#قصة_واقعية

#قصة_واقعية

جوجل بلس

#جلنار_بقلم_امل_احمد
#قصة_واقعية
هالقصة لصبية معنا بالجروب وهي واقعية بكل احداثا الرئيسية مع اضافات لاحداث وتفاصيل مني… بتمنى تعجبكن😘
(الفصل الاول)
بابا: صار لازم نترك هون
ماما: حسبنا الله ونعم الوكيل😔.. لوين بدنا نروح يا ربي
بابا: متلنا متل غيرنا .. مطرح ما الناس كلا بتروح.. وكلي ربك
ماما: ياا رب 😢
هالحرب تعبتنا كلنا وفرقت شملنا ..ما خلت عيلة الا وفرقتا.. انا جلنار بنت حلوة ونعومة واهلي بينادولي جولي ..عايشة مع بابا وماما واخي جود بالشام..
هالحرب يلي صارت سببت بخوف كبير بقلوبنا كلنا وصار لازم نترك البلاد لحتى نقدر نحافظ ع حياتنا..
ندق الباب…..
ماما: امي جلنار.. جولي يا روحي
جلنار: اي ماما جايي
ماما: فتحي الباب يمكن بيك .. ما فيني اترك الطبخة هلأ بتنتزع
جلنار: حاضر ماما
ركضت ع الباب وفتحتو ..كان بابا واخي جود يلي ع الباب ..كان وشو لبابا اسود كتير من القهر.. ومع هيك ما حسسني بهالشي..
بابا: هاي الحلوة جولي يلي فتحت.. حبيبة البابا
جلنار: اهلا حبيبي بابا
ضميتو كالعادة وبوستو..
جود: لك كبري كبري.. بلالك هالحركات هاي
جلنار: اي انا ما بكبر رح ابقى جولي الصغيرة ..حبيبة البابا…
بابا: ربي يسعدكن ويحميكن.. وينا امك
جلنار: ليكا بالمطبخ
دخلنا كلنا لعند الماما ع المطبخ..
بابا: يعطيكي العافية.. وقرب منا وباسا ع راسا
ماما: الله يعافي قلبك ويخليلي اياك ..طمني شو صار
بابا: بس لاخد نفس
ماما: جود امي عطي لبيك مي ليشرب
جود: حاضر امي
قعد بابا ع كرسي السفرة.. وشرب المي ..
بابا: ااخ.. هاي رفيقي ابو محمد بدو يروح ع العراق ..واتفقنا انو نروح معو
ماما: يا ميسر يا الله.. لا تزيدا ع حالك.. رح تتيسر
بابا: ان شاء الله
بعد يومين جهزنا الشناتي وودعنا بيت جدي ابوها لماما وسافرنا ع العراق..
بهالوقت كان عمري 16 سنة.. كنت عاشر.. كملتو لعاشر وللحادي عشر وصار وقت البكالوريا..
ماما: صار ضروري نرجع ..جلنار بدا تكمل تعليما
بابا: اي معلوم بدا تكملو.. رح جهز كلشي .. بالكتير اسبوع بنكون بالشام
جلنار: يا الله.. واخيرااا رح نرجع للشام ولريحة الشام
جود: الحمد لله.. رح نرجع لبيتنا
بعد اسبوع جهز بابا كلشي ورجعنا ع الشام
كانت فرحتنا ما بتنوصف.. ولو انو كتير اشيا تغيرت بس كتير فرحنا برجعتنا..
سجلت بالبكالوريا وبلش الدوام.. بابا كان مبلش شغل بالعراق وما قدر انو ما يرجعلو .. تركوني انا واخي جود ببيتنا وسافرو ع العراق..
بابا: ابني جود انتبه ع اختك منيح.. وانت بابا انتبهي ع حالك
ضمتنا امي وهي بتبكي: بامان الله يا امي.. انتبهو ع حالكن منيح.. رح نضل ع تواصل معكن ..ربي يحميكن..
(الفصل الثاني)
سافرو بابا وماما وبقيت انا وجود ببيتنا..
جود: لك خلص اختي بكفي بكي.. كلا سنة بتكملي البكالوريا وبنرجع سوا مرة تانية
ضميتو لاخي وانا عم ابكي من كل قلبي ..ما بعرف كيف رح كمل هالسنة من غيرن..
اخي جود كان يمضي اغلب وقتو بشغلو او مع رفقاتو وانا كنت كل يوم فيق ع 5:30 افطر وادرس ليجي وقت المدرسة.. ومن بعد ما ارجع من المدرسة كنت ضل ادرس لاخر الليل..
تعبت نفسيتي كتير واختنقت من بعدي عن بابا وماما ..
جلنار: مرحبا ماما كيفك
ماما: اهلا بجولي الحلوة.. كيفك انت يا ماما.. كيف دروسك
جلنار:…………….
ماما: شبك يا عمري.. ليه ساكتي.. جولي.. جلنار.. امي حبيبتي.. لا تحرقيلي قلبي عليكي..
بابا: شبها.. عطيني لشوف..
جولي حبيبة البابا ..ليه ما عم تردي يا عيوني..
جلنار: (بتبكي) شتقتلكن بابا.. شتقتلكن كتير
بابا: لك ليه عم تبكي.. وينو جود
جلنار: ما بعرف.. طلع مع رفقاتو
بابا: انا رح ابعت وجيبكن لعندي وبلا منا البكالوريا.. وبلا ما تدرسي علم ذرة وتحققي حلمك.. خلص رح ابعت وجيبكون.. شو رايك
جلنار: (بتبكي) هههههه لا بابا خلص.. انا عم ابكي من شوقي الكن
بابا: هههههه يا اما بتضحكي او بتبكي ..تنيناتون مع بعض ما بصير.. قرري
جلنار: هههههههه
بابا: تسلمي لالبي يا بابا.. حكي مع الماما
ماما: شو يا زعرة.. معي بتبكي ومع بابا بتضحكي
جلنار: لا حبيبتي ماما ..بس والله اشتقلكن
ماما: والله رح موت وشوفكن يا عمري.. بس هاد قدرنا وكلو كرمال مستقبلك يا عمري ..
جلنار: خلص فهمت ماما حبيبتي
ماما: انتبهي ع حالك يا عمري..
سكرت الخط معن وزدت بالبكي.. كانت نفسيتي كتير تعبانة.. من شوقي لاهلي ومن ضغط الدراسة..
بس ربي يسرلي رفيقتي زينة.. هي الوحيدة يلي كانت تخفف عني.. كل ما كنت انخنق احكي معا وتخفف عني كتير ..
جلنار: مرحبا زينة ..كيفك
زينة: هلا حبي.. تمام… انت كيفك اليوم
جلنار : والله ماني منيحة.. مضغوطة كتير ..مشتاقة لاهلي.. ومضغوطة كتير بدروسي
زينة: لك لا تحكي هيك.. انت اسم الله ما بينخاف عليكي بالدروس.. رح تتميزي وبكرة بتشوفي
جلنار: يا رب
بقيت بالبيت انا واخي شي شهر ومن بعدا حسيت بانو رح جن.. ما عدت قدرت ابدا انو ضل بالبيت..
جلنار: اخي ما فيني.. خلص تعبت كتير والله
جود: لك يا روحي.. وشو بدنا نعمل
جلنار: ما بعرف ما بعرف
جود: سمعي انا كنت سهران مع خالتو منال ببيت جدي ..ووقت عرفت انو انت مو مرتاحة قالتلي تعو لعندي.. شو رايك
جلنار: والله ماني عرفاني .. بنحاكي بابا وماما وبنقلن
ونحنا عم نحكي سوا دق الجوال.. وكانت ماما..
جلنار: اهلا ماما حبيبتي.. والله لسا عم نحكي انا وجود لنحاكيكي
ماما: صاير معكن شي
جلنار: لاا.. بس كنا بدنا نستشيرك بشي
ماما: قبل ايا شي.. هلأ بتجهزو شنتكن انت وجود ..بعد شوي جدك رح يجي ياخدكن لعندن.. انا قلبي مانو مطمن وانتو لحالكن.. هيك برتاح اكتر
جلنار: ههههه تعا جود تعا سماع ماما شو بدا
جود: شو بدا.. عطيني حاكيها
جلنار: جدو رح يجي ياخدنا لعندو
عطيتو الجوال وانا عم احكي معو..
جود: كيفك ماما.. والله لسا هلأ حاكيتا لجولي لنستشيرك ونروح عندن هههههههه
ماما: اي كتير منيح امي.. جهزو حالكن هلأ
وهاد يلي صار.. انتقلنا لبيت جدو نعيش معن لتخلص هالسنة.. كتير كانو حنينين علينا .. وخالة منال كانت تعاملني متل امي ويمكن اكتر شوي..
رتاحت عندن ..بس ومع هيك ضليت مو مرتاحة.. وكنت مل كتير..
وكل ما مل دقلا لزينة لتجي لعندي ونقعد سوا…
(الفصل الثالث)
مشت الايام ودراستي كل مالا عم تزيد… وانا ليل ع نهار عم ادرس وجهز للفحوصة..
وبيوم حتجت لوازم من المكتبة.. قرطاسية وهيك شي..
جلنار: خالتو منال.. انا بدي روح ع المكتبة لاشتري شوية لوازم
منال: اي ماشي حبيبتي.. بس لا تتاخري.. وانتبهي ع حالك منيح
جلنار: ماشي حبيبتي خالتوو.. موااااه بحبك كتير
منال: هههههه يسلملي العسل انا
نزلت ع المكتبة.. وانا راجعة ع البيت ما شفت غير اخي جود ومعو شب.. دخيل ربو ع هيك شبوبية.. طويل ونحيف وبشرتو بيضة وعيونو ملونين…كلو ع بعضو بيجنن.. مدري شو يلي صار فيني اول ما شفتو.. حسيت بناااار دخلت لقلبي..
جود: شو وين اختي ..لوين رايحة
جلنار: اهلا جود.. كنت بدي قرطاسية من المكتبة ..وشوية لوازم
جود: جبتيهن؟
جلنار: اي اخي جبتن
جود: لكن رجعي ع البيت حبي
قربت منو وهمست بدانو..
جلنار: مين هاد يلي معك
تصفن فيني وما عجبو سؤالي..
جود: ع البيت اختي.. ع البيت
جلنار: (بهمس) اي ماشي ماشي رح روح
رجعت ع البيت وانا كياني كلو مقلوب.. مدري كيف هيك صار فيني.. دخل لقلبي من اول لحظة شفتو فيها.. فتت ع غرفتي واتسطحت ع التخت وسرحت بخيالي لبعييييييد ..بعيد كتير وصرت احلم كيف بدو يكون حبنا..
ما قدرت ما خبرا لزينة وفشلا قلبي..
جلنار: الوو.. زينة ..بسرعة تعي لعندي هلأ هلأ
زينة: لك شو في.. خوفتيني
جلنار: ما في شي.. عايزتك بموضوع هلأ ضروري..
بعد بشوي اجت زينة.. وفتحتلا بيت البيت…
جلنار: اهلا حبي اهلا.. تعي معي لنفوت لجوا.. بلا ما ندايقها لخالتو منال..
منال: تدايقوني قلتيلي.. هههههههه اي فوتو فوتو
فتنا ع الغرفة وقفلتا وقعدنا انا وزينة..
زينة: لك شو صاير.. لحتى هيك متلهفة لشوفتي
مسكتا من ايدا وصرت لف انا وياها ..
جلنار: لك لقيتو لقيتو يا زينة
زينة: لك هدي فتل راسي ههههه..منو هاد يلي لقيتي.. وخلاكي بدك تطيري ع شوي
تنهدت ووقفت …
جلنار: فارس احلامي.. ااااه يا قلبي.. لك حطي ايدك ع قلبي وشوفي شلون عم يدق..
زينة: ههههههههه لك ولي جدبة.. جبتيني بهالوقت لتقليلي هالحكي
جلنار: لك والله عم احكي جد
زينة: ههههههه اي ومنو هاد.. وراكب ع حصانو اما لأ
جلنار: لك انو حصان هاد.. ما في داعي للحصان.. شب دخيل ربو…. طول وبياض وعيون وعضلات وكلشي كلشي.. لك بجنن كلو ع بعضو بجنن
زينة: لك هدي شوي.. هلأ بتدوبي.. منو هاد ووين شفتي وكيف تعرفتي عليه
جلنار: كل يلي بعرفو انو من رفقات اخي ..وما بعرف شي تاني ابدا
زينة: ااه يا ربي تصبرني عليها لجولي يا رب
جلنار: لك قلتلك لا تقولي جولي.. هالاسم لماما وبابا وبس
زينة: اي بعتزر منك حبيبتي
وهاليوم كان بداية مرحلة تانية بحياتي… مرحلة العشق وجنونو وعذابو …
(الفصل الرابع)
ضليت ورا لاخي لحتى عرفت كلشي عنو لفارس احلامي..
اسمو سالم.. بيو متوفي .. وخيو علي بكون استاز انجليزي.. عايش هو وامو وخيو علي سوا هون بالشام.. والو كمان اخوة تنين عايشين بتركيا.. تركو البلاد وقت الحرب والاحداث..
انا كلشي بعد هاليوم تغير فيني.. اخدلي كل عقلي وتفكيري.. دراستي اهملتا..كل يلي كنت فكر فيه هو سالم ..وفكر كيف بدي ارجع شوفو مرة تانية.. والاهم كيف بدي خليه يحبني…
كنت ع طول اطلع من البيت وروح ع المكتبة لحتى شوفو.. كنت قبل لاطلع ادعي ربنا كتير انو التقي فيه..بس ما صار وشفتو غير مرة وحدة بس.. ومرق عني من غير ما يطلع فيني.. ويمكن كمان ما عرفني..
جلنار: لك مرق عني وكلمة مرحبا ما حكاها.. لك رح موت من وجعي
زينة: سلامة قلبك يا روحي.. لك كيف بدك ياه يحاكيكي.. هو ما بيعرفك
ضليت فكر وفكر وفكر.. انو كيف بدي شوفو ..خطرتلي فكرة بانو استغل قصة انو اخو استاز انجليزي…
جلنار: جود اخي حبيبي.. انا هالفترة كتير تعبت بمادة الانجليزي.. دخيل عينك بدي حد يساعدني
جود: مو تكرمي يا روحي.. طلبي وتمني انت
جلنار: تسلم لقلبي شو بحبك.. هات بوسة هات موووواااه
جود: هههههه لك بعدي هيك ولي جدبة
تركتو وبدي روح.. رجعت لعندو..
جلنار: شو بدي قلك اخي..
جود: اي عمري
جلنار: هلأ رفيقك هاد يلي اسمو سالم
جود: اييييي شبو
جلنار: كنت عم تقول بانو خيو استاز انجليزي.. موو
جود: لك اي والله صح… برافوو يا بنت.. هلأ رح دقلو ع المسنجر وحاكيه
هون انا طرت من فرحتي وما عدت هديت.. كانو فرحتين مو فرحة وحدة.. فرحت انو رح يدرسنو خيو.. واكيد رح صير شوفو… والتانية انو عرفت انو عندو فيس
دخلت فورا لغرفتي وفتحت فيس.. ودورت كتير للقيت حسابو.. يقبر قلبي ع هالصورة.. بتشللل
صرت كل يوم افتح ع حسابو وراقبو وشوف شو منزل.. ومن جهة تانية كمان.. بلشت بدروسي مع الاستاز علي ربي يكرمو ع قد ما هو انسان راكز وفهمان..
وتعرفت كمان ع امون.. الست السكرة يلي جابت ع الدنيي هيك شباب ربي يحماهن..
جلنار: كيفك خالتو
ام علي: اهلا يا عمري.. انت كيفك.. وكيفو علي معك ..عم تفهمي عليه
جلنار: ربي يسعدو الاستاز علي.. والله ما في منو
كتير كنت اتعذب لانو هالحب الكبير كان من طرف واحد…كنت ضل اتمنى لو انو اقدر حاكيه وقلو قديش بحبو.. وقديش عم اتعذب كرمالو…
مشت الايام والحال متل ما هو ..كل يوم والتاني روح لعندن لادرس.. وكل يوم فتش حسابو لاعرف تنزيلاتو كلا..
وبيوم اتشجعت وبعتلو طلب صداقة…
جلنار: ااه يا ربي.. لك شو عملت انا.. ليه بعتت.. لك شو بدو يقول يعني هلأ.. يا ربي..رح ارجع احذفو.. لك وحتى لو حذفتو.. رح يبين معو انو بعتت.. ولي ع جدبتي انا..
وانا لسا عم حاكي حالي وصلني اشعار انو تمت الموافقة ع طلب الصداقة الذي بعثته الى سالم..
يا امي شو فرحت.. يا امي شو طرت من فرحتي..كان نفسي اوقف ونط ونط ونط من فرحتي.. لك والله وقفت ونطيت وجنيت من فرحتي..
سرحت بخيالي لبعييييد بعييد واتخيلت بانو بيحبني متل ما بحبو وعم نعيش قصة حب خيالية..
جلنار: لك زينة ما رح تصدقي شو عملت
زينة: حكي بسرعة.. شو عملتي هالمرة.. بس ما تكوني اعترفتي لعلي بانك بتحبي اخو.. ههههههه
جلنار: هههههه لا ولي جدبة.. لك بعتلو طلب صداقة.. وهو وافق فورا.. ماااا عم صدق والله
زينة: اي كتير حلو
جلنار: معقول يكون حاسس فيني
زينة: جلنار حبي لا تسرحي كتير بخيالك.. وكمان مانك ملاحظة قدي اهملتي دراستك هالفترة.. والله بدقلا لامك وبحكيلا هااا
جلنار: لا ولوو ..لا تخافي.. بلحق بلحق
زينة: اي ان شاء الله
(الفصل الخامس)
مشت الايام وحبو لسالم عم يكبر جواتي اكتر واكتر ..وعم يمشي بدمي متل الاكسجين…
ليالي سهرتا وانا عم ابكي من وجع قلبي.. كنت فيق بنص الليل بس لحتى ادعي لربنا انو يحس فيني .. ويعرف قديش بحبو.. وقديش عم اتعذب..
كان باقي للفحوصة اسبوع واحد بس..
جلنار: ما عم اتحمل يا زينة والله ما عم اتحمل.. رح موت والله رح موت.. ما عم يحس فيني ابدا.. لك حتى نظرة وحدة ما عم يتطلع فيني..
زينة: يا قلبي انا.. شو بدك تعملي ..ما بتعرفي يمكن يجي شي يوم ويحبك متل ما بتحبي ويمكن اكتر..
جلنار: لك ما خليت ولا طريقة لالفت فيها نظرو الا وعملتا.. تعبت والله تعبت..
زينة: خلص روقي حبي روقي
جلنار: لازم اعمل ايا شي.. لو بضطر انو حاكيه واعترفلو… لك ما بقي شي ع نهاية دراستي.. ورح روح للعراق.. لك والله بموت بلاه والله..
تاني نهار كنت قاعدة مع بيت جدو انا وجود.. وعم اتصفح الفيس ع حسابو لسالم وراقب شو عم ينزل.. دق جوالو لاخي جود..
جود: اهلا سالم اهلا
نقز قلبي.. حسيتو رح يوقف من فرحتو ..لدرجة انو خفت اطلع بحد فيهن ويفهملي من عيوني..
جود: اي شريك.. لك كيف هيك.. وايمت رح تسافرو.. اسبوع.. لا تقولا.. اي ..اي.. ماشي شريك بشوفك ..
انا سمعت الحكي يلي حكاه وفتل البيت كلو فيني وعيوني ما عدت شفت فيهن منيح.. حسيت حالي بعالم تاني ..واتجارئت وسالتو..
جلنار: جود.. لوين بدن يروحو اهلو لسالم
جود: بدن يسافرو ع تركيا… بدن يلحقو اخوتو هنيك
جلنار: وانا.. ودمعو عيوني..
تصفن فيني جود وهو مصدوووم…
جود: شبكي انت..
جلنار: لك مين بدو يدرسني ازا راح علي.. مين
جود: هلأ لهيك هم تبكي لاتخافي بدبرا يا روحي
تركتو وقمت ع غرفتي… طبعا ما كان هاممني لا دروس ولا غيرو.. كان بس بدي سالم..ما بدي اياه يروح ويتركني.. نار شعلت بقلبي ..حسيت بانو خلص رح اخسرو للابد.. وبكيت وبكيت وبكيت..
جلنار: لك شو عم اعمل انا هون.. شو نفع البكي.. بدي روح وشوفو واعترفلو بكلشي.. ما عم اقدر..
لبست تيابي واخدت كتابي وطلعت..
منال: لوين خالتو
جلنار: لعند الاستاز خالتو
منال: لك ليه ما طلبتي من جود يوصلك.. هلأ طلع..روحي بس لا تتاخري حبي.. ماشي
جلنار: اي خالتو اي ماشي
احيانا وقت بنحس انو رح نخسر يلي بنحبون بنعمل اشيا ما بنكون عرفانين انو بنقدر نعملا… رحت لباب بنايتن ..طلعت الدرج..
جلنار: لك شو عم اعمل انا.. بلا جنان.. رح ارجع
نزلت الدرج… بعدت شوي عن البناية ..و رجعت كمان مرة وطلعت لباب بيتن.. دقيت الباب وفتحلي علي..
جلنار: مرحبا استاز كيفك
علي: اهلا اهلا.. تفضلي ..عندك اسئلة شي
جلنار: اي استاز.. الفحوصة قربت وانا لسا ما درست منيح..فيك تجاوبني ع اسئلتي
علي: اي طبعا ..ما بدا سؤال
سالتو كام سؤال.. وانا عيوني عم تتفتل بالبيت ودور عليه.. عقلي ما كان معو ابدا.. كنت عم فكر كيف بدي شوفو لسالم..
جلنار: خلص هيك استاز.. يسلمو دياتك.. بس بدي اسالك.. سالم هون
تفاجأ من سؤالي…
وانا تداركت الموضوع وكملت: اخي جود تحت وبدو اياه
علي: اي هلأ بناديلو
جلنار: لكن عن ازنك.. صار لازم روح
نزلت الدرج وقلبي عم يدق ويدق ويدق.. كنت حاسيتو رح يوقف..وكنت عم جمع بالحكي لقولو..
وقفت ع باب البناية لحتى اجى سالم..
سالم: مرحبا ..كيفك.. وينو جود
ما بعرف شو يلي صرلي.. ما قدرت قول ولا كلمة من يلي جمعتن بعقلي.. ومرة وحدة انفجرت بالبكي قدامو.. بكيت بحرقة كبيرة كتير..
سالم: لك شو في.. شو صار.. وينو جود.. صايرلو شي.. وقعان بشي مشكلة.
جلنار: (وانا عم ابكي من وجع قلبي) لك ما صار معو شي ..ما صار.. ما في مشكلة ابدا.. انت المشكلة انت
جود تفاجأ كتير: انا… شبني انا
جلنار: لك انت واحد غبي.. والله غبي.. لك كيف فيك تروح وتتركني كيف ..لك انا عم موووت..
وتركتو واقف ومصدوم ورحت..
(الفصل السادس) والاخير
مشيت بالشارع وانا منهارة ..دموعي متل الشلال ما عم اقدر هديهون.. فكرت كتير لوين بدي روح وانا بهيك حالة.. لانو ما بدي حد يشوفني هيك..
ما لقيت قدامي غير بيتنا القديم.. رحت لهونيك وفتت وقعدت وحدي عم اندب حظي وابكي من وجع قلبي..
وانا قاعدة ما شفت غير الباب اندق..
جلنار: لك مين بدو يكون.. يا ربي دخيلك
حاولت اتمالك اعصابي.. ومسحت دموعي بايدي ورحت فتحت الباب….
انصدمت وقت يلي شفتو.. سالم كان يلي جايي.. وقت شفتو كان بدي ضمو وضل ابكي ع صدرو وابكي وابكي.. وصيح فيه وقلو بترجاك ما تتركني ..ما تتركني بموت من غيرك..
انهرت بالبكي ..وتركتو واقف ع الباب وفتت ..
سالم: ما بدك تقليلي فوت
جلنار: ………
سالم: احكي شي.. روح او ابقى؟
جلنار: يعني ازا قلتلك ابقى بتبقى؟؟؟
سالم: لك ايا شي بدك اياه انا بعملو.. شو ما بدك طلبي..
ودخل لعندي وقعد حدي ..
سالم: مفكرة انو ما كنت حاسس فيكي.. لك انا بعرف انو بتحبيني.. بس بصراحة ما اتخيلت انو لهالدرجة..
انا كنت عم اطلع فيه وانا مصدومة…
سالم: لا تطلعي فيني هيك.. لك انا بعشقك بكل شي فيكي.. بعشق كل شي بخصك.. ومن اول يوم شفتك فيه..
جلنار:………..
سالم: لك ليه لسا عم تبكي.. لك خلص ولووووو.. اهدي
ما لقيت حالي غير حطيت راسي ع صدرو وزدت بالبكي..
جلنار: عم ابكي من فرحتي.. ما بتعرف قديش كنت اتعذب لانو كنت مفكرة بانو ما بتحبني.. لك كنت عم موت والله..
مسك وشي بئديه ومسحلي دموعي..
سالم: سلامة قلبك.. خلص لا عاد تبكي
قعدنا شوي سوا وحكينا كتير ..كان عم يراضي فيني ويهديني.. وبعدا رجعنا كل واحد ع بيتو.. ومن بعد هاليوم بلشت ايامي تحلا وتحلا..
عشنا فيها انا وسالم احلا قصة حب.. واجهنا شوية مشاكل وسمعنا كتير حكي..انو عم نشوف بعض وانو عم نحب بعض وانو انا ماخدة راحتي بغياب اهلي وهيك اشيا.. بس ابدا ما اثر فينا.. بالعكس هالكلام كان يعطينا قوة لنتمسك ببعض اكتر..
بلشت ادرس اكتر واكتر واكتر.. واجت الفحوصة وقدمتن….
سالم: يعطيكي العافية …وهاي خلصتي
جلنار: الحمد لله
سالم: شبك.. ليه زعلانة
جلنار: انا هلأ رح ارجع ع العراق انا وجود
سالم: لك انا لغيتا لسفرتي لتقيليلي بدي سافر ع العراق..
جلنار: وشو بدي اعمل.. بابا اليوم حاكانا ليجهزلنا سفرتنا..
سالم: لك انا اليوم بدي حاكي امي لنطلبك رسمي ونخطب ونرتاح
ما صدقت ادنيي ابدا: شو عم تحكي.. لك جد هالحكي
سالم: طبعا يا عمري.. لك انا قلتلك انا بعشقك.. هلأ رح حاكي امي
سكرت الخط معو وحاكيتا لبير اسراري حبيبتي ورفيقتي زينة..
جلنار: الوو.. زينة ..لك بحبك انا والله بحبك
زينة: اي وانا بمووت فيكي.. بس ليه هيك عم تحكي ههههه ما الك بالعادة
جلنار: سالم رح يجي ويطلبني
زينة: بربك.. لك عم تحكي جد.. يييي يا عمري ربي يتمملك ع خير..
وهاد يلي صار.. سالم عمل متل ما قال.. وبما انو اهلي مو هون.. امو لسالم حاكت امي وفهمتا بانو بدن ياني لسالم..
ماما: توكلي ع الله ام سالم.. بس لشاور بيا ونشاورا
ام سالم: حقكن اختي حقكن
بعد بشي اسبوع بابا وماما اجو لسوريا..
ماما: لك تؤبري البي الهي حبيبة الماما تعي لبوسك تعي
بابا: جولي.. حبيبة البابا والله وكبرتي وبدك تتزوجي يا روحي….
لحظات ما بتنتسا بنوب.. حلمي تحقق وحبيبي صار لالي..
تمت خطبتنا انا وسالم وسكتنا كل يلي كانو عم يحكو…
بحكم شغلو لبابا ولانو مضطر يرجع ع العراق.. ما طولت خطبتنا ..بعد بشهر بس.. تزوجنا انا وحبيب قلبي سالم…
سالم: لك طالعة متل القمر.. هلأ رح يجنو كلن
قربت منو وحوطو باديي..
جلنار: ما بهموني.. انت وبس يلي بتهمني..ما بدي من الدنيي غير كون حدك انت وبس.. انا بحبك سالم وبموووت فيك
سالم: يا عمري.. ربي يخليلي اياكي..
دخلت زينة..
زينة: لك شو عم تعملووو.. الناس عم تستنا وانتو قاعدين بتتسايرو هون..
جلنار: ههههههههه روحي ولي جدبة
صار عرس متل الاعراس يلي كنت اسمع فيها بقصص الخيال.. عرس بجنننن.. وتمت امورنا كلا ع اكمل وجه..
لك اي نسيت قلكن.. بانو نجحت بالبكلوريا بامتياز.. وكنت حابة ادرس علم ذرة.. بس غيرت رايي.. وتخصصت صيدلة..
وهلأ عم حاكيكون وانا حامل ببنتي ريماس…
هاي هي قصتي يلي طلبت من #امل_احمد انو تكتبا لحتى شاركون فرحتي بحبيب البي سالم.. وفرحتي ببنوتي الحلوة ريماس..
صبايا لا تنسو بانو صاحبة القصة متابعة تعليقاتكن.. بتمنى تعطوني رايكن… حبكنن😘