#فتحة_اليافوخ

❓ابني …فتحة اليافوخ قفلت عنده بدري
❓ابني فتحة اليافوخ عنده لسَّه ما قفلتش

عشان نعرف بدري و متأخر دي بنحسبها ازاي …تعالوا نعرف إيه الطبيعي الأول

الفتحات دي ربنا عملها عشان في زنقة الولادة يبقى سهل ان الجمجمة تتحرك فوق بعض وتسهل نزول الرأس بدون ما يحصل لا قدَّر الله كسر لعظام الجمجمة من الزنقة

و بعد كده الفتحات دي بتدي مساحة للمخ يكبر في أول سنتين لإنه تقريباً بيزيد ٣ أضعاف حجم الولادة في خلال أول سنتين و محتاج مساحة يكبر فيها … واللي بتوفرها الفتحات الموجودة في الجمجمة

عندنا فتحتين مشهورين

#الفتحة_الخلفية و دي بتقفل في أول ٣ شهور

#الفتحة_الأمامية

اللي كلنا عارفينها بإسم فتحة اليافوخ و اللي عاملة قلق للناس

🤯 أولاً
عند الولادة بيوصل وِسعها من 0.6 سم : 3.6 سم
يعني اللي ابنها يتولد من الأول بفتحة يافوخ صغيرة لازم تعرف إن دا ممكن يكون من ضمن الحاجات الطبيعية و محتاجة تتابع فقط

🤯 ثانياً
في أول شهرين فتحة اليافوخ ممكن حجمها يكبر شوية عشان عظام الجمجمة بترجع تاخد وضعها الطبيعي تاني بعد الولادة و دا مش لين عظام و لا علامة على اي حاجه و محتاج بس متابعة

🤯 ثالثاً
اختلفت الأعمار اللي بتقفل عندها الفتحة دي زي الآتي
👶🏻 حوالي ١٪؜ بتقفل عندهم عند عُمر ٣شهور
👶🏻 حوالي ١٠٪؜ بتقفل عندهم عند عِمر ٦شهور
👶🏻 حوالي ٢٥٪؜ : ٥٠٪؜ بتقفل عندهم عند عُمر سنة
👶🏻 حوالي ٩٨٪؜ : ١٠٠٪؜ بتقفل تماماً عند عُمر سنتين

وأكتر وقت بتقفل فيه عند عُمر ١٣ شهر : ١٤ شهر

و نخللي بالنا إنه مش معنى إنكوا حاسين إن الفتحة مقفولة باللمس فقط إنها فعلا مقفولة …في معظم الحالات بتكون لسه مفتوحه و بتدي المساحة الكافية للمخ إنه يكبر

🔆 طيب لو حسّيت إن الفتحة قفلت بدري أعمل إييييه؟؟!!

♦️ لو شكل البِيبي طبيعي و نموه طبيعي و مفيش فيه أي عيوب خلقية أو أي مشاكل في نشاط الغدة الدرقية …مطلوب فقط المتابعة الشهرية ل محيط الرأس و متابعة تطوره العضلي و العصبي فقط…و لو حصل تأخر في زيادة محيط الرأس في الوقت دا بنحتاج فحوصات و أشعة أكتر

♦️لو البِيبي بيعاني من الأول من مشاكل في النمو أو الغدد أو بيعاني من تشنجات أو عنده ملامح مش طبيعية …كده محتاجين من الاول نلجأ لدكاترة المخ و الأعصاب ودكاترة التجميل لعمل ترقيع لعظام الجمجمة عشان ندي مساحة للمخ ينمو

🔆 طيب هل فعلاً لو بندي كالسيوم او فيتامين د …. دا بيسبب قفلها بدري ….و هي ليه بتقفل بدري أصلاً؟؟؟؟!!!

حتى الآن مفيش سبب محدد لان فتحة اليافوخ تقفل بدري …. و بالنسبة للكالسيوم و فيتامين د ليس لهم علاقة بإنها تقفل بدري

متنساش اللايك والكومنت ومشاركة البوست
عشان توصلك كل البوستات الجايه