقا حتى اعطيه لهيك مهلني 5 ايام حتى رجعا
سالي:طيب انا شو دخلني بكل هالقصة ،دورتو عليا و ما لقيتوا
معتصم:صح معناها في حدا تاني اخدا …
سالي:و يلي هو؟
معتصم:ما في غيرك
سالي:ههههههه انا ،كيف بدي اخدا و انا ما بعرف بوجودا اصلا
معتصم:ما تغشمي حالك ،انا متأكد انو هي معك و انت مخبيتيا ،فتحي عينك منيح هالقطعة بكفة و حياتك بكفة تانية
سالي:و اذا قلتلك ما بعرف انت عن شو عم تحكي و لو معي كنت اعطيتك اياها هلأ ،يعني شايفني مبسوطة بالسجن عندك
تابعت علك علكة و انا عم برم خصل شعري و اطلع بسحر يلي كانت واقفة و عم تهز رجلا ،قاوم وقف معتصم
معتصم:طيب …ماشي …بس انت رح تبقي هون و ما رح تطلعي من هالبيت قبل ما تقليلي وين الماسة
سالي:جد ما بعرف وينا
سحر:بس عيونك عم تقول غير هيك
ساالي:ليش حضرتك بتعرفي تقراي لغة العيون ،شو شايفة بعيوني لسا
اطلعت بمعتصم و ابتسمت
سحر:مشي معتصم و خليا هون مزروبة ،مصيرا بالاخير تقر و تعترف
نزلو الاتنين من غرفتي و انا قمت و فتحت الشنتا فورا ،دورت على كيس الاكسسوارات يلي حطتلي اياه ام العبد ؛فتحتو و طالعت الخاتم
سالي:هيدا انت يلي قايمة الدنيا عليك
لبستو و رفعت ايدي
سالي:30 مليون دولار مع انك ما بتعبي العين
رجعت شلحتو بسرعة و خبيتو بجيبة بجامة و رجعت طويتا بسفل الشنتا و رجعت تسطحت انا و عم فكر ،معتصم واضح انو صادق كلامو بس انا اذا اعطيتو الخاتم رح ارجع على البيت ا و ما بقا رح ارجع شوفو بحياتي و هو عجبني كتير و طيرلي عقلي و انا ابتليت و انفتنت فيه ،بعد ساعة من التفكير قررت ابقى على موقفي انو ما بعرف شي عن الماسة و رح العب باعصابو ليومين ،ابتسمت ابتسامة خباثة ،قمت غيرت تيابي و لبست بجامة اللولو كاتي و نزلت لتحت ،كانو سحر و معتصم قاعدين جنب بعض و عم يحكو ليلاقو حل ،اطلع فيني معتصم من تحت لفوق و دار وجهو ،فتت على المطبخ فتحت البراد و حشرت راسي جواتو و طلعت بتفاحة على وشك انو تخرب و قنينة مي و طلعت وقفت على باب المطبخ انا و عم اكلا و معتصم و سحر عم يتهامسو
سالي:على فكرة البراد فاضي ،انتو ما بتجوعو يعني ،عايشين على الطاقة الشمسية و هاي ان وجدت بهالبقعة من الكوكب
فتت بمياعة انا و عم اتمايل و قعدت على الكنباية و مديت رجلي على طاولة قبالي ،اطلع فيني معتصم نظرة غضب و عض على شفايفو
معتصم:طيب روحي انت هلأ و شوفي شو بدك تجيبي للبيت بس ما تكتري لانو شغلة يومين و منخلص من هالقصة
قامت سحر و اخدت مفتاح السيارة و طلعت و بقيت انا و معتصم يلي قعد على الكنباية يلمع سلاحو و يطلع فيني ليرهبني ،بعد ما خلصت اكل التفاحة زتيتا على سلة الزبالة من بعيد بس ما اجت بالسلة وقعت على الارض
سالي:اوووبس …ما بعرف حدد الهدف و صيب منيح
معتصم :بس انا بعرف كتير حدد الهدف و صيب من اول رصاصة
سالي:ما في شك لانو هاي شغلتك
قربت شعري على وجهي و صرت مشطو بايدي و افتح تمي و نفخ الخصل ليطيرو عن وجهي ،بعدين صرت نفخ بوالين بالعلكة
سالي:هلأ انت بدك تقتلني بهالمسدس؟
معتصم:ايه
سالي:وين بدك تضرب الرصاصة ؟براسي الا بقلبي؟
معتصم:لوقتا ما منختلف عن المكان
سالي: انا بفضل تكون براسي
معتصم:….امم
سالي:ما سالتني ليش….انا رح قلك ليش …لانو ما عندي قلب
معتصم:ما عندك قلب …. يعني عندك تشوه خلقي كمان بقلبك
سالي:لاااااا …قصدي كان عندي و بعدين اعطيتو لحدا …يعني انا ما اعطيتو …هو اخدو لحالو
هز براسو و عيونو مركزين بسلاحو ما اهتم ولا لكلمة قلتلو اياها ،قهرني كتير ببرودة اعصابو و انا من جوا كنت عم اغلي
سالي:انا عرفت انو سحر ما بتكون اختك و بتكون حبيبتك
معتصم:ايه و كيف عرفتي هالشي؟
سالي:لانو شفتك عم تتوددلا و تلاطفا
رفع راسو و اطلع فيني هو و مكشر
معتصم:شو عم اعمل ؟
سالي:عم شئسمو ..
معتصم:بدي اسالك سؤال
سالي(مبتسمة): تفضل
معتصم: .انت بتعرفي كيف بجيبو اولاد؟
احمر وجهي و تلبكت و بلعت ريقي
سالي:طبعا بعرف اصلا ما في حدا ما بيعرف
معتصم:معناها انت عم تفهمي شو عم تحكي
سالي:اي اكيد انا فهمانة و كتير كمان
معتصم:هههههههههه ولله ما واضح انك بتفهمي شي يا عمو
صار يضحك علي و يهزو اكتافو هو و عم يضحك ،اطلعت عليه من تحت لفوق و عبست
سالي:شو هاي عمو ؟شو شايفني بنت صغيرة قدامك و ما معبية عينك
قمت وقفت انا و عم شد حالي
معتصم:شبك شادة حالك و عم تمطي حالك لفوق من غير شي غرقانة بهالبجامة يلي مطروشة بالقطط
استفزني كتير و طلعت فورا على الغرفة ،فتحت الشنتا و نكشت فيا انا و عم ادعي انو تكون ام العبد حاطتلي شي فستان اظهر فيه انوثتي
،بالاخير طلع بايدي فستان ابيض ديق قصير ساتان و فيه شوية دانتيل على اكتافو ،لبستو بدون ما اتردد ولبست عليه سكربينا عالية و سرحت شعري و حطيت روج ازهري و كحلة سودا و نزلت انا و عم طق بكعب الكندرة قبل ما اوصل لتحت شفتو عم يطلع على مصدر الصوت و اول ماشافني اطلع علي من فوق لتحت بعدين انفجر بالضحك رجع استفزني بضحكتو كتير ؛قربت لعندو و انا حاطة ايدي على خاصرتي
سالي:فيني اعرف ليش عم تضحك؟
معتصم:ههههههههههه مجنونة شو عم يصير معك ،انا قلت اطلعتي تنطمزي بغرفتك و ارتاح راسي شوي من حكيك،بس رجعتي و مغيرة اللوك كلو ،يعني بدك تفهميني انك كبيرة
ساالي:ايه و انشالله تكون هلأ شفت بعينك
معتصم:هههههههههه شفت شفت ،شفت طفلة صغيرة لابسة تياب اختا الكبيرة مدري اما و عم طقطق بالكعب و رح تتفشكل فيه و ما عارفة تمشي فيه
سالي:فظيع انت ….بتموت ….متجعرف
معتصم:اسما متعجرف
سالي.انا ما عندي لا اخت و لا ام ….و هدول تيابي ولله تيابي
معتصم:طيب خلص صدقتك روحي اشلحين
رجع ركز نظرو بسلاحو و شغل سيجارة ،رجعت خطوتين و رحت قعدت بمحلي ،اطلع فيني نظرة سريعة و رجع ركز بسلاحو ،انا جلست ضهري و حطيت رجل على رجل ،اطلع فيني كيف قعدت ضحك ضحكة مكبوتة و انا صرت هز برجلي و طق بالعلكة
معتصم:انت جسمك جسم صبية بس هون عقلك ،عقل بنت عمرا 13 سنة و الدليل كيف عم تعلكي العلكة بطريقة مستفزة
سالي:امممم …طيب …بعلكا متل ما بدي
معتصم:اعلكيا بهدوء بدون ما اطلعي اي صوت و تكهربيلي بدني
سالي:ماشي ….من ايمت بتعرفا لسحر؟
معتصم:بعتقد هاي امور خاصة و يلي بيني و بين سحر ما بيعنيكي بشي ،لهيك ريحي راسك و ركزي كيف بدك تطلعي من هون
سالي:طيب اذا قلتلك انا بعرف وين الماسة يلي عم دورو عليا اديش رح تعطيني نسبة عليا؟
اطلع فيني و عبس
معتصم:ها هلأ تغير الحكي و صرتي عم تفاوضي،معناها بتعرفي وينا و ما عم تحكي
سالي:لا ما عم اعرف بس بجوز اعرف يعني اذا عصرت مخي و حاولت اتذكر مثلا
معتصم:القطعة رح ردا لصاحبا يعني ما رح اخد ولا ليرة عليا
سالي:ايه و انا شو بضمنلي هالحكي يكون صحيح و شو بيضمنلي انك ما تقتلني بعد ما اعطيك اياها و خاصة انو انا حاسستك بتكرهني كتير
معتصم:شو بدك ضمان انو ما رح اذيكي بعد ما اخدا منك و انو وصلك براسي على بيتك و زبطلك سيارتك و اطلع من حياتك و ما عاد تشوفي وجهي
سالي:بس انا ما بدي هيك …قصدي انا بدي ضمان شي ملموس و مادي ما بدي كلام و وعود بس
معتصم:طيب رح اعطيكي مبلغ رح يعجبك …
سالي:ما بدي مصاري
معتصم:هلأ عم تقولي بدك نسبة
سالي:و هلأ غيرت رايي
معتصم:شايفة كيف انك طفلة
سالي:اتركني فكر و بخبرك شو بدي الضمان و المقابل
معتصم:طيب بس اسرعي بالتفكير لانو ما معنا وقت كتير
ضب سلاحو ببيتو و حسيتو ارتاح نفسيا و رجع سند ضهرو على الكنباية هو و عم يدخن و انا عم العب بخصل شعري و اسرح بخيالي و اطلع فيه ،كنت بكل مرة بصفن فيه بلاقي فيه شي حلو كتير ما شفتو من قبل ،انتبه علي انا و عم اطلع فيه ،حطيت ايدي على خدي و درت وجهي ،شلحت السكربينة و حطيت تحت الكنباية و رفعت رجلي و غفيت انا و جوعانة و عم فكر بالمقابل ،ما فقت الا على صوتو عم يفيقني
معتصم:قومي كلي ما صرعتي راسنا بدك تاكلي
سالي:اي يلا بس شوي
و تابعت نومة ،ما فقت الا بنص الليل ،كان الصالون عتم كلو و ما في ضو ابدا ،فتت على المطبخ انا و عم لمس قدامي ،شغلت الضو و فتحت البراد لشوف سحر شو جابت معا
سالي:هالمقوصة جايبة بروستد و ما تركولي الا قطعة وحدة ….اووف
اكلتا هي و باردة و معا كام حبة بطاطا و كولا و انا و طالعة من المطبخ كنت عم دور بالصالون على معتصم ،شفتو نايم على الكنباية ،قربت لعندو انا و عم اطلع فيه ،عيونو ..رموشو السماك …شفايفو الزهر ،مرقت اصابعي بشعرو و بدقنو
بعدين سكرتلو فتحات انفو باصابعي انا و كاتمة ضحكتي،صار يطلع صوت من تمو، ، حطيت راسي على صدرو انا و عم اسمع دقات قلبو و اتنفس انفاسو
سالي:اصابني عشقك …
معتصم:شو عم تعملي؟
رفعت راسي و هو قام فورا و جلس قعدتو
سالي: عم حس دقات قلبك تك تك تك تك ، ليش ما تركتولي غير قطعة فروج وحدة
معتصم:فيقتك لتاكلي انت بدك تنامي
ساالي:وين يور كيرل فريند سحر؟
معتصم:ما هون ،راحت
جلس قعدتو و هو عم يفرك بعيونو
معتصم:شو صار معك؟فكرتي؟
سالي:ايه قبل ما اخرق بالنومة كنت عم فكر قمت نمت و حلمت فيك
تنهد
معتصم:المهم شو طلع معك؟
سالي:جايتك بالحكي …حلمت انو انا لابسة بدلة بيضا و الناس عم تزت علي ورد ابيض
معتصم:شكلك رح تموتي
سالي:لاااا بعيد الشر عن قلبي …المهم انو كنت عم نزف بالبدلة و اذ …
معتصم:ايه
سالي:بتجي انت و لا بس بدلة سودا و كرافيتا سودا ،كنت مبسوطة كتير بالحلم و وقت جيت فيقتني قطشتو للحلم
معتصم: انا ما عم اسالك شو حلمتي انا عم اسالك شو قررتي ؟
سالي:نفس الشي ،بدك القطعة ترجعلك ،بدي اتزوجك …قصدي تتزوجني …ما بعرف كيف بقولوها المهم نتزوج انا و اياك
…..يتبع
