#فرقتنا_السنين_وجمعنا_القدر_بقلم_امل_احمد
#قصة_واقعية
الفصل الاول+ الثاني+ الثالث+ الرابع+ الخامس+ السادس…. انتهت
(الفصل الاول)
كلنا بنخلق وفي طبيعة مرافقتنا وفطرة نفطرنا عليها ..فطرة الحنان بالام والسند والامان بالاب ..بس لما نحنا نخالف هالطبيعة كلشي بيمشي غلط ..وما في شي بيكمل…
انا لانا ربنا حط كل ايات الجمال فيني من شعر لعيون لجسم لكلشي.. جذابة وملفتة.. بس حضي مانو متلي.. وعيت ع الدنيي ع مشاكل امي وابي يلي ما بتخلص.. وعيت ع ضرب ابي لامي وقسوتو عليا وع عنادا لامي ..استمرت مشاكلن سنين وانتهت بطلاقن ..وقتا كان عمري 6سنين.. كنت لساتني صغيرة بالروضة.. ما فتت المدرسة..
ماما:لانا حبيبتي انا وابوكي انفصلنا وانا رح اترك البيت ..رح تجي معي؟
لانا: امي خليكي هون بترجاكي.. ما بدي نترك بابا
ماما: لانا يا روحي انا ما فيني ضل معو لابوكي.. انا تعبت منو كتير ونحنا خلص اطلقنا.. ازا بدك فيكي تضلي معو
دمعو عيوني الصغار وانخنق صوتي وطلعت الكلمات بصعوبة: بس ماما انا بحبكن تنيناتكن.. بدي عيش معكن سوا
حضنتني ماما وصارت تبكي : يا عيوني يا امي خلص انت لازم تتعودي.. خلص انا وبابا ما فينا نعيش سوا
انفجرت بالبكي وانا بحضنا لماما وضميتا بقوة كبيرة ..كنت خايفة خايفة كتير ..كان قلبي الصغير حاسس بالحياة يلي مستنيتو وبالوجع يلي رح يعيشو
لمينا تيابنا انا وماما ورحنا ع بيت جدي …
جدي: لك كمان جايبي بنتو معك ..لك انت مانك مجبورة تربيلو ياها خلي هو يربيها
ماما: بابا هاي بنتي ..مالي قلب اتركا عندو
تيتا: تركا يا رجال الله يهديك ..ما بكفيها طلاقها تركها بحالها
مشت اشهر العدة لماما وانا كنت معا وروح زيارات لعند بابا ..اخر اسبوع باشهر العدة اجا خبر خطبة بابا ع بنت عمو
ماما: الووو.. اي اهلين هلا.. تمام انت كيفك ..خبر شوو.. مين ؟.. علي.. شبو كمان.. شوووووو
سكرت امي التلفون وانفجرت بالبكي..
لانا: ماما حبيبتي شو في.. ليش عم تبكي
تيتا: شبك يا بنتي شبك.. شو صاير
ماما: علي يا ماما علي
تيتا.. يووووه علينا.. لك ما خلصنا من سيرتو.. شبو علي كمان
ماما.. علي خطب بنت عمو يا امي
تيتا.. لك لكن شو مفكرة.. بدو يضل العمر كلو عايش ع ذكراكي.. لك حمدي ربك انك خلصتي منو وهاي العدة باقيلا اسبوع بس وبتخلصي
ضلت امي تبكي وتبكي وانا ابكي معا.. بتزكر اياما تعبت كتير ..هي كانت تحبو لبابا كتير بس ضربو واهانتو لالا ما خلاها تقدر تكفي معو..
وباول يوم لماما بعد ما خلصت اشهر العدة….
جدو: تعي يابي بدي حاكيكي بموضوع مهم
ماما: اي بابا جايي
جدو: لانا بنتي فوتي لجوا بدي حاكي الماما بموضوع
فتت لجوا الغرفة وضل الباب مشقوق .. كنت العب بالالعاب لما سمعتا لماما: بس يابي بنتي شو بدو يصير فيها.. (كانت تحكي وهي تبكي )
جدو: لك بدك تدفني حالك كرمال بنتو.. ليكو تجوز وعامل فيها عريس.. ما خطب غير يومين وتجوز ع عفشك وببيتك.. وانت قاعدة بتربي ببنتو.. كبيها لالو ولمرتو خليهن يربوها
ماما: بس يابي البنت صغيرة لسا ما شافت شي من حياتا
جدو: لك ليش انت يلي شفتي .. قومي لبسيها بدي روح عطي ياها هلا
ماما: لا يابي بترجاك لا تعمل فيني هيك.. بموت بلاها
جدو: قومي بسرعة لبسيها والا بغضب عليكي تحركي
انا كنت عم اسمع ودموعي متل الشلال ع خدودي الموردين ..صار جسمي كلو يرجف وركضت ع حضن ماما وانا خايفة: لا يا ماما ما تتركيني بترجاكي بدي ضل معك بترجاكي يا ماما
ضمتني ماما وهي عم تبكي..ويا ريتا بوقتا ما خلصت هالضمة.. هالضمة كانت اخر ضمة بعدا ما عدت شفتا لماما ولا عاد شميت ريحة حضنا
اخدني جدو وعطاني لبابا.. مرتو لبابا جن جنانا كانت لساتا عروس ..بس هي كانت اشطر من ماما كانت تتعامل مع بابا بالسياسة.. كانت تاخد يلي بدا اياه بكل رواق
شفق: علي حبيبي يعني نحنا لساتنا عرسان بدي البسلك واتغنجلك شوي ..وبنتك واعية اسم الله شفلا شي تصريفة
علي: اي مو يكرم الحلوو.. هلا بعطيها لامي تضل عندا كم يوم
اخدني بابا لعند تيتا يلي صارت تتزاور فيني ..كنت تقل ع الكل ..براءتي وجسمي الصغير ما شفعولي عندن.. كلن كانو بدن يخلصو مني…
مشت الايام وفتحت المدارس.. كان يوم من اصعب ايام حياتي.. عشت فيه دور اليتيمة بوجود امي.. كنت بدي اصحى بكير ع لمسة منا ع شعري وبوسة ع خدي ..كنت بدي تحضرلي كتب ودفاتر وقلام ومعجون ..كنت بدي تمسك بايدي وتوصلني لباب مدرستي.. بس وينا امي.. امي مانا هون.. امي تزوجت رجال سعودي وسافرت معو وما عاد شفتا ابدا.. امي ماتت بحياتي..
(الفصل الثاني)
مرت الايام وحياتي مشت مع بابا ومرتو يلي كانت كل يوم بوجه شكل. يوم تحبني وعشرة لا ..يوم رفيقتي وعشرة عدوتي..
مشاكلي يلي مرت عملت عندي عقدة النقص.. وكان بدي عبي هالنقص وبدي رجع الحنان يلي فقدتو من يوم اخر ضمة لامي ..كبرت وصار عمري 16 سنة.. صرت صبية وعيون الشباب ما تنشال عني.. كنت جذابة وملفتة بكل معنى الكلمة
سهى :لانا لك شوفي هالشب ..لك كل يوم عم يمشي ورانا ونحنا رايحين ع المدرسة ونحنا راجعين
لانا: ههههههه بيكون عشقانك يا ضرسانة
سهى :بالله.. لك شوفي لك عيونو ما بينشالو عنك.. لك مين بدو يشوف جمالك ويطلع فيني هههههه
لانا: ههههههه حبي انت
سهى كانت اعز رفيقة لالي .. حبا كتير وفشلا قلبي كتير ..كنت خبرا عن حياتي مع مرت ابي.. وعن ابي وقسوتو علي.. بعد زواج امي وسفرا ..بابا جن جنانو.. ما كان متوقع انو ماما تتزوح وبهالسرعة ..كان متوقع انو يكسرلا راسا بالطلاق وبعدا ترجعلو مكسورة.. بس هي ما عملت هيك هي تركتو وتزوجت وسافرت.. سافرت ونسيت كلشي وراها حتى انا بنتا الوحيدة.. من بعدا بابا صار يعاملني بقسوة كبيرة وكانو كان محملني ذنب انفصالن وزواج ماما
ومن بين كل هالظروف السيئة وهالوجع يلي معشش بقلبي والغصات يلي ورا بعضا ربنا بعتلي عمر.. عمر الشب الحلو الحنون..بلشت علاقتي معو من لما كان يلحقني انا ورفيقتي سهى.. كنت اطلع من البيت لاقي واقف لبعيد ورا الشجرة ويضل يمشي وراي لحتى اوصل المدرسة.. ومن لما اطلع من المدرسة لاقي ع باب المدرسة عم ينطر طلعتي ويضل وراي لحتى اوصل البيت.. انا كنت ملاحضة هالشي ومبسوطة كتير بانو في شخص بحياتي مهتم فيني.. ضل الحال هيك وعمر عم يلحقني من بعيد لبعيد ليوم…
كنت يوما راجعة انا وسهى من المدرسة.. سهى وصلت لبيتن وانا كملت طريقي .. كنت حاسة بخطواتو وراي عم يمشي بس بعدا بشوي حسيت بئيد نحطت ع كتفي.. انا قلبي رجف والتفتت بس ما كان عمر.. كان شب ازعر من حارتنا.. كان وقتا الضهر والدنيي حرر والشارع فاضي..
الشب :شو يا حلو خوفتك شي
لانا: لك اكسر ايدك هيك
الشب: اي شوي شوي علينا.. بس والله بيطلعلك ..هيك جمال بيطلعلو يشوف حالو ع الناس
لانا: اي خراااس والله ازا ما بعدت الا لم عليك الناس
الشب: هههههههه اي طولي بالك ..ما في حد هون لتلمي..
وانا عم احكي معو وبعدو عني ما شفت غير عمر هجم عليه للشب وضربو بنص وشو
عمر: لك يا كلب يا حقير بعيييد عناااا
الشب :ااااخ.. اي تعا هوون.. مين مفكر حالك انتا ولا فصعون
تضاربو بنص الشارع وانا عم ارجف وابكي وماني عرفاني شو اعمل.. اشرلي عمر وصرخ علي :روحي ع بيتك روحي
انا صرت اركض وانا ابكي ورجعت ع البيت.. بقيت طول الوقت وانا عم ابكي وقلقانة كتير ع عمر يلي ما بعرف شو صار معو.. مشي اليوم بصعوبة.. وليلتا كانت بالف ليلة.. اجى النهار وبسرعة لبست وطلعت من البيت ومباشرة تطلعت لعند الشجرة لشوف عمر..
كان واقف وعم يستنا ..حسيت قلبي صار يرقص من فرحتو وهديت ومشيت ع المدرسة وهو وراي.. بعد ما بعدنا شوي عن البيت ..
عمر :مرحبا
لانا: اهلين
عمر: كيفك
لانا: انا الحمد لله تمام.. انتا كيفك
كانت اثار الضرب مبينة بوشو لعمر
عمر: تماااام التمااام هههههههه
لانا: متاسفة كتير ع يلي صار .. وبتشكرك كتير
عمر: لك لشو عم تتاسفي.. الحمد لله يلي لحقتك
لانا: الحمد لله ربنا بعتلي ياك.. ممكن اعرف اسمك
عمر: انا عمر ..وانت
لانا: انا لانا
عمر :عاشت الاسامي.. يالله صار لازم روح بلا ما حد يشوفك معي ..انتبهي ع حالك منيح ..رح ضل وراكي
وغمزني وراح..
لانا: الله معك..
وجودو لعمر بحياتي دخل جواتي مشاعر جديدة كنت ناسيتا.. دخل جواتي الاحساس بالامان يلي فقدتو من زمان.. وشوي شوي بلشت مشاعري لعمر تكبر ..حنيتو كانت ما بتنوصف.. عوضني عن كتير مشاعر كنت بحاجة لالا.. وبيوم …
عمر: صباحوووو
لانا: اهلين عمر.. صباح الورد
عمر: تفضلي هاي هدية لالك
لانا: يسلموو كتير شو هاد
عمر :هاد تلفون لحتى ضل اسمع صوتك وما فارقك طول النهار
لانا: جد يسلموو ..عمر انت كتير حنون
عمر: لك ااخ بس لو فيني جبلك الدنيي كلا لعندك ما قصرت
لانا : بس كيف بدي احكي معك.. والله ازا شافو بابا ليقتلني
عمر: لك لشو ليشوفو خبيه وبس تشوفي الجو مناسب بعتيلي مسج وانا بحاكيكي
لانا: اوك ..يسلموو
(الفصل الثالث)
رجعت يوما ع البيت وانا طايرة من الفرح.. غيرت تيابي وتغديت وسكرت الباب ع حالي وبعتلو مسج ع الرقم يلي كان مسيفلي اياه ع التلفون.. وبعدا بشوي حاكاني
عمر: مرحبا
لانا: اهلين.. مين معي عفواا
عمر: مين معك؟؟ اي انا ناطور بنايتكن ست لانا
لانا: هههههههه اي اهلين ..تفضل ايا خدمة
عمر: لك تؤبري البي ع هالضحكة.. ليك لانا اوووعك شوفك عابسة بدي ياكي تضلي تضحكي ع طول
لانا.. طول ما انت معي ما رح اعبس ابدا.. انت الفرحة الوحيدة بحياتي.. انت خليتني اولد للحياة من جديد
عمر: ما بتتخيلي قديش هالحكي بيسعدني.. والله لو يطلع بئيدي لشيل كل الحزن يلي بقلبك وازرع مكانو فرح وسعادة
لانا: مافي حزن وانت معي.. بس اوعك تتركني
عمر: انا بترك روحي وما بتركك
لانا: ااخ يا عمر.. هالحكي امي كانت تحكيلي ياه.. بس ليكا تركتني وما عاد سالت فيني
عمر: حبي لا تضلي تفكري هيك.. انا معك لطول العمر انت ملاك يا لانا انت خلقتي فيني عمر جديد ما بعرف غير السعادة والحب
كانت علاقتي بعمر عم تقوى.. ونفسيتي يوم عن يوم عم تتحسن والفرحة دخلت لقلبي ..مرت ابي حست علي وع تصرفاتي
شفق: شو لانا باينتك مبسوطة هاليومين
لانا: الحمد لله خالتو
شفق.. بس شو سر هالفرحة هاي
لانا: ولاشي عادي
بابا: لك تركيها للبنت كمان فرحتا بدك تحاسبيها عليها
شفق: ئي تركتا.. لك الحق مو عليكن الحق ع يلي عم يسال عنكن
بلشت مرت ابي تراقب فيني وتفتش باغراضي. اكتر من مرة فوت ع الغرفة لاقيها عم تفتش
لانا: خير خالتو بدك شي
شفق: لا حبيبتي كنت عم دور ع غسيل وسخ لاغسلو
لانا: يسلمو كتير ما في شي بدو غسيل
ضلت مرت ابي عم تترصدلي لحتى بيوم سمعتني وانا احكي مع عمر.. وفورا راحت وخبرت بابا
يوما دخل بابا الغرفة وهو معصب وبلش يكسر كلشي قدامو ويفتح بالخزاين والدراج ويصرخ: وينو ولي وينو للتلفون..
لانا: ايا تلفون بابا ما في تلفون ما في
هجم علي وضربني كف ع وشي: لك عم تكزبي كمان.. طالعيه ولي قبل ما اطلع بروحك
كلشي وجع بالدنيي وكلشي تعب وكلشي هم حسيتو بهديك اللحظة ع كتافي ..قعدت ع الارض وصرت ابكي.. ابكي ع السنين يلي عشتا بالوجع والاهانة ابكي امي يلي تركتني وابكي ابي يلي قلب ضدي ..ابكي ع الحب يلي بدن يقتلو ..ابكي ع المشاعر يلي نولدت جواتي وبدن يدفنوها…
ضل بابا يدور لحتى لقا للتلفون: ما في قلتيلي والله لكسرك يا كلبة..
وبلش ضرب فيني بنفس الطريقة يلي كان يضرب ماما فيها: احكي ولي مين هو مين
انا وقتا كنت حاسة حالي بعالم تاني.. ما كنت حاسة بالضرب يلي عم يضربني ياه.. كنت ابكي وابكي وابكي قهر ووجع والم …
بابا: ما رح تطلعي من هون لتحكي مين هو وليييي
وطلع من الغرقة وقفلا عليي
انا كنت عرفاني بانو رح يضل يضربني لحتى بالاخير استسلم واعترف.. خفت كتير ع عمر.. خفت يتركني واخسرو… حبي الو كان اكبر بكتير من اني فكر مجرد تفكير باني اخسرو… بعد ما قفلو الباب علي وراحو وقفت بصعوبة وصرت اتفتل بالغرفة يلي كانت مقلوبة وكلشي فيها ع الارض.. ما لقيت قدامي غير مقص.. مسكتو وجرحت اديي التنتين….
(الفصل الرابع)
حسيت بناااار عم تغلي بجسمي وصار جسمي كلو يرجف.. وبعدا ما عدت حسيت ع شي.. ما فقت غير وانا بالمشفى
الدكتور: هاي فاقت.. الحمد لله ع سلامتك عمو
كنت تعبانة كتييير وماني قدراني احكي كانت الدنيي عم تفتل فيني.. هزيتلو براسي من غير ما احكي..
الدكتور: انت لساتك صغيرة عمو.. شو يلي خلاكي تعملي هيك
نزلو دموعي وما قدرت جاوب ..وانفتح الباب ودخل بابا ومرتو.. كان خوف بابا علي باين بعيونو او يمكن كان خوفو ع حالو ما بعرف.. ومرتو كان الحقد والكره باين بعيونا …طبعا هني يوما فكرو باني غلطانة معو لعمر وخسرانة شرفي لهيك انتحرت ..ما كانو عرفانين بانو خوفي من انو اخسرو لعمر اكبر من خوفي ع ايا شي تاني بحياتي..
طلعت من المشفا وما حكينا بموضوع عمر ابدا.. بابا بطلني من المدرسة وحبسني بالبيت وما عدت شفت عمر ولا سمعت عنو شي.. كانت فترة كتيير صعبة ..فجاة وحدة سرقو مني الفرحة يلي كنت عم عيشا.. ما عطوني السعادة ولا تركوني عيشا..
بعد الحادثة بشي شهر تقدملي رجال باول التلاتين ..كان رجال عزابي ومعو مصاري كتير ..
بابا: لانا جهزي حالك في ناس جايين يشوفوكي واياكي ثم اياكي تعملي شي هيك ولا هيك قدامن الا ادبحك باديي هدول
كان عم يهددني بالدبح.. ما بعرف انو تصرفاتو معي كانت ابشع من الدبح..
اجى الشب يوما مع اهلو وخطبوني بنفس الجلسة ووافق بابا بنفس الجلسة كمان وباعني او كبني ..كنت حمل تقيل كتير عليه وشالو عن كتافو..
لانا: بترجاك يا بابا ما بدي اتزوج بترجاك ..لك هالرجال من عمرك حرام عليك
بابا: حرام علي!!! .. لك مين بدو يطلع فيكي بعد عملتك.. حمدي ربك يلي يسرلك هالرجال..
لانا: حرام عليك يا بابا.. انا بنتك لك والله ما غلطت والله
بابا: لانا الموضوع خلص ..وانا عطيت كلمتي لا اتعبي حالك واتعبيني معك
تمت خطبتي من خالد ..وبعدا بشهرين تزوجنا .. عيشني ببيت حلو كتير وكان كتير مدللني بس انا وقتا كان قلبي وروحي مع انسان تاني ..كانو مع عمر ..كنت عايشة معو لخالد بلا مشاعر.. كان الحزن باين بعيوني وجسمي يوم عن يوم عم ينحف .. شوقي لعمر كان عم ينهش بجسمي شوي شوي متل السرطان يلي كان عم ينهش بجسمو لخالد… اي هاد يلي صار.. خالد صابو سرطان اكلو جسمو اكل وبعد زواجنا بسنة وحدة بس خالد مات…
خالد كان رجال كتير منيح ما غلط معي ابدا ولا هاني ..كان حاسس باني ما بحبو بس ولا مرة غلط فيني.. انا كنت محترمتو لشخصيتو المحترمة ولتعاملو معي بس قلبي ما كان الي سلطة عليه وما قدرت حبو لخالد.. وربنا اخدو لعندو.. يمكن حياتو عند ربنا كانت رحمة الو والي…
(الفصل الخامس)
رجعت لبيت بابا ورجعت لحياتي معو بعد غياب سنة كاملة.. بس هالغياب ما نساه لبابا ولا لمرتو يلي صار.. ضلو بابا ومرتو يهينوني ويقهرو فيني.. وبابا ع طول يضربني لحتى بيوم طفح الكيل معي وما قدرت ضل لانا البنت الضعيفة المستسلمة للقدر يلي كتبو ابوها عليها من يوم خلقت..
لانا: لك خلص يابابا لك بكفيييي لك كسرتني بترجاك خلص
بابا: تخلص روحك الهي واخلص منك.. ربي يسطفل فيكي ..لك ما بدك تبطلي مشاكل مع خالتك
لانا: والله يابابا ما عملتلا شي والله
بابا: وعم تكزبيها كمااان هااا هااا
ضلو يضرب فيني لحتى غبت عن الوعي وما فقت غير بالمشفى
الدكتور: الحمد لله ع سلامتك ..فيكي تحكي معي
بابا: لا يا دكتور هي تعبانة
الدكتور: بدي اعرف هالضرب يلي بجسما من مين
بابا: لك قلتلك وقعت عن الدرج
لانا: لا يا دكتور انا ما وقعت عن الدرج.. بابا يلي ضربني.. وهاي مو اول مرة
بابا اطلع فيني وهو مصدوم.. ما كان متخيل انو احكي هيك.. كان متوقع متل كل مرة ضل ساكتة وخبي
الدكتور: لكن رح روح نادي للشرطي لحتى تقدمي شكوة
لانا: اي دكتور بدي اتشكى عليه هو ومرتو
كنت عم احكي وصوتي مخنوق ودموعي ع طرف عيوني..
بابا ما قدر يتمالك اعصابو وهجم علي وبدو يضربني بس الدكتور وقفو وطالعو برة الغرفة بالغصب واجت الشرطة وشحطتو ع المخفر.. وانا رفعت عليه قضية واخدو منو تعهد انو ما يتعرضلي ابدا …
وهون بلشت حسن من حياتي شوي واخلص من قيودو لبابا
ضليت معو بالبيت ..بس كنت متل الغريبة ما احكي معن ولا اختلط فيهن.. اول شي عملتو بانو رجعت كملت مدرستي واخدت البكالوريا ودرست تمريض.. تعبت كتير بهالفترة بس الحمد لله تعبي ما راح هيك واثمر.. خلصت دراستي بالتمريض بامتياز وتوضفت بمشفى وبلشت عيش حياتي بين المرضى والناس يلي بحاجة لمساعدة.. كنت كتير افرح بانو عم ساعد الناس وداويلن جرحن ووجعن ..
الدكتور: لانا بسرعة روحي في حالة ولادة جاي مستعجلة وباينتا مخطرة.. روحي هلا بلحقك
لانا: حاضر دكتور
طلعت لشوف الحالة.. اول ما طلعت انصدمت من يلي شفتو.. كان هو ..اي هوو لك هالوش مستحيل انساه ولو بعد مييييت سنة.. هاد عمر والله عمر.. بعد هالسنين كلا شفتو لعمر… بس ما كان متل ما كان.. عمر صار الو بيت وزوجة وولد جاي ع الطريق
وقفت للحظة وانا مصدومة ..عمر ما كان شايف شي.. كان كل عقلو بمرتو يلي عم تتوجع.. ما كان عم يطلع غير بمرتو..
عمر: ساعدوها بترجاكن ..مرتي تعبانة ..وقعت وعم تنزف
صوتو وهو عم يترجا فيني صحاني من صدمتي
لانا: حاضر بعيد شوي لاخدا..
كانت قاعدة ع كرسي جرار اخدتا منو وفوتا ع غرفة العمليات.. كانت متل الملاك.. صغيرة ووشا بريئ كتير عم تتوجع وتترجا بانو ساعدا…
بلشو دموعي يهرو ع خدودي.. قلبي وجعني كتير ..بعد كل هالسنين اجتمع بعمر بهيك موقف..
اجا الدكتور وعمل عملية مستعجلة لمرتو لعمر.. عمر كان ناطر برا وهو ع اعصابو وعم يستنا بمرتو وابنو..
الدكتور: حالتا كتير صعبة عم تفقد دم بصورة كتيير كبيرة
لانا: دخيلك يا دكتور ساعدا
الدكتور: لك شبك هاي مو اول حالة بتواجهنا لشو عم تبكي.. هدي خلينا نقدر نساعدا
كنت واقفة حدو للدكتور وعم ابكي كنت خايفة تموت مرتو لعمر.. ما كان بدي عمر ينكسر قلبوو ابداا
شق بطنا الدكتور وطالع منو ملاك صغير ولد متل القمر..
الدكتور: لانا خدي للولد ونضفيه ولبسيه بسرعة
ما كنت متخيلة ييجي هيك يوم واحمل ابنو لعمر بين اديي ..مسكتو للولد وضميتو ..حسيت بحنية كبيرة اتجاهو.. غسلتو ولبستو ولفيتو وطلعت فيه لعند عمر..
طلعت كان عمر قاعد ع المقعد وحاطط راسو بين اديه وصفنان بالارض..
لانا: مرحبا.. مبروك ابنك
عمر: الله يبارك فيكي ..كيفا مر…
وهو عم يحكي اطلع فيني ..انصدم وما كمل كلاموو..
عمر: لانااا
لانا: اي لانا.. مبروك ابنك
عمر : الله يبارك فيكي…
دمعو عيونو لعمر.. وبان الغضب عليه وكمل كلامو: كيفا مرتي
لانا: الدكتور معا هلا بطمنك عليها..
كنت واقفة وعم احكي معو بوقت ما طلع الدكتور من الغرفة.. ركض عمر ع الدكتور: كيفا مرتي دكتور
الدكتور (اطلع بعيونو لعمر) : البقية بحياتك يا ابني.. ربنا يعوضك خير..
انا ما قدرت سدق يلي انحكا ..ركضت ع الغرفة والولد بئيدي.. رحت شفتا كانت مغمضة عيونا متل الملاك ..قربت عليها لاتاكد ما كان في لا نبض ولا نفس.. وقفت فوق راسا وابنا بئيدي اطلعت فيه للولد وصرت ابكي من غير وعي.. كل الحزن يلي بقلبي طلع بدموعي بهداك الوقت…
طلعت كان عمر قاعد ع المقعد وصفنان … كان ضايع ..ضايع كتير ومانو عرفان شو يعمل.. قعدت حدو وصرت هدي فيه.. ما كان قدران يطلع فيني.. اطلع بابنو ونزلو دموعو اخدو مني وحطو بحضنو ..بهديك اللحظة وصلت امو لعمر واهلو ..شافو عمر بهالحالة عرفو بانو مرتو خلص راحت.. كان الموقف كتير صعب ..صرت ابكي معن وكاني الي سنين بعرفا لمرتو.. عزيتون فيها وانسحبت من بيناتن..
(الفصل السادس)
مرق اسبوع على هالحادثة.. يلي قلبت كياني ورجعتني سنين لورا.. كنت موجوعة كتير..
موجوعة من عمر يلي حب وتزوج.. موجوعة من نظرات الغضب والعتب يلي كانت بعيونو لعمر وقت شافني.. موجوعة ع الولد الصغير يلي انحرم امو من اول نفس الو ع الدنيي.. موجوعة من كلشي.. حالتي كانت صعبة كتير.. لحتى اجا يوم كنت طالعة من غرفة التوليد ولقيت عمر قدامي
لانا: عمر!!.. اهلا وسهلا كيفك
عمر: ليش هيك عملتي.. بدي افهم
لانا: عمر انا…
عمر: شو انت؟ ليش تركتيني.. لك كرمال كم ليرة تركتيني ونسيتيني.. كنت مفكرة ما رح اعرف بانك تزوجتي رجال غني وتركتيني كرمال مصرياتو..
لانا: عمر انت فهمان غلط.. بترجاك خليني فهمك
عمر: وانا جاي لافهم
لانا: خلينا نروح لشي مكان نحكي فيه
طلعنا ع كفتيريا الجامعة.. قعدنا وخبرتو بكل شي صار معي من وقت انمسك التلفون وانتحرت للوقت يلي شفت فيه عمر بالمشفى.. كنت عم احكي وعمر يبكي..
عمر: كل هاد صار معك.. لك انت مجنونة.. بتنتحري كرمالي.. لك لو صرلك شي بسببي شو كنت رح اعمل
لانا: عمر انت ما بتعرف انت شو بالنسبة لالي.. لك انت الهوا يلي بتنفسو.. من يوم افترقنا ما رجعتلي الضحكة ..قلبي وقف ع اخر اتصال بينا.. حياتي كلا كانت بلا مشاعر ولا احاسيس بغيابك
كنت احكي وقلبي عم يدق بصورة غريبة ..تخيلتو رح يوقف بايا لحظة… وانا عم احكي ما لقيت غير عمر ضمني وزاد بالبكي….
عمر: ولا لحضة نسيتك ولا غبتي عن بالي ..انا بدي اياكي ..انت انت وبس ..ما بدي شي غيرك
دموعي صارو ينزلو ما بعرف كيف.. ولا بعرف شو الدموع يلي عم تنزل .. دموع فرح او دموع حزن ما بعرف…
عمر: لانا بترجاكي توافقي ع طلبي.. انا بدي حقق حلمي.. بدي اياكي مرتي.. خلينا نتزوج ونربي ابني سوا..
ما كنت مسدقة يلي عم اسمعو ابدااا.. لك معقول بعد هالسنين وبعد كلشي صار ربنا جمعني بعمر وبهيك ضروف.. لك معقول انا وعمر نتزوج.. ما بعرف فسر المشاعر يلي كانت بقلبي ابدا..
لانا: انا بتمنى ضل العمر كلو حدك.. لك انا ما بدي شي من الدنيي غير كون حدك..
بعد باسبوع من هاليوم تمت خطبتي انا وعمر حب حياتي ..وبعدا باكم يوم تزوجنا والحمد لله..طبعا اهلو لعمر كانو كتير فرحانين فيني يمكن لانو كانو بدن ام لحفيدن او يمكن لانن شافو الفرحة يلي كانت بعيون عمر وهو حدي..
حياتي مع عمر كل يوم فيها جديد.. كلا حب وحنان.. ربنا عوضني صبر السنين كلا بعمر نساني كل وجعي وصار هو سندي واماني وكلشي حلو بحياتي..
احكولي رايكم بتعليق 😎
