#صرخة_خرساء_بقلم_كنانة_غميان
(عن قصة واقعية )
من سلسلة* قصص من حياتنا الواقعية *
بالبيت …بنص الليل ..ضو اللمبة دير الصغير بغرفة البنات شغال ….والحكي الكتير والقليل ما بيخص …خاصة بهل الليلة الوحيدة اللي عم تحلم فيها هلا حتى تنام ببيت رفيقتها منار ….والحديث يطول ويطول …والهمسات الخفيفة طالعة ع الهسي …حتى ما يسمعهم حدا برا : ….
هلا : ههههههههه يحرء حريشك رح موت من الضحك …حاجتك نكت آخر هالليل شو صرلك
منار: لك سمعي هي …قال كان في واحد حب …والتاني تحاميل
هلا : هههههههه آه خواصري ….
منار : سمعي هي …قال ليش القلب بيدق !!؟
هلا : ليش !!؟
منار : حتى المعدة ترقص ههههههههه
هلا : منشان الله خلص ….دمعو عيوني وعم أعصر حالي بالضحك حتى ما تفيق أختك الصغيرة او حتى تحس عليي أمك ….بتحلف بعدين ما أرجع لعندك ها …..
منار : ما بتتخيلي أديشني مبسوطة فيكي يا هلا بنومتك عندي …..يا الله مالي عاطية فرحتي لحدا
هلا : والله مو قدي يا منار ….على فكرة لو ابوكي موجود …مستحيل أعلي يوافقو إني نام عندك …حتى لو كان عندك أخوات صبيان او شباب …مستحيل يخلوني فكر تفكير نام عندك …..لك شو خطرلك تحكي مع امي وابي بالموضوع …يحرء ديبك شو انك بنوب خالصة
منار : ههههه اشتهيتك تنامي عندي وين الغلط يعني …وبما أنو أمط وابوكي ما بيوافقو قلت بحكي أنا معهم …يعني مافي منها خسارة …..
هلا : هنن كتير حريصين عليي …خاصة بهل الشغلة …كان عندي رفيقة كتير عزيزة على قلبي …وماخلوني نام عندها قال لأنو أخوها شب وبينام بالبيت عندهم ….
منار: معهم حق يا هلا يخافوا عليكي …هالحياة بتخوف …خاصة بهيك أمور ….
هلا : حتى انتي يا منار …معقولة اللي عم تحكيه ….
منار: يعني ما تنسي نحنا ما عدنا صغار …كل وحدة فينا هلأ بتقدر تفتح بيت …وعين الدنيا كلها علينا ….خاصة لأنو نحنا بنات …وحلوين …ما في شي بعيبنا ..
هلا : اي صح أهم شي لا خرسان ولا طرشان .ههههه……منار !!!؟؟؟؟ شبكي منار …بشو صفنتي …
منار : بخالتي ….
شبها ؟؟؟
لما ذكرتي سيرة الخرسان ..تذكرتها
ليش خالتك خرسا ؟؟؟ آسفة ….ماقصدي …
لا أنتي ما دخلك …بس خالتي زعلانة عليها كتير يا هلا ….
ليش ..شبها ……
هي بالأصل مالها خرسة ….
اوف …أنا بطلت أفهم شي ….!!؟
رح قللك بس بيني وبينك ومت بيطلع هالسر لحدا ها
خلص سرك ببير قولي ….
منار: هاد يا ستي خالتي صار معها شغلة لا بتحط لا بالعقل ولا بالكف ….
كيف بقى ….ماعم افهم عليكي منار …شبكي تلبكتي هيك !! قوي قلبك لأفهم شو السيرة مظبوط
منار : قصة خالتي يا هلا …بلشت بعد ما تجوزت …..وهي حلوة كتير وأصغر أخواتها ….
ليش أديش عمرها وقت تجوزت !!؟
تجوزت عمرها ١٧ سنة
ييي كتير صغيرة ….
اي صغيرة …بس الفكرة أنو أخدت شب حلو متلها إذا مو اكتر …حط عينو عليها …وإلا بدو يتجوزها ….
يعني عن حب
اي بيكون ابن جيرانهم بالحارة …طلع كل يوم بيتقصد يشوفها حتى ويلحقها ….ولما دري جدي …بطلها من المدرسة …وهداك رح يجن جنانو ..لهيك بعت أهلو وخطبوها وبعد الف واسطة مشي الحال …وتمت هالجوازة ….
هلا : ماعم أفهم …خالتك خرسا …كيف قبل فيها
هون القصة ..خالتي ماكانت خرسا ..بالعكس عليها منطق وحكي بيجنن وصوت كتير حلو….
لكن ؟؟؟؟! كيف صارت خرسا
جاييتك بالحكي ….بعد ما تجوزت خالتي الصغيرة ….توفت ستي بعد( ٦ )شهور ….كتير زعلنا وانحرق قلبنا على ستي الله يرحمها …وصفي جدي لحالو بالبيت بعد ما الكل تجوز …….
اي ؟؟؟
منار : وبعد سنة من وفاة ستي …..جوزها لخالتي بما أنو شب وبعمر الإحتياط …أخدوه ع الجيش
ييييي يا حرام …..
اي والله …وقلبها يفرك فرك عليها هالمسكينة عليه تحاكيه ودموعها تهرر وتشرر …دبلت كتير وتعبت …..ومرر كم شهر على روحتو على الجيش …وبهل الفترة كانت العيلة كلها تجتمع عند جدي …بالأسبوع مرة ….لحد ما صار بيوم …الكل راح واجتمع بطريقة عاجلة …بعد ما اجى خالي وجهه ماعم يتفسر بنوب فحطونا كلنا نحنا الصغار بعيد عن الموضوع …وصار في حكي كتير وقليل ….بس خالتي الصغيرة لهوها بعيد عن الإجتماع منشان تعمل قهوة …..
اي …وبعدين !!؟
وبعدين يا ستي …..خلص الإجتماع….ويومها أصر جدي أنو تنام خالتي عندو بالبيت ….
اي ؟؟؟ ليش
قال منشان تنظفلو البيت …وتونسوا بهل القعدة ….
شبكي منار …بشو صفنتي !!؟
عم أتذكر جدي اديش كان مصر على قعدتها …وخالتي الكبيرة تغمزو لجدي وتوشوشوا منشان كأنو يحكيلها لحالهم …عن سبب الإجتماع الأساسي …واللي هو وفاتو لزوج خالتي الصغيرة
شو هالحكي ؟؟! مات !!؟
اي …انقتل بالحرب …وماحدا مسترجي يحكي لخالتي هالمعلومة بنوب …فقلهم جدي انو بتنام عندي منشان هالموضوع وأنا بحاكيها فيه ….وعلى رواق منشان ما تجن من هالخبرية
أي ؟؟؟! شو صار دريت ؟؟!
اللي صار يا هلا انو تاني يوم …راحت خالتي الكبيرة لعند جدي …منشان تشوف شو صار بالموضوع ؟؟ بس لما فاتت ع البيت وشافتها …كانت مصفرنة …وعم ترجف مدري شبها ….
(((((الخالة الكبيرة : حسنية …لك حسنية شبكي ….ما تحكي …شو صايرلك …ماتردي !!؟ …..
حسنية رايح لونها عم أتكتك وترجف مدري شبها وماعم تقدر تنطق ولا بحرف ….
الخالة الكبيرة : يبعتلي حمة عليكي ….لك شبكي ؟؟؟ ماتردي عليي …دريتي يعني !!؟ لك شو صرلك ماتحكي !!؟
حسنية عم تبكي بدموع محروقة على خدودها …وماعم تقدر تفتح تمها وعيونها شبها مفلوجة ….يعني الوضع مو طبيعي بالمرة….
الخالة الكبيرة : طولي بالك يا حبيبتي ….طولي بالك هيك الحياة…قسمة ونصيب وحظ ….الله يرحمنا برحمتو …لا تعملي بحالك هيك ….مو منيح بنوب ….أنتي لازم تكوني قوية ونحنا كلنا معك بهل المصيبة اللي أنتي فيها ….
حسنية تهزز براسها مو فهمانة شو الموضوع …وصفرنت بزيادة
الخالة الكبيرة قربت وعانقتها : لا حول ولا قوة إلا بالله ….حبيبتي ما تحكي والله نشف دمي من شوفتك ع
هيك عم تعملي ….(وإذ مرر الجد )
الجد : أهلا …انتي هون ؟؟! إيمتى أجيتي
قامت على حيلها تركض تسلم على ابوها ….وحسنية عينها بالأرض
الخالة الكبيرة : كيفك يا بيييي …
منيح……شو جابك من بكير هلأ !!؟
جوزي حاكاني وقللي رح يجيبو المرحوم …حتى ندفنو ونتكفل بالباقي
حسنية وقفت عم تسمع مو مصدقة ؟؟!
الجد : مممم اي منيح ….عملو العزا عندي بالبيت ماشي …..
بس يا يابيي
أنا هيك حكيت ما رح تني كلمتي ها ….
طيب متل مابدك …سماع…الباب عم يدق ….شكلهم أجو باقي النسوان …..أنت روح وقعود بغرفتك …لبينما نخلص كل شي
طيب ماشي ….
فاتو هالنسوان وبلشو يعزووا بحسنية …وهي متل الأطرش بالزفة ……ولما قربوا وبلشو يبكوا ….وجابو سيرة جوزها أنو مات بالحرب مقتول …هررت ع الأرض مغمى عليها ….وماعادت تحرك فيها ساكن
هلا : يالطيف …..يالطيف ….مسكينة على هاللي صار فيها مو قليل بنوب …
منار : ولما فاتت خالتي وحكت لجدي ع اللي صار مع حسنية ….تركنا كل شي من أدينا ورحنا ركض فيها ع المشفى …..صاير معها حالة نفسية شديدة …..ومربوط لسانها
ياحرام …أكيد من هالخبرية ….واللي شافتو قدامها …مو سهلة بنوب …ياحرام
منار: الفكرة لما جابهتو خالتي منشان حسنية والخبرية تبع جوزها …..طلع مو مخبرها ومو حاكيلها شي ….
اوف …اوف …شو يعني ؟؟؟ يعني مادانت بتعرف
ابدا …وخبط لزق لقت عالشغلة بوجهها …
بس أنتي قلتيلي أنها كانت ماعم تنطق ولا عم تحكي من قبل الخبرية ومصفرنة …..
مظبوط …
أنا فكرت قلها
ونحنا كمان فكرنا هيك …بس طلع مو مخبرها …ودريت بجية النسوان وهنن عم يعزوها ….
ياربي ….شو اللي صاير فيها بالضبط ….زعلت على خالتك كتير …
اي والله بتقطع القلب …..
وبعدين شو صار فيها !!؟
يا ستي مت بتصدقي إذا بقللك بعد فترة شي شهرين ….من هاليوم المشؤوم
اي ….
طلعت حامل
يا سلام ….شي حلوو
اي والله فرحنا فيها كتير خاصة أنو طلعلها شي من ريحة المرحوم …..
هلا : وهلأ وينها خالتك
هلأ هي حامل بالشهر السابع…..
يعني القصة ماصرلها زمان ؟؟!
لا ما صرلها زمان ….بس لهلأ مربوط لسانها لخالتي حسنية صوتها ماعم يطلع بنوب …وعم تبكي كل فترة وفترة
المسكينة…بس هانت بكرة بتولد وبتخلص من هالهم اللي عليها بعد ما تشوف ابنها …
اي والله قولتك …(وهي عم يحكو مع بعض …فجاة بيرن تلفون البيت عند منار …..وبيحلل الهدوء فجأة ….وبتجي أم منار لعندهم عم تبكي )
منار : شبكي أمي ؟؟! شو في ؟؟!
هلا : خير خالة …ليش عم تبكي …
منار : مين ع التلفون أمي ؟؟!
أم منار تتنشوق : اتصلت فيني خالتك الكبيرة …..
اي شبها ؟!
قالتلي أتصلو جيران جدك فيها …لأن شمو ريحة مو طبيعية هنيك …..ولما ركضت خالتك لهنيك لتشوف شو القصة …طلع جدك متوفي …وصرلو يومين على قولتهم …(تبكي )
منار : جدي مات ؟؟؟!
اي مات …يعلييي عليك يا بييي ……أنا بدي روح والبس شوف شو القصة وللترتيبات هنيك ……آسفة يا هلا …على هالموقف
هلا : لا بسيطة خالة أنتي مالك دخل الله يرحمو …ويجعل مثواه الجنة ….
ام منار: عن اذنكم أنا رايحة ….منار سكري الباب منيح ورايي بس أطلع …وديري بالك على حالكم وع البيت وأنا بحاكيكم شو بيصير معي …..عن أذنكم
طلعت الام لابسة قلبها فاير فورة مو طبيعية تاركة هالصبايا عم يحكوا مع بعضهم …وهلا وقفت مع منار وهي عم تبكي على جدها ……
هلا طلعت تاني يوم لبيتها الصبح …..وقلبها عند منار …..اللي وضعهم صاير بشي تاني بعد هالخبرية …خاصة أنو طلع الجد واقع عليه زيت مغلي ….وميت وماحدا دريان فيه …والغاز كاين بآخرو ….مبين كان بدو يقلي شي …وحمي الزيت ..وفجأة خلص الغاز بينما عم يقلي …فقام الزيتات …وشكلو زحط ووقع الزيت عليه ….وسايخ جلدو عن عظمو ..وماحدا حاسس فيه ولا دريانين عنو شي ….
.
.
.صار العزا ببيت جد منار ….وأجت هلا وعزتها مع امها ….طبعا الكل بحالة بكاء وصدمة …..وحسنية قاعدة جفلانة بين هالناس دمعتها ماعم تجف من على وجهها المصفرن .. …ومو بقيان شي الكتير لولادتها ….
.
.وبعد شهر …بلشت حسنية يجيها الطلق …..وبما إنها بكرية ..تعبانة صرلها من الصبح ….فسحبتها أختها للمشفى …وهنيك يروح منها الطلق ويجي وعيونها تبق وتنعصر منها الأوجاع …وصوتها عم يعن عنن بحلقها ……ولما صارت ساعة الصفر ….تسطحت لأجت الدكتورة …..وهون بلش الجد بالصريخ …ومن دون وعييي من حسنية صرخت صوت من كل طاقتها وصميم عقلها ….: أمييييييييي ….سااااااعدينيييييي منشاااااااان الله
(وووواع …وااااع )
الخالة الكبيرة مبسوطة: تقبريني يا حسنية …حكيتي يا عمري ….شوفي ..شوفي …جبتي ولد متل فلقة القمر ….
حسنية داروا عيونها وغابت عن الوعي من التعب
الدكتورة : رجاء تطلعي لبرا يا خانوم …مبينة المريضة تعبانة …..
الخالة الكبيرة : بس أنا بدي كون معها …ماسمعتيها كيف نطقت….
الدكتورة: امبلى…شكلو أخيرا انفكت العقدة اللي عندها الحمدلله …..بس لتصحى رح ناديلك …
الخالة : خليني هون جنبها بترجاكي دكتورة
طيب امري لله …متل مابدي ….عن أذنك لروح شوف الولد حتى نغسلو
ماشي ….
ومرر كم ساعة على حسنية …كتير تعبانة ويادوب عم تقدر تتحرك ……وبس بلشت تصحى…….تدور عيونها على شفة مي من العطش ……أختها ضغري فهمت عليها من عيونها
..فركضت تشربها …..
حسنية (تشرب): الحمدلله
الخالة : الحمدلله على سلامتك يا عمري …طيف صرتي …مبروك رجع صوتك ….والله فرحتي مالي عاطيتها لحدا يا حبيبتي …بدي أعنل افراح …وليالي ملاح ما حصلت …
هون حسنية بلشت تبكي …وتبكي ..وتبكي
الخالة: لك شبكي يا أختي …شو صرلك …منشان الله لا تبكي ….منشان حليبك وكرمال هالولد …..
بس حسنية تبكي بزيادة مو قدرانة تعمل شي غير تبكي ….
الخالة : شبكي يا حسنية ….ريحيني شبكي
حسنية : ماعاد فيني …ماعاد فيني …أنا تعبانة …تعبانة يا أختي …روحي رح تطلع مني
لك ليش بعيد الشر …شو اللي صار ….
حسنية: صار كتير …وكتير ….واللي صار ماعم يروح من بالي بنوب يا أختي …..انا مابعرف شو الصفة اللي بدي احكيها بحقي ولا بحق أبي …
ابوكي ؟؟؟
اي أبي …ابي اللي من طول عمري شوفوا ابي …..هلأ ماعم بقدر اترحم عليه ولا بأي شكل
لك انتي شو عم تخرفي
حسنية : متل ما سمعتي …..هالولد …يمكن مو أبن زوجي
شوو؟؟؟؟
اي …..وبدي أتأكد قبل كل شي …
شلون ؟؟؟
بدي أعمل تحليل دي أن آي ….ومن بعدها رح تعرفي لحالك يا أختي
شو هالمصيبة اللي عك تحكي فيها …إيمتى وكيف وشلون يا حسنية
باليوم اللي فقدت فيه نطقي …بالليوم الأسود اللي شفتو بعيوني …….ما بتتذكري كيف أصر أبي يتركني عندو وانا مابعرف لييش؟؟، …اي أختي ..اي ..لا تصفني …يومها عمل فيني متل الوحش ….حتى ماشفتو غير وحش ضاري يومها …تعبت ….تعبت وانصدمت لدرجة أختفى صوتي من بعدها …..وليكو يوم اللي مات …ماعرفت شو الشعور اللي خالجني يومخا ….أضحك ولا أشمت ولا أبكي …..ولا هالولد اللي أحى على هالدنيا شو بدنا نقول عنو ….
الخالة عصبت : خرسي …خرسي ..بيكفي …..لنتأكد بالأول…بعدين منحكي …..آه يا راسي …إه يا راسي
..رح ينفجر …شو هالبلزة اللي حللت فوق راسنا …لك ليش هيك صااااار ….آه …آه يا أبي ….لك ليش هيك عملت …عقلي ما عم يستوعب ياربي ….
سمعي منيح …مابتقولي لحدا ولا مخلوق يخلق عن هالقصة فهمتي شو عم قول …..
ماشي …مارح قول ….لشوف شو رح تعملي …
وفعلا عملوا التحاليل الطبية اللازمة …وللأسف النتيجة طلعت …..
وبعد شهر …رن التلفون لبيت هلا
ألو …أهلا منار …كيفك …مشتقتلك كتير أنا …طمنيني كيف صرتي ….
منار : مشتقتلك كتير يا هلا …..
شو كأنو في بتمك حكي …شو القصة؟؟ حتى صوتك مو عاجبني
معك حق ….هلأ من شوي كنت عم أسمع حكي أمي مع خالتي ع التلفون …وسمعت أكبر صدمة بحياتي …
خير …شو في !!؟
بتتذكري قصة خالتي حسنية
اي شبها …..ولدت
اي ولدت …بس هلأ متمنين لو هالولد مات
اوف اوف اوف …شو عم تقولي أنتي ….ليش شو القصة؟؟
منار : القصة بإختصار …هالولد طلع …طلع …..(دقرت وصارت تبكي )
هلا : شو ..؟؟؟ لا تقوليها …..
منار: اي يا ستي …تحليلاتنا أنا وياكي هداك اليوم طلعت صحيحة …..
هلا سكتت ومدري شو صرلها …قلبها يرجف رجف
منار: فهمتي هلأ يا هلا ليش اهلك بيخافوا عليكي …ومابدهم ياكي تنامي عند أي حدا غريب …..
هلا هززت راسها كاننة: اي …فهمت…حتى القريب كمان …..من حقهم يخافوا علينا من كل شي …..خاصة من أقرب الناس إلنا …
أصحك تقولي لحدا……أنا خبرتك لأن حسيت الصخر قاعد على قلبي ولازم بق اللي فيني….. ديري بالك على حالك يا هلا …زماننا بخوف
معك حق….أنا أخدت درس كبير
وأنا كمان …..مسكينة خالتي حسنية …شو بدها تعمل هلأ بهل الولد …
شو رح تعمل فيه ؟؟
رح تربيه على أنو ابنها الشرعي …منشان نغطي ع الفضيحة…..
((لاحول ولا قوة إلا بالله…يارب تسترنا بسترك الكريم ولا تمتحنا يا الله ))
#انتهت
