أنا قرفان.
اتفرجت على الحلقة الأولى من برنامج رامز الجديد، زي ما بعمل كل سنة، بتفرج على الحلقة الأولى فقط، عشان أعرف شكل تمثيلية المقلب بتاع السنة دي.. واللي شوفته خلاني قرفان، فكرة البرنامج قائمة على إن رامز بيبدأ يعذب الضيف، من خلال إنه بيصعقه بالكهربا، ويخلي الكرسي اللي هو متكتف فيه يتحرك بشكل هستيري، وينزل بيه في صندوق بيتملي ماية، وفي وسط كل ده بيبدأ يطلب من ضيف الحلقة إنه يستعطفه، ويبدأ يغني لـ “رامز” باسمه، وعلى وشه أمارات الرعب، ويبدأ يتأسف وهو بيتذلل.
حاجة كده شبه مشاهد التعذيب في الأفلام العربي، بس طبعًا بشكل مُفتعل ودمه تقيل.
بصراحة أنا مش مهتم بالممثلين، ولا بسلامتهم، دول ناس رايحين يشتغلوا وعارفين كويس أوي هيمروا بإيه، وبياخدوا ملايين مقابل ده، وراضيين.. المقرف بالنسبالي إن معظم جمهور برامج “رامز” من الأطفال، ملايين الأطفال كل سنة بيتابعوا حلقات برنامجه يوميًا، هما دول اللي خلوني قرفان وحزين، هما دول اللي هيتزرع جوه دماغهم كل يوم إن التعذيب ممكن يقترن بمحتوى كوميدي عادي، والتذلل والاستعطاف تحت تأثير صعق الكهربا، والتخويف، حاجات دمها خفيف.
التأثير النفسي للمحتوى المرئي اللي زي ده مخيف على الأطفال والمراهقين، والله أعلم هنشوف آثاره في المستقبل إزاي.. تصدير أفكار العنف، والإذلال، والاستمتاع بالتقليل من شخص تاني، ولو على سبيل الهزار، شيء مقرف جدًا.. ومبيضحكش.
منقول عن احمد مدحت
