ماذا تفعل المراره!!

ماذا تفعل المراره!!

جوجل بلس

المراره و زيادة الوزن🤔🤔

سؤال بيطرح كتير عن زيادة الوزن و ارتباطه بعملية استئصال المرارة
وادعاء ناس كتير أنهم زادوا في الوزن خاصة بعد استئصال المرارة اللي كل الناس عارفه دور العصاره الصفراء اللي بتخزن فيها .. في هضم الدهون في الطعام اليومي.

الاول كده تعالي نوضح إيه المراره وايه العصاره الصفراء اللي بتفرز من الكبد و تخزن في المراره.

المراره ماهي إلا حاويه بيخرن فيها عصاره بتفرف باستمرار وبلا توقف من الكبد وعشان مينفعش تفضل تنزل علي الأمعاء طوال ٢٤ ساعه وجب وجود مخزن لها و صمام كمان عشان فقط تفرز من المخزن ده فقط عند الحاجة لها.

هي ده ببساطه المراره مجرد خزان بيفرغ عند اللزوم .. طيب و العصاره نفسها إيه بقي
العصاره الصفراء هي أحد افرازات الكبد اللي بتساعد في هضم الدهون عن طريق تكسير الكرات الدهنية الكبيرة الي كرات حجمها اصغر يعمل علي هضمها انزيم ال lipase وده بيكون من البنكرياس.

يعني مش هي الهاضم الأساسي للدهون لكن بدونها فعلا ال lipase مش بيقدر يكسر ويهضم الدهون بشكل فعال و ده بيؤدي الي سوء هضم شديد تجاه الدهون.

حلو كده وده السبب اللي دائما بسببه بنطلب من حالات شيل المراره تقليل الدهون في الاكل عشان فعلا بتتعب جدا جدا جدا من سوء هضم الدهون من ألم في البطن و مشاكل إخراج وتعب مستمر في الجهاز الهضمي.

فبالتالي كده ادعاء انك أما تشيل المراره هتتخن ده عشان الدهون مش هتهضم و تتخزن ده كلام غلط تماما

ليه ؟!! ازاي الدهون تخزن وهي أصلا لم تهضم ولم تمتص إزاي يعني .. شيل المراره بيصحبه عدم انتظام إطلاقا في إفراز العصارة الصفراوية وبالتالي سوء هضم للدهون اللي صعب يخلص عليها ال lipase لوحده عشان كتلتها كبيره عليه و بس بيحصل نسب هضم بسيطه عشان العصاره بتفرز باستمرار من الكبد لكن مش بقوه افرازها وهي مخزنه سابقا في المراره وكمان لتواجد ال lipase.

وساعتها أصلا الدهون لو دخلت في الجهاز الهضمي بنسب كبيرة بيكون المردود سوء هضم وعدم امتصاص لها أصلا وبالتالي نزولها في البراز وبتسبب معاناه للحالات ده في الاخراج.

يعني لا الدهون بتتخزن ولا غيره بالعكس ده بتنزل في البراز مش مهضومه.

طيب يا نبيه زمانك تفسر إزاي إن فعلا في حالات كتير زيادة وزن بعد استئصال المرارة
اقولك يا سيدي
السبب هو التوجه الاكبر للنشويات اللي هي أكبر مصدر في اكلنا و أكبر مصدر لتراكم الدهون في الخلايا الدهنية.

جماعه السمنه عموما مش بيكون سببها نسب الدهون العالية في الأكل بس بالعكس وإلا مكنش انتشر نظام زي الكيتو رغم عدم نصحي به لانه سيئ جدا.. لكن السبب الاقوى هو النشويات و الاضراب المستمر في نسب الأنسولين في الدم بين ارتفاع بيؤدي الي تحويل السكريات و تخزينها في صوره دهون.

عشان كده بينصح دايما بالدايت المتوازن خاصه في حالات المراره اللي مش بيمنع عنها الدهون نهائيا لكن فعلا بتقل جدا عشان الهضم و طبعا تقنين نسب النشويات والبروتينات …
دمتم بصحة……….