نظام نوم البيبي في رمضان

نظام نوم البيبي في رمضان

جوجل بلس

نظام نوم البيبي فرمضان من اكتر الحاجات اللي بتشغل تفكير اي ام دلوقتي 😄
هل الاحسن اغير نظام النوم ولا لا وهل غلط اخلي الطفل يسهر معايا عشان ينام عدد ساعات اكتر بالنهار ؟

– اول نقطة مهم نتفق ان اكيد الصحي اكتر للطفل ان يكون اغلب عدد ساعات نومه بالليل ( ده عموماً في الايام العادية)
– عدد ساعات النوم بيختلف من طفل للتاني حسب طبيعة جسمه وطبيعة المرحلة العمرية
– كل بيت ليه طبيعة مختلفة ونظام يوم مختلف في رمضان فطبيعي نظام الاطفال ميكونش ثابت او محدد

عشان كدة منقدرش نقول ازاي ننظم نوم البيبي فرمضان لكن نقدر تحط فاعتبارنا كام نقطة يساعدونا على النظام ده 😍❤️

– اختاري نظام النوم المناسب ليكي وللبيبي ولظروف يومكم

– اي تغيير هيحصل هيكون لمدة شهر فاطمني ان حتى لو التغيير ده مضر ( زي انك تخلي البيبي ينام بالنهار ويصحى بالليل) هيبقى الضرر ده لمدة شهر ( او فترة قصيرة)

– نحاول بقدر الامكان نتجنب فكرة قلب اليوم عشان منبوظش ساعة الطفل البيولوجية اللي اساسها بيعتمد على النوم بالليل والصحيان بالنهار

– خلي بالك ان لخبطة ساعات النوم تتوقعي بسببه لخبطة في نظام الرضاعة او الاكل واكيد في المزاج

– حطي فاعتبارك اي تغييرات الطفل بيعدي بيها زي تسنين او طفرة نمو

– لو كان قرارك انك هتغيري معاد نوم الطفل يبقى خليه تدريجي كل يوم تاخري نص ساعة او ساعة ميكونش مرة واحدة

– عند قرب وقت النوم المعتاد ابداي ركزي انك تشغلي الطفل بحاجة تدينا وقت زيادة لحد مانوصل للوقت المطلوب بعد كام يوم

– اهتمي ان الطفل ياخد القيلولة بتاعته بالنهار في وقت مناسب لوقت النوم بالليل

– اهتمي ان عدد ساعات النوم يكون متواصل يعني مينامش شوية بالليل وشوية بالنهار

– حطي فاعتبارك اننا هنقعد فترة بنرجع لنظام النوم الطبيعي لو قررنا نغيره فرمضان

– انسب معاد لنوم الطفل (في الايام العادية) من ٧-٩ بالليل

– حاولي تختاري القرار الوسط اللي يخليكي متقلبيش النظام كله وفنفس الوقت تعرفي تكسبي كام ساعة نوم زيادة الصبح ( مثلاً ينام ١٢ ويصحى ١٠ )

– اكيد نظام يومنا فرمضان هيتغير بوجود البيبي زي ماكل حاجة تانية فحياتنا اتغيرت ، المهم اننا نختار التغيير المريح لينا واللي يساعدنا نستمتع معاهم 😍❤️