قصه اليوم بعنوان عدو المرأه - شبكة صحتك

قصه اليوم بعنوان عدو المرأه

جوجل بلس

#عدو_المرأة

#بقلم_جمايكا_أحمد

 

ابتداء القصة الاحد 12 نوفمبر..انتهت

الجزء الاول…..

احيانا قعدتي قبال المراي بالساعات ، وقت يمر العمر بدون ما يشعر فيني او احس على هروبوا ..عم دقق بملامح وجهي البالية ..عيوني الذبلانة ..الهالات السودا يلي طفيت نور جفوني..التجاعيد يلي صارت فوق شفافي..شعري المقصف..ضحكتي المقتولة..عيوني يلي عم يبكوا على طول بسبب او بدون سبب..هني بقولوا جنيت بس لاء انا عاقلة وفاهمة وعايشة الدور..دور البنت المقتولة..بس بعدني على قيد الحياة..اساسا هني من قتلوني قتلوني ذبح ..اي كمشو قلبي هيك وغرسوا غدرن فيه .. عادي انشق قلبي وشوية اوجاع وهموم ماعم تنشفي ولا عم تنتسي كل ندبة فيه صارت تروي حياة ايام مثل السم البطئ هيك عم يقتل فيني بالبطئ..

 

سجود :- اختي رح اضلك هيك قاعدة .

 

(( رفعت نظري باتجاه اختي سجود وابتسمت لالها ابتسامة ..شو بدي قلك .

 

سجود :- منار حبيبتي القعدة مقابيل المراي مو منيحة .

 

(( اشرت باصبعتي باتجاه المراي بلشت اتحسس ملامح وجهي الصلبة.

 

منار :- بتعرفي مين هاي يلي بالمراي

 

(غصت سجود بنظراتها ماكانت عارفة شو ترد عليها انها تواسيها او تلومها لانها هي نفسا السبب باوجاع حالا..

 

منار :- ليش ساكتة ..

 

سجود :- مانك جوعانة انا عاملة اندومي يلي كنتي تحبيه ..وتقليلي اعملي عشا اندمي تناكل سوا..ماجاي على بالك..

 

منار :- هاي قرينة منار انا بعرفها مو بقولوا اللي بضلو يشوف بالمراي كتير بشوف قرينو..

 

(( اتراجعت سجود خيفانة من كلاما يمكن حقيقتا منار عم تشوف قرينا..بس ضحكة منار ظهر انها مزحة من مزحات جنونا..

 

منار :- تعي لاتخافي عم امزح معك..بس جد هاي انا شوفي شلون صرت..لك بالله ما بضحك منظري ..

 

سجود :- منار ليش عم تعملي بحالك هيك لك حاجي تبكي على الماضي..

 

منار :- انا ماببكي لاء ولا بهمني ماضي..

 

سجود :- مادام ماعم يهمك ليش عم تعملي بحالك هيك

 

منار :- لكان شو اعمل بحالي. طيب .اتخيلي هلاء حبيبك عادل قرر تزوجوا ..بعد 6 سنين حب..وانتي يلي كنت عم ترسمي لالو احلام وتبني لالو مستقبل حاربتي العالم كرمالو وقفتي بوجه بيك ..بوجه اعمامك واخوالك ..بوقف جدك يلي ماحدا بيكسر كلمتو..وقفتي تقولي لالو انا بدي اياه لاني بحبووو ..لاني مارح اتزوج غيروا واذا مازوجتوني اياه رح اهرب لو بعد سنين حتى لو زوجتوني لغيروا رح فتش عليه واتزوجوا وجبلكن العار..اتخيلي قدام كل العيلة تنضربي كرمال حبيبك..وغصب على اللي يسوى واللي مايسوى تزوجتي واحد كحيان مامعو حق غرفة نوم ..وتصبري ..وتشتغلي وانتي بنت اكبر تاجر بالبلد تشتغلي كرمال تساعديه..وتبني بيتك..لانك بتحبيه .ولتربطي حياتك فيه اكثر تجيبي اولاد ..وتقتنعي انو مافي مرة بالكون تحسن تخرب حياتو او يحسن يشوف غيرك لو بعين اعجاب..وفجأة تكتشفي انو الرجال يلي كنتي تبوسي تراب رجليه نايم مع وحدة غيرك بفراشك..لك فهماني شو يعني بفراشك..ومين هالوحدة ..رفيقة عمرك وحافظة اسرارك..تخيلي ماكنت متصورة ارجع من الشغل بكير على البيت لاحضر سهرة لعيد زواجنا الخامس..وعم اركض لاني جايبة اغراض معي من سلفة من مدير الشغل.وعم اركض لافتح باب بيتي مبسوطة..عم شم ريحة الحب والدفا..ريحة زوجي يلي ضحيت بعمري كرمالو..فجأة سمعت صوت ضحكات عم تجي من غرفتي شي جمدلي قلبي ..قشعرلي بدني تيبس الحكي بشفافي..مين ووين وشو هاد الصوت خايفة خايفة اقرب ..خايفة لاكمش اكرة البيت وافتحتو وتهب نار جهنم منو..هالصوت بعرفوا ..هالصوت صوت جوزي عادل ..ووصوت صوفيا..لاء لاء حاولت اترك هالاوهام من راسي كذب يلي عم اسمعو اكيد هاد الشيطان عم يلعب فيني بدو يزرع الشك..بدو يحرقلي احلى يوم بحياتي..فجأة بفتح باب الغرفة..

 

سجود :- اختي بترجاكي خلص..

 

منار :- بس اسمعي اسمعي..اسمعي ..لك بس اسمعي..انتي مارح تشوفي يلي شفتو..انتي بس رح تسمعي.. ..تيابهن بكل مكان .. صورة زواجنا يلي معلقة فوق سريري مقلوبة..الفستان القصير الاحمر يلي شفتو قبل بيوم مخبى بمكتبو ..وفكرتوا لالو عم يخبيه كرمال يهديني اياه بعيد زواجنا اتفاجأت انو بالارض مشلوح..وهو ..وهو ..لاء لاء لحظة هي كانت عريانة.. تخيلي سريري كانت عليه رفيقتي عريانة بحضن زوجي يلي ..😢..لك الحقير نايم معها بسريري عريان حاضنها عم يضحك..لك الحقير شافني وقام لعندي ..بدو بدو يفهمني وهي قامت تجمع تيابا لتلبسهن وتهرب..

 

عادل :- منار منار انتي فاهمة غلط..

 

(( عم يقلي فاهمة غلط ..صحيح انا فاهمتو غلط ..اساسا انا يلي عشت 11 سنة معو لافهمو غلط..لافهم انو الانسان الدنئ يلي بعيش على خير مرتوا غلط..انو الانسان يلي تركني ضحي وهو واقف بمكانو باسم الحب انسان غلط..المشكلة مو هون ..المشكلة اللي كنت اسمعو وماسدقو مستحيل لك هاد عادل مستحيل يخوني ويغدر فيني..الموت الاكبر يقولوا روحي شوفي شلون بغازل النسوان بالصيدلية قلن لاء مستحيل هو بحبني وشايفني احلا ست بالكون انتو مدسوسين لتفرقوا بيني وبينو..

 

سجود :- بس هو راح هلاء ..خلص انسيه

 

منار :- هو ما راح ..هو بعدو موجود..هون براسي عم ياكل بعقلي شوي شوي ..عم يقتلني بافكاروا ..تعرفي انا ماببكي عليه..انا ببكي على حالي… وين رايحة سجود تعي اكملك قصة الف ليلة وليلة..قصة شهريار ..وحبيبا الخاين..

 

الجزء الثاني..

 

(( وكالعادة الكل مل من سردي لقصة العذاب يلي كنت عم ارويها ليل نهار لكل حدا عم يفوت لعندي يقلي ليشك لهلاء مقابيل المراية..الكل بهرب ..الا انا ..قاعدة هون ..عم فتش على حالي..بين خطوط التجاعيد يلي بلشت تظهر بوجهي..عم فتش على منار يلي شعلت اطراف شعرا بالشيب..على البنت يلي ماتت جواتي وصارت عجوز فجأة بلمح البصر..ايام مرت على هاد الحال..يمكن صابني الجنون فعليا بس كنت بعدني واعية..بس واعية لاذي حالي باللي صار معي..اساسا تعرفي شو كنت بدي اعمل كنت بدي اعرض حالي على برنامج الصدمة في صدمة اكبر من هيك لتنعرض..

 

صابر :- منار ..شوفي يابي هالحال ماعاد يعجبني انتي بنتي..وماعاد فيني شوفك بهاي الحالة اذا ماقمتي من حالك على رجليكي ..ماحد رح يقومك..وبعدين اذا اصريتي اضلك هيك رح ابعتلو اولادووو..ومعك من هلاء لبكرة اذا ماشفت فيكي منار يلي بعرفها انسي اولادك تشوفيهن انتي بنتي وبخاف عليكي متل ماهو لالو اولاد وخيفان عليهن

 

منار :- ههههه بدكن تقتلوني بزيادة اي اقتلوني ابعتوا اولادي لصوفيا لتربيهن لتجيب اجلي وتقتلني خلص..اساسا انت وهني متفقين عليه..من البداية عم تعاقبوني..انت عم تعاقبني لاني عصيت امرك ورضيتو..وهو عم يعاقبني لاني رضيتو وعصيت امرك..ههه والله مو بس ضحكتوني انتو حرقتوني..

 

صابر :- مارح لومك ولا بدي عاتبك بشي ولا رح فتشلك مواضيع ومين يلي قتل حالو ..مارح ذكرك عن افعالك لانك بتعرفي منيح انو نظرك ابوكي بالعالم مابتخيب ومن قلتلك يامنار هاد رح يبكيكي قلتي لاء..قلتلي يابي عمرا ما المصاري ماعملت سعادة ..وانا متاكدة رح شوف سعادتي معو..ودرتي ضهرك ورحتي..انا حاليا لا رح ناقش ولا عاتب انا رح نفذ..اذا بنتي ماوقفت على رجليها منيح..وما اخدت حقها ..وبقيت تندب حظا وتشكي وتبكي انا رح كوني الجاني الثاني عليها ..

 

منار :- حتى انت يابي

 

صابر :- حتى انا يا منار..

 

منار :- انتو معشر الرجال ..

 

صابر :- هيك نحنا مابنرحم..مابنرحم الست الضعيفة يلي بتوقع لتركع على رجليها ..لتبكي على عمر ضاع..

 

منار : – بس انا مو ضعيفة

 

صابر :- هاد يلي عم تعمليه ضعف..هاد ضعف ..الرجال بكره ا لمرا الضعيفة بدوس عليها وبمشي..مابستهوي البنت يلي بضحي كرمالو..بحب يلي هو بضحي كرمالا..بدك تقليلي شو فرقت عنك صوفيا…

 

منار :- صوفيا

 

صابر :- اي هاي يلي دخلتيها بيتك وامنتي على سرا وشديتي الضهر فيها..استغلت نقط ضعفك ..واخدتهن نقط قوة لالها..استغلتك واستغلت حزنك ومشاكلك وزعلك لتركعي لالها وتطلع فوق ضهرك..

 

منار : _ طيب انا شو بايدي اعمل..

 

صابر :- وقت تقرري تاخدي حقك رح تعرفي شو رح تعملي…

 

سجود :- منار ..

 

صابر :- فوتي سجود

 

سجود :- بابي هاي رفيقة منار..

 

صابر :- مين ..

 

سجود :- ريهام يلي بتشتغل عند عادل

 

صابر :- شو بدا هاي كمان مارح نخلص من عادل وقرفوا

 

سجود ؛- ما اعتقد هو باعتها لاني سالتا قالت سدقيني ماني من طرفوا..

 

صابر :- طيب انا رايح شغلي خليكي مع اختك..

 

سجود :-فوتي ريهام.

 

ريهام :- تسلمي..مرحبا كيفك منار ..كيفك حبيبتي انتي بخير..

 

منار :- ههه دخلك شو شايفة خير فيني..

 

ريهام :- ماتزعلي اللي ببعيك بالفول بعيه بالقشور وهو مابستاهلك اساسا بدي قلك شي انا يلي كنت ابعتلك رسائل وصور لالو مع يلي كان يحكي معهن من الزبائن سامحيني انا كنت بدي نورك على يلي بصير قبل ما تتفاجئ بمصيبة كبيرة..وبصراحة انا تركت الشغل معو..مافيني شوف هيك مهزلة بعيوني..مافيني اتحمل هاي المخلوقة اضلا تتصل على الصيدلية وتحاكيني بطريقة مؤذية هي بتعرف منيح علاقتي معك..

 

سجود :- ريهام اختي نسيت ومابدا تسمع شي عنو

 

ريهام :- انا اسفة ماكنت حابة افتح جروحاتا..انا كنت جاي اعتذرلا..بعرف يلي عملتو مو صح..

 

منار :- سجود اتركينا

 

سجود :- ابي قال

 

منار :- قلتلك اتركينا اذا سمحتي..وقفلي الباب..

 

سجود :- ..اوك……

 

ريهام :- ماتواخذيني

 

منار :- ولا يهمك ريهام..لاتشغلي بالك بشي..هو منيح ..انت شفتيه مبسوط..

 

ريهام :- بعدك بتحبيه..

 

منار :- مابعرف شو اقلك

 

ريهام :- انا شفت هالشي بعيونك لو مابتحبيه ما بتحرقي حالك كرمالو هيك..بس يلي عم تعمليه مانو منيح ومؤذي وسدقيني مابستحقك هو خسرك هو رح يندم عليكي رح يعرف قيمتك منيح ..

 

منار :- عم يلبس منيح ..

 

ريهام :- بصراحة اتغير كل شي فيه حتى اسلوبوا..تيابو ..اموروا..بس كنتي معو كانو تيابو منسقين لصيدلي ..هلاء كل لبسو متل يلي عمرن 18 سنة ..واسلوبوا سخيف.

 

منار :- وهي

 

ريهام :- كثير بسمعو عم يحكيها واخر شي فهمتو انو انتقل على بيتك هو وهي..

 

منار :- بيتي

 

ريهام :- اي سكن في بيتك انا ماجاي اقهرك ..انا بدي ساعدك

 

منار :- تساعديني

 

ريهام :- اي..انا مابدي ترجعي لالو..هو من اسبوع قابل اعمامك ليحكو معو ..

 

منار :- لحظة لحظة اعمامي حكيو معو..

 

ريهام :- فاتو بدهن يضربوه بس اتمالكو اعصابهن

 

على اخر لحظة ..كل يلي قالوه لالو..انو مصيروا تحت رجليكي ادوسي عليه..ومشيو ..

 

منار :- اعمامي انا ..ليش وشو دخلهن

 

الجزء الثالث .

 

ريهام :- باين انهن انزعجو كرمالك..وقت حكيو معو هيك انخطف لونو. واصفر ..وصاروا ايديه يرجفوا..وبلش يطالع مهدئات ويشرب ..ومن سألتو..

 

ريهام :- دكتور عادل شو صرلك

 

عادل :- مابعرف مابعرف..لازم رجع منار

 

ريهام :- وين ترجعها مافهماني شي

 

عادل :- منار رفعت قضية خلع..واهلها بدهن يطلقوها غصب

 

ريهام :- ليش شو في

 

عادل :- هي فاهمة غلط ..قصة صارت وماعم تفهمني

 

ريهام :- صاير شي كبير بيناتكن..بتحب ادخل فيه

 

عادل :- ممم مابعرف انتي بتعرفيها منار ..عقلاتا صعبين فيكي تروحي تحكي معها اني بحبا ومافي غيرا بملا قلبي..

 

….

 

(( خلص حديثو ..وكذبتو وانا بعرف كل القصة ..من وقت ما كان يحكي تلفون مع رفيقتك صوفيا ..وهو قفل الموبايل بوجها وبعد ساعة كانت بالمحل عم تصرخ عليه..وهو اخدا لجوا.. كنت سامعة حديثهن متل ماهلاء انتي عم تسمعيني..

 

صوفيا :- خلص هيك بدك تنهي علاقتك فيني بسهولة..

 

عادل :- صوفيا لازم تختفي كليا من حياتي هالفترة لوقت ما احسن حل هالمصيبة..

 

صوفيا :- وحملي..

 

عادل :- حمل شووو

 

صوفيا :- ابنك يلي ببطني..

 

عادل :- صوفيا انتي بعقلك شي هو انا ناقصك وناقص قصصك عم قلك مرتي رح تجن..ماعم تفهمي انو تفوت بيتها تلاقي رفيقتها بسريرها مع زوجها..وجاي تقليلي حامل..انتي جنيتي وبدك تبليني..

 

صوفيا :- هلاء انا بدي ابليك مو انت الوحيد يلي لمستني..اسمع لك عادل انت يلي جريتني لمصيبتك..واذا ماحليت قصتك قبل لاهلي يعرفوا بحملي..رح روح لمنار خبرها بحملي..

 

(( واتفاجأت بفتحة الباب بقوة..وكانت صوفيا انتبهت اني عم اسمعها ..بس هو شدها ورجع فوتها للغرفة..وطلع لعندي يفتش بين دراج الصيدلية لياخد لالها حبوب اجهاض..ورجع قفل الباب..وصار صراخهن يعلى اكثر واكثر.. انا قفلت باب الصيدلية..قبل ليجي حد من الزئاين وشوف هالمهزلة..ودقيت الباب..هون انتبهت عليه ..وتركها تغادر..كانت عم تزاورني نظرات فيها حقارة..

 

عادل :- ريهام قفلي الصيدلية انا راجع ع البيت ..

 

(( قلي هالحكي وانا فتت للغرفة كان شريط حبوب الاجهاض منثور بالارض..جمعتن الظاهر ما قبلت تاخد منهن شي..قفلت الصيدلية وارجعت على بيتي مصدومة من يلي اسمعتو ..ماكنت اتصور انو يعمل هيك بانسانة بنتو وعملت لالو كيان وصيدلية باسمو..ماكنت اتصور انو يبدل منار يلي الكل بشهد بحبها لالو بوحدة متل صوفيا لا راحت ولا اجت..تاني يوم ما اجا للشغل وعلى هالحال اسبوع كامل كنت دق لالو مايقبل يرد على اتصالاتي..وبعد 8 ايام بالزبط..اجا ..كان متغير .تيابو وقصة شعروا وطريقة كلامو..وابتسامة مزيفة..مشتت مانو عادل يلي بعرفوا..كان عم يحاول يجمع فيتامينات وادوية للحوامل..بعد ماغادر بربع ساعة كان تارك موبايلو.. وبلش على اتصال وماعم يقفل..ازعاج ماكنت بعرف اتعامل مع الزبائن من الاتصالات قربت للموبايل..وكان المتصل حبيبة عمري صوفيا..من حرقة قلبي ..قفلت الموبايل كليا..ومن طفيت من هون بلشت تتصل على تلفون الصيدلية من هون..

 

ريهام :- الو صيدلية عادل ..مرحبا..

 

صوفيا : اهلين حبيبي زوجي هون ..فيني حاكيه

 

(( كنت بعرف انها هي بس حبيت احرقلا قلبا..

 

ريهام :- منار. حبيتي كيفك سوري هو مو هون بس من يرجع بقلو حبيبتك منار دقت..

 

صوفيا :- اولا انا ماني منار..منار بح طارت فص ملح وذاب طلقا اندثرت انا صوفيا مرتوا الجديدة عروستوا ..😘

 

(( طفت بوجهي وانا من اسلوبا اندهشت معقول في انسانة بهاي الحقارة ..وياريتا اكتفت صارت تتصل ع الصيدلية متقصدة لتطلب مني خبر عادل انها عم تشتهي طلبات بدها عادل يجيبهم. لانها حامل .ويوم عن يوم هالشي زاد عن حدو..واخر مرة قلتها لو سمحتي اذا احتجتي شي اتصلي على رقم عادل هاي صيدلية مانو مكتب خدمات..وقفلت السماعة بوجها..وعادل ماقصر معي وقتا كانت مخبرتوا اني عم ارفض قلو امور طارئة ..وبعدها قدمت استقالتي ..وجيت لعندك هون..

 

منار :- 😑

 

ريهام :- منار شبك والله ماقصدي اذيكي

 

منار :- لاء بالعكس انتي ريحتي قلبي .انتي شلتي الوجع عنو..انا كنت بموت كل يوم بس بس

 

ريهام :- انا مابعرف اذا كنتي بتعرفي انها حامل

 

منار :- هلاء اسمعت منك..بس تعرفي شي ..انا بدي ترجعي للشغل

 

ريهام :- لاء دخيلك اعفيني

 

منار :- ريهام هاد تعبي وبدي ترجعي لالو..وانا بدي ارجع

 

ريهام :- مافهمت لوين

 

منار :- لعادل

 

ريهام : بدك ترجعي لعادل

 

منار :- اي

 

ريهام :- منار هاد اذاكي وعذب قلبك وغدر فيكي شلون بدك ترجعيلو

 

منار :- اذا رح اتركلو الجمل مابحمل رح ينتصر عليه ..وهي تاخد يلي كانت بدا اياه

 

ريهام :- مافهمت

 

منار :- مارح حد يفهم عليه يلي ايديه بالنار مو متل يلي بالمي

 

ريهام :- شو بدك تعملي فهميني

 

منار :- ولا شي..مارح اعمل شي..

 

ريهام :- لاء لاتعملي بحالك هيك انتي بدك تدفني حالك معها بدك تتعذبي كتير..

 

منار :- انا بحب عذابي..

 

ريهام :- مابعرف انتي شو في بعقلك بدك اضلي هيك تحت تحت مسمى انك بتحبيه.

 

الجزء الرابع..

 

منار :- الحب بعمروا مابموت والشرع حلل لالو ☺

 

ريهام :-مابعرف انتي شو في بعقلك بدك اضلي حبيسة ذكريات وقصص لمتى..لك اللي راح راح حاجي تاكلي بحالك على واحد مابيسوى.لك هاد باعك وباع عشرة عمرك وابنو يلي بكي يوم ماشرف ع الدني وحمل اسمو..لاتقليلي وتعيدي كلامو قال الشرع حلل لالو يتزوج..لك طز فيو..واللي فهمو انو الشرع حلل يتزوج ويقهر مرتوا يلي مافيها عيب ..

 

 

منار :- تعرفي ياريهام انا ماقتلني شي غير انها رفيقتي ..رفيقتي يلي استقبلتا في بيتي..رفيقتي يلي اكلت من طبقي ونيمتا بفراشي..لك قديش كنت غبية من تقلي مادام زوجك بالشغل بجي بنام جنبك بسليكي بالسهرة كنت مفكرا اختي لك طلعت الحقيرة بتنام بفراشي لتشم مكان نوم زوجي لك الله يلعنها

 

ريهام :- اذا هي الله يلعنها وهو شو..انا مافيني اعملك شي اكذب عليكي لو طبطبت عليكي وواسيتك بكم كلمة ومافيني ارجع اشتغل معو .انتي لازم تقوي حالك من جواتك بدون ماترجعي لالو ..اي خلص هلاء وقت الندم والندب..هلاء صار وقت تقوي من جواتك وتنتفضي على وجعك لملمي كرامتك يلي اتبعثرت وحاجي اذلي حالك لو ماشافك ضعيفة ماقلتي لحالك اتزوجها لانو الشرع حلل لالو .

 

منار :- مابعرف مابعرف..

 

ريهام :- لاء بتعرفي جربي شي مرة انتفضي رح تلاقي كل شي جواتك عم يوجعك اندثر وراح ..جربي كابري على حالك ..وانسي الدني ما انقطع منا الرجال..لك الكل بتمنى ينول رضاكي مابعرف على شو قاتلة حالك . بقلك المثل اشلحي صرماي والبسي صرماي لتلاقي شي يناسب رجلك.

.على شقفة صيدلي لا راح ولا اجا عم تبكي وتندبي حظك ..انتي بنت صابر بيك..بنت اكبر تاجر اعمال بالبلد. وهاد الصيدلي..بعد ما اخد يلي بدو اياه منك وكبر من لحم كتافك وكتاف بيك ..دفشك برجلو باسم انو حبها..وصديقتك شو بكيت عليكي لاء ضلت تسلل بحياتك لتعرف مشاكلك واسرارك وشو نقطة ضعفك ونقطة ضعف جوزك..يعني عجبك من قلتيلا صالحيني مع زوجي انا يوما كنت معو واقفة جنبو ..لك فاتت الصيدلية قالت بدا تحكي معو ..واول ما شافتو اتفاجأت فيه .ماسدقت حالا انها عم تحكي معو ..وبكل حقارة قالت بدا تحكي معو بانفراد ..وفاتو لجوا وقعدو اكثر من ثلاث ساعات..وشو اخرتها بتتصل عليكي وبتقلك ماقبل ..كذابة انا كنت عم اسمع كل شي..هي ما جابت سيرتك ..كل همها تسأل عن حياتو العملية والخاصة وتحكي عن حالا.. وبالاخر رفيقتك يلي فاتت تصالحك مع زوجك يلي بتحبيه ..حبها وحمل منها واتزوجها وتركك..

 

..

 

منار :-بربك حاجي تعذبيني..

 

..ريهام :-انا ماعم عذبك انا عم فيقك على كذبة بدك تعيشي فيها للابد..بدك تدفني حالك تحت مسمى الشرع.. انتي مجنونة شي..بدك تقتلي حالك بايدك

 

منار :- لاء انا مابدي اقتل حالي..الاموات مابموتوا مرتين..

 

ريهام : يعني انتي بدك ترجعيلو كرمال

 

منار :- طبعا ..

 

ريهام :- بدك تتحملي كثير

 

منار :- مانو مهم بس مارح عيشها بخير بهناي وتعبي ..

 

ريهام :- بس

 

منار :- ارجعي لشغلك ريهام ..انا بدي صير اعرف كل كبيرة وصغيرة عنو

 

ريهام :- واهلك

 

منار :- رح تكون مواجهتي لالهن اصعب من المرة يلي قبل ..بس هالمرة راح حاربهم كرمال رجع كرامتي يلي كانو خايفين عليها..انا رح رجعها بايدي

 

ريهام :- وبيك واعمامك

 

منار :- رح يرضوا

 

ريهام :- رح ترجعي ذليلة

 

منار :- بس رح رد كرامتي

 

ريهام :- بدك ترجعيلو هريبة بدون ما هو يجي ياخدك

 

منار :- اي ليتأكد اني ضعيفة وبقبل باي شي حتى لو كانت رفيقتي مرتوا

 

ريهام :- خايفة عليكي

 

منار :- لاتخافي من الاموات..مابخوفوا سدقيني..خافي من يلي قلبن وضميرن مات..

 

ريهام :-حربك طويلة ومتعبة

 

منار :- رح اصمد واتحمل

 

ريهام :- خايفة تنهزمي وتنهاري وتخسري كل شي

 

منار :- اعطيني رقمو لانو اهلي غيروا خطي كلو ..وحذفوا رقمو

 

ريهام :- اهلك رح يقولوا اني انا وصلتك لالو

 

منار :- لاتعتلي هم..

 

ريهام :- طيب انا رح امشي رح حاول روح الشغل الصبح على بكير..

 

(( اخدت رقم عادل من ريهام وانا عم حاول مترددة اتصل او لاء اجازف وافوت هيك طريق ولا ضلي هيك واقفة قبال مرايتي عم عاني..بس طبعا مارح ارجع ذليلة رح ارجع بكل قوتي..بس اهلي ..طبعا مارح خبرهن..اهم شي اخلي ابي يثق فيني..مرقت الايام وبلشو اهلي يلاحظوا على ملامح وجهي التغير ..صرت فيق اقعد معهن ع السفرة ..اقعد بسهرات امي..وتابع مسلسلات مع اختي..وايام اطلع مع ابي ..على شركتو..شغلات كتير حاولت رجع فيها ثقة اهلي اني نسيت وماعاد يهمني عادل وقصصو بس هالشي مانو صحيح انا مانسيت ..انا مابنام الليل وانا عم عاني وافكر واتقصص من ريهام اخر اخبار عادل…

 

ريهام :- كيفك منار طمنيني عنك

 

منار :- منيحة صرت شو صار معك مع مندوب الادوية سيف

 

ريهام :- حكيتو وقلي ماعندو مشكلة..بس بدو كتير على هيك شي..

 

منار ؛- مافي مشكلة.. شو مابطلب ماعندي مشكلة..انا بدي الستيكرات تنطبع على الادوية انها من شركة منار صابر..

 

ريهام :- هو ماعندو مشكلة وموافق بس قال بس على صيدلية عادل …

 

الجزء الخامس..

 

منار :- تمام ..اي انا بس بدي اياه لصيدلية عادل..

 

ريهام :- هالخطوة كثير قوية ..

 

(( ومرق يومين بعد تنفيذ خطة كتابة اسمي على علب الادوية..كانت ريهام عم اتابع ردة فعل عادل وحركاتو وقت يشوف اسمي على الادوية..

 

عادل :- ريهام ريهام

 

ريهام :- يالا في مريض بس بدي اعطيه حقنة فلاجين ..

 

عادل :- هاي الادوية متى اتغيرت اسم الشركة عليها

 

ريهام :- حتى انا اتفاجأت فيها واتصلت على المندوب عم يقول انو جميع شركات الادوية صارت تحت اسم منار..

 

عادل :- شو يعني صابر اشترا لالها كل شركات الادوية

 

ريهام :- مابعرف بس الظاهر هيك

 

عادل :- دقيلي على المندوب قدامي..

 

(( وطبعا كانت الجواب نفس ماقالت ريهام انو جميع شركات الادوية عم تصب تحت اسم منار..هالشي حركت غريزة الشجع يلي بقلب عادل..بس ماكان يحسن يطول العنب..لانو محروس..تصرف اعمامها واهلها كان مخوفوا حتى يبعتلا رسالة..بس هالرسالة اجتو لعندو..

 

منار :- مرحبا استاذ عادل..الاولاد حابيين يشوفوك عم يسألو عنك..اذا حابب تشوفهم حاول تاخد معي موعد لانو عندي اشغال كثير يفضل بايام الاجازات..

 

(( كانت هالرسالة البسيطة مثل رد استغاثة على مشاعر عادل ..وهو مانطر بالاجابة..

 

عادل :- اي مشتاق كثير..حابب شوفهم يفضل بالقريب العاجل..

 

منار :- الجمعة بالمسا بمطعم اللايت..

 

(( مطعم اللايت مطعم كثير فخم مابزورو الا تجار الاعمال والوزراء ..وانها تعطيه موعد بهيك مكان ..بالنسبة لشخصية مثل عادل شي كان كثير كبير عليه..هيك مكان ماكان كثير مكلف لعائلة مثل عائلة صابر ..

 

سجود :- اووه تقبشيني شو هالتياب هاي..والشعر ..والميك اب..ماعرفتك منار..معقول بس الوحدة تتحرر بتصير احلا

 

منار :- اي طبعا الرجال مثل شي حبل مشنقة ملفوف ع الرقبة

 

سجود :- يعني افهم انو المقابلة هاي مافيها رجال..

 

منار – فيكي تقولي لسه ماكشفت شي احتمال يكون شبة رجال واحتمال يكون رفيقة قديمة ..😂😂

 

سجود :- اها كلها الغاز ..يعني معقول هيك تياب وهيك اناقة تروح لشبه رجال

 

منار :- ممكن..مابدي اتأخر ..انتبهي على الاولاد حبيبتي سوسو

 

سجود :- مابدك حدا يوصلك

 

منار :- لاء اخدت سيارتك..

 

سجود :- رح تسوقي صرلك زمان

 

منار :- اي اشتقت سوق سيارة..بس لارتب اموري رح جيب وحدة..

 

سجود ؛- طيب انتبهي عليها ..دخيلك ..بعدا جديدة

 

منار :- اها صحيح انسيت انها بنتك يالا مارح اتاخر بوسيلي البابا لو سأل عني..

 

(( كنت حاسة حالي لاول مرة رايحة قابل عادل وكأنو اللقاء عم يعيد نفسو..بس مع الشخص يلي حاليا بدو يتحكم بعقلو مو بقلبو ..بدو يتحكم بذكائو مو بطيبة قلبو..اتقصدت وقف سيارتي ليجي القرسون يفتحلي الباب..كنت شايفتو ناطريني بسيارتوا القديمة بطرف الشارع لاوصل انا خوف ليتكفل مصاريف الدعوة..هالمرة مانزلوا اطفالي معي..طلعت على اول خطوات الدرج ..وكان عم ينادي عليه خلفي..

 

عادل :- منار ..منار..

 

(( ابتسمت نصف ابتسامة ..ودرت ضهري .وانا عم متفاجئة بمنظروا..لابس اخر طقم كنت مجهزتو بايدي ..

 

منار :- اووه نسيت سوري

 

عادل :- متغيرة

 

منار :- نسيت اني على موعد معك كرمال تشوف اولادك

 

عادل :- مممم ليش انتي واعدة حد تاني

 

منار :- هيك شي..نسيت اني عاطيتك موعد بس الاولاد مو معي حاليا..

 

عادل :- فيني اقعد معك ..حابب احكيكي

 

منار :- ممم حاليا ..لاني على موعد فوق..

 

عادل :- فينا ناخد طاولة شي 10 دقائق

 

منار :- بس انت مو عامل حسابك ..يعني ماتواخذني دكتور عادل..طقمك مابناسب هيك مكان.

 

عادل :- عفوا ..مافهمت..

 

منار :- حابب نروح لشي مطعم شعبي ..عادي ماعندي مشكلة

 

عادل ؛- منار

 

منار :- اها خايف مرتك تشوفك اي بعتذر لانها من رواد هاديك المناطق..ع العموم ..رح ناخد طاولة بالطابق الارضي ..لشي 10 دقائق ..رح ابعت رسالة تأخير فيك تتفضل..

 

(( كان وجهو عم يتغير الوانو الاهانة يلي رسمتها على ملامح وجهو كانت اسخف شي ممكن اعملو كبداية ترحيب بحياة الجحيم يلي رح يعيشها معي..امشي وانا راكزة ضهري ..وانفي بالسما..مشيت لاني انا منار بنت صابر. يلي فنت عمرها لتاكل خبز و ملح مع رجال ماصان الملح..يلي قبلت بالقلة كرمال حبها الابدي ..كنت مستمتعة بجبروتي يلي حسيتو مات مستمتعة بقيمتي يلي اندفنت..وقفت ناطرتوا ليسحب لالي الكرسي..يلي كان معتاد مايقعدني عليه لو رحنا شي مكان ترفيهي..

 

منار :- اها نسيت انك متعود ترفش بالارض لنقعد

 

عادل :- كانت ايام هنا وسعادة انا مابحب الرسمياات

 

منار :- هاي مو رسميات هاد اتيكيت انت فاقدو..كيفو ابنك يلي ع الطريق

 

عادل :- شلون عرفتي

 

منار :- حبيت بارك لالك لانو سمعتها لمرتك ع كل لسان شلون حملت قبل الزواج

 

عادل :- من مين سمعتي هيك

 

منار :- من اقرب الناس لالك خبروا الخدامة عنا..وهي خبرت امي وامي كانت عم تحكي حديث عابر عنك وسمعتا فحبيت بارك لالك..

 

عادل ؛- منار

 

منار :- اها في حديث على لسانك

 

عادل :- حابب ترجعي اشتقتلك

 

منار :- حتى انا اشتقت لبيتي

 

عادل :- بدك ترجعي ع البيت 😲

 

منار :- متفاجئ..

 

الجزء السادس..

 

(( شي طبيعي يتوقع رجوعي لانو عهدني انسانة ضعيفة وميتة على تراب رجليه ..ابتسم ابتسامة انتصار ..وقرب ايديه لعندي يغني مواويل الكذب يلي كنت سدقها..

 

عادل :- انا بعرف كنت بعرف ومتأكد من احساسي مستحيل تكرهيني واللي بحب مستحيل مايكره بعرف انك سامحتيني..انا بعرف قلبك الابيض انا بحبك منار انتي حبي الاول والاخير بعرف مافي مبرر يبرر غلطي معك بس هي لعبت بحياتي ومشاعري واتسللت لعندي بغيابك مابعرف شلون صرت هيك ..كنت ضايع..ومن فقت لقيت حالي بهاداك الموقف ماعرفت اطلع منو هددتني تخبر الكل بحملني..جنيت..خفت اخبرك..بس اناي سبقتيني وعرفتي ..دخيلك انا شو مابدك رح اعمل..بس بدي تصبري عليه لتولد واخد الطفل وطلقها..

 

منار :- اطلقها وتاخد ابنها حرام مابصير

 

عادل :- مافيني ما ارجع ثقتك انا بدي اعمل المستحيل لارضيكي..

 

منار :- طيب بنحكي بالموضوع

 

عادل :- طمنيني خليني روح نام مرتاح ..قليلي متى حابة ترجعي..مابدك ترجعي لبيتك انا متفهم يلي شفتيه وبعرف انك كارهة ترجعي توفتيه انا بوعدك استأجر بيت تاني لالنا انبلش من الصفر فيه

 

منار :- لاء انا حابة ارجع لبيتي مو مشكلة مع الايام بنسى

 

عادل :- بس البيت

 

منار :- شبو

 

عادل :- لاء مافي شي رح روح رتب كل شي لنحتفل باول ايام حياتنا سوا..نبلش من اليوم

 

منار :- اها

 

عادل :- منار ..انتي مين بدك تقابلي..فوق في حد بحياتك..منار اذا هالشي موجود لا تعمليه انا حبك الاول والاخير ولاتسمحي لحد ينزع حبك لالي..

 

منار :- يلي فوق ابي..ورفقاتو رجال اعمال..وعنا اجتماع عشا كرمال شركتي

 

عادل :- شركتك

 

منار :- عن اذنك اتاخرت كثير ..

 

(( تركتو ومشيت بعد ماحاسبت بنفسي الطاولة مع ترك بقشيش بنصف يوميتو وانا حاسة انو من فرحتو هالكون ماعم يسعو.. كانت لحظات نجاح مبهرة حققتا باسرع وقت.فأنا ست الضعيفة يلي رح تخلي هالكون ..متر بمتر على روحو ..

 

منار :- سجود ابي سأل عني

 

سجود :- اي وقلتو راحت تقابل رفيقتها..انت مطولة

 

منار :- يعني شي شوي..حابة تتعشي جبلك معي عشا

 

سجود :- مممم متل شو

 

منار :- ممممم اقلك فكري وابعتيلي ع الموبايل ناطرك .

 

((حاولت قد مافيني اتأخر كرمال اذا كان بعدو ناطرني يروح..هالوقت كان عم يمر..وانشغالي بالموبايل وبحديثي مع ريهام ..قاطعي على طاولتي شخص غريب.

 

…انا شايفك قبل هيك

 

منار :- عفوا

 

..اسمحيلي قاطعتك بس شفتك لحالك من وقت ..ودققت بملامحك وكأني شفتك قبل هيك. وحبيت اتاكد..انا سامر مالك مطعم اللايك واكبر المطاعم بالبلد..

 

(( كان شخص جرئ ثلاثيني العمر..طويل .وعليه ملامح رجولية صعبة..سحب الكرسي وقعد مقابيلي بدون ما حتى احكي حرف وانا منبهرة من اصناف الرجال يلي عم قابلها..

 

منار :- ههههه

 

سامر :- اكيد تصرفي ضحكك

 

منار :- مو طبيعيين

 

سامر :- ليش كم واحد انا

 

منار :- قصدي تصرفات الرجال غريبة..يعني ما بتعتقد انو هلاء اكون بانتظار مثلا عشيقي او زوجي او اخي او حتى ابي.

 

سامر :- واذا خبرتك انو بيك طلب مني اكرمك .

 

منار :- بابا

 

سامر :- معقول في حد بالبلد مابيعرف صابر بيك وعائلتو.

 

منار :- اها افهم هلاء انو اجتني توصاية من ابي.

 

سامر :- فيكي تقولي اي ولاء اي لانو بيك اتصل ليطمن ع وجودك..ولاء ..لانو مابحتاج توصاية..نحنا يلي بدنا توصاية.. تشربي شي.

 

منار :- قهوة مع حليب بدون سكر…

 

سامر :- تكرمي ..فرصة كتير رائعة اني قابل منار صابر..

 

منار :- حتى اسمي عم تعرفوا

 

سامر :- وهل يخفى القمر

 

منار :- وشو كمان بتعرف

 

سامر :- بعرف انو هلاء انا قاعد لاول فىصة جميلة بحياتي مع شخص القعدة معو تسوى عمر

 

منار :- قلت عنك جرئ

 

سامر :- مابخاف الباطن بظهروا المهم شو اخبار اطفالك..

 

منار :- لاء هيك كثير

 

سامر :- عادي الاشخاص المهمين من الواجب نعرف اخبارهن بالتفصيل..مثلا هاد الموبايل..

 

(( سحب موبايلي ..وبلش يكتب عليه ارقام وانا متفاجئة من افعالو اتربطت وماكنت عارفة اظهر ردة فعل تجاهو..

 

سامر :- هاد الموبايل كثير فخم واجب يكون رقمي محفوظ عليه..اها دق موبايلي.. وهيك سجلت رقمك عندي منار .

 

منار :- انت هلاء اتصلت من موبايلي لعندك لتحفظ رقمي

 

سامر :- انا لاء مستحيل.. 😊اجت القهوة..

 

منار :- طيب طال الوقت اتشرفت بمعرفتك استاذ سامر

 

سامر :- بدك تمشي..اكيد المكان ماعجبك اذا بتحبي كل شي بنغيروا من ديكور لاضاءات لكل شي اذا هالشي بخليكي تقعدي وقت اطول كمان

 

منار :- مجنون..لاء انا اتاخرت وحابة ارجع ع البيت عن اذنك

 

سامر :- طيب بتحبي وصلك

 

منار :- لاء يسلمو معي سيارتي.

 

(( ماكان عندي اهتمام للي صار مع سامر..ولا اعطيت ردة فعل او تفكير فيه..لانو شي عابر ومضى ..شغلت سيارتي..وانا عم راقب وضع الشارع اذا بعدو عادل موجود او لاء..بس لحسن الحظ اكيد مارح تسمحي لغيابو ست صوفيا كتير..اتسطحت ع سريري بعد مشوار وانجاز عظيم وانا عم فكر بكمية الدنائة يلي كنت مغمضة عيوني عنها في عادل..

 

الجزء السابع..

 

دقائق وكان موبايلي عم تصلو رسائل .. رسالتين …رسالة من سامر وهاي اهملتا ..وما اضطريت افتحها..ورسالة كانت من عادل يلي اول ما شفتا اتلهفت لاعرف شو مكتوب فيها..

 

عادل :- تعرفي مابتصوري قديش فرحان ورجعت الحياة لقلبي..من شفتك ..انا ماحسنان نام من فرحتي..رح اعمل المستحيل لاسعدك واعوض عن زعلك انتي اميرتي.. يا احلى زوجة بالكون..

 

(( كل كلمة قرئتها حسيت بطعم الاهانة لالي ..حسيت اني شخص عم ينداس عليه بسهولة..هالرسالة زادتني بؤس وتعبتني رغم كل تفكيري وتخطيطي.. مابتصور ياعادل شلون قتلتني وقطعت شريان الحياة عن قلبي ..وموتت ضميري تجاهك..رغم انك بي ولادي ..

 

(( دفشت الموبايل بالارض وانا عم ابكي ..ومابعرف شو صرلي فجأة تغير كل مودي ..وارجعت مثل قبل واسوء رجعت اقعد مقابيل المراي اتصفن ملامح وجهي واودعها قبل لترجع تذبل من تاني..

 

سجود :- منار بعدك فايقة..

 

(( كان صوت سجود مثل يلي فيقني فجأة على حالي قمت وفتحت لالها الباب..وهي عم تضحك وتطلب مني سامحها لاني خبرت ابي على مكانها..جاملتها وغادرتني..ارجعت اخظت موبايلي لاقرأ رسالة عادل بس شي خلاني ما ارجع افتحها..شي خلاني افتح رسالة سامر يلي كانت طويلة وكلا حكي ..ماكان عندي اي لهفة لاني اقرئها بس بدايتها وكتابة اول سطر خلاني غصب عني كفيها..

 

سامر :- وقفي قدام مرايتك..واطلعي بعيونك..شوفي ملامحك البريئة اسأليها بستحق اني احزن..بستحق عيوني يكونوا كلهن وجع هيك..حتجاوبك لاء..انا ماحد بعتني لالك وانا شخص ماني هيك.شفتك صرلك ساعة ونصف لحالك عم تتأملي ملامح ووجوه الناس..عم تكذبيهن وعم تنعتيهن جواتك انا ماني دكتور نفسي..لاء انا انسان عادي مثلك ..بس صارم شوي..انا ماني غزلي اتعمدت اتجرأ وغازلك..واقعد بالقوة مقابيلك..لاعرف منيح انو معقول هالحزن يحسن ينال هدفو منك..بتمنى تنعاد زيارتك لعنا بدون هالحزن يلي بعيونك ..المرسل سامر..

 

(( بدون اي ردة فعل حسيت بفرق الحكي..بين الانانية والكذب ..وبين الكرم و الصدق ..شغلات كثير وصفتهم هالرسالتين فيني رسالة افقدتني مشاعري ورسالة رجعتهم للحظات.مرقت الايام وانا كنت متدهورة وماعرفاني شلون بدي ارجع عيش مع عادل..وشلون بدي واجه اهلي بتصرفي ..

 

منار :- حابة اغير كم يوم

 

صابر :- اي روحي غيري خدي اختك معك

 

منار :- لاء حابة اسافر انا واولادي

 

صابر :- بس ابنك

 

منار :- ماكتير عم يدقوا بروضتو بعدو صغير على الدراسة..

 

صابر :- بس لحالك مع الاطفال مارح تنبسطي

 

منار :- بلا

 

صابر ؛- وين حابة احجزلك تسافري

 

منار :- حجزت ..ورتبت اموري

 

صابر :- حاجزة وامورك كلا تمام ليش جاي تبلغيني

 

منار :- حبيت يكون عندك خبر

 

صابر :- ماكان مهم طول عمرك عم تعملي يلي براسك..رحلة موفقة ..اذا احتجتي شي بلغي امك..

 

(( بعرفها لردة فعل ابي كل مابزعل مني بترك المكان وبروح ..وكان كذبتي مجرد سفر ..وهيك اثرت عليه..شلون لو بيعرف اني رح ارجع لعند عادل..

 

عادل :- واخير حسيت الوقت سنين وانا ناطر..اشتقتلكن يابي..تعو تعو

 

منار :- نحنا رح نبقى هون

 

عادل ؛- لاء رح نروح على بيتنا

 

منار :- تمام ..

 

عادل :’ وين اغراضك وشنتاية تيابك وين سيارتك مارح نرجع بسيارتك

 

منار :- ليش وين سيارتك

 

عادل :- بعتها ..كثير كانت سيئة

 

منار :- انا تركتا بالشركة. وحاليا ماني بحاجتا خلينا ناخد تاكسي

 

عادل :- اها بصير ليش لاء..

 

(( فتت بيتي بعد غياب 3 شهور..حسيت حيطانو طبقوا ع صدري نفس الصوت عم اسمعو ..الضحكات المشهد كل شي كنت عم شوفوا متل ماهو قدامو بيتي معجق بريحة صوفيا كل شي مغير من مكانو الديكور السوقي وامور كثير حبت صوفيا تثبتلي انها كانت هون لتنزع لالي حياتي..بس انا تركت كل شي بمكانو..حتى صورتي يلي فوق السرير..كان عم يركبها عادل رغم انها كانت رسالة بتقتل وقت كانت مقلوبة..تركت كل شي بذكرني بغدروا فيني بكل مكان..اتمنيت لو ريحة صوفيا ماطلعت من البيت ليضل قلبي قوي واحسن رجع حقي..

 

عادل :- نورتي بيتك حتى هو اشتقلك

 

منار : تسلم

 

عادل :- مابعرف شلون وجه اهلك هلاء ..طول عمرن بدهن يفرقوني عنك..بس ماقدروا الحب اقوى شي بالكون..

 

منار :- اها

 

عادل :- الاولاد نامو رح فوتهن لغرفتهن

 

منار :- كثير شغلات متغيرة بالبيت

 

عادل :- كل شي متل مابتحبي رح يرجع..

 

منار :- كأنك مغير السرير

 

عادل :- اها اي كرمال ماتزعلي واضلك تذكري

 

منار ؛- كان معتقد انو بعدني غبية..هالسرير كان سرير صوفيا يلي رفضت تنام ع سريري ..مكان خدش اضافرها على خشب السرير بتشهد على تفكيري..كانت ليلة انحسبت مثل ليالي القبر..

 

منار :- فيك تبعد عني ..بس شوي

 

عادل :- انا

 

منار :- حاليا مابدي ومالي نفس حاول تكون بعيد عني ..

 

عادل :- اسف ..بس والله بدي نسيكي

 

منار :- بس انا مابنسى. وهالشي مو بسهولة انساه لو سمحت لاتحاول تقربني الا من جواتي اتقبلك

 

عادل :- انتي ماعدتي تحبيني

 

منار :- هالشي مالو علاقة بالحب

 

عادل :- طيب ليش عم تصرفي هيك ليش عم تبني حواجز بيني وبينك

 

منار :- لاني ماعم سدق انك خنتني معها

 

عادل :- قلتلك وحياة عيونك كانت ساعة شيطان

 

منار :- معقول حساسك معها مثل يلي كان معي

 

عادل :- لاء بس لحظة نسيان

 

منار :- حتى ولو

 

عادل :- قليلي شو فيني اعمل لانسيكي وبوعدك لاعمل المستحيل

 

منار :- كون معي وجنبي ولا تتركني

 

عادل :- وعد ما اتركك

 

منار :- وصوفيا

 

عادل :- انتي الاساس وهي لازم تتحمل

 

منار :- وحملها

 

عادل :- مارح ينقصا شي ..اذا ماعجبها تروح تجهضو

 

منار :- بدك تتحمل ذنب طفل

 

عادل :- هاد خيارها

 

منار :- طيب انا تعباني بدي روح نام جنب اولادي

 

عادل :- مابدك تبقي نايمة جنبي

 

منار ؛’مو هلاء عادل مو هلاء مانو وقتو ..

 

عادل :- طيب اسمعي اسهري معي شوي خلينا نعيد ايامنا وسهراتنا

 

منار :- عندي شغل بكير

 

عادل :- رح ترجعي لشغلك

 

منار :- لاء عندي شغل بشركتي

 

عادل :- طيب انا بروح عنك وبساعدك

 

منار :- عادل ..هاي الشركة باسمي ..يعني هونيك ماحد بيعرفك

 

عادل :- انتي بتعرفيهم عليه..وانا مارح تعبك بأي شي

 

منار :- لا معلش شغلي وبعرف اتصرف فيه..

 

(( تركتو وفتت لغرفة اولادي وانا النوم ماعم يزورني الاصوات ماعم تبارحني الضحكات..المشاهد ..الريحة كل شي عم يقتلني عم يخنقني شو اعمل ..شو اتصرف ..اقتلو وبري قلبي بس هو هيك رح يرتاح..وهي مارح يهمها شي انا يلي رح عيش اتعذب..مرقت الساعات وانا على حالي عم اتقلب ماعم احسن نام..لوقت ما اسمعت خطوات رجلين بقلب البيت..غطيت تحت فراش ابني وعملت حالي نايمة..كنت حاسة انو واقف بجنبي..عم يتامل ويتأكد اذا غاطة بالنوم او لاء..وبلحظة اختفى ..رفعت راسي لاتاكد لحظات وبلش حس على حركتو باتجاه الباب..قمت من مكاني..كنت بعرف انو رايح لعندا..

 

منار :- عادل فيك شي

 

عادل :- منار انتي فقتي

 

منار :- فيك شي

 

عادل :- اها كنت بدي قفل الباب

 

منار :- ليش لابس تيابك واخد جاكيتك كنت طالع شي..

 

يتبع..تحت