مقلوبة الفول الاخضر بالدجاج مين بحبها؟

 

المكونات:

دجاج او لحمة ( حسب الرغبة ) مقطعين و مغسولين

ارز منقوع ( حسب الكمية )

فول اخضر بقشرة منقى و مفروم

زيت

معلقة من كل نوع من البهارات ( او حسب الرغبة ):

فلفل اسود

بهار سادة

رشة زنجبيل بودرة

ماجي بودرة

ملح حسب كمية الارز

رشة صغيرة كتير كركم

الطريقة:

اول اشي منسلق الدجاج

بعدين منقلب الفول بشوية زيت مع التحريك كل شوي حتى يذبل

بعدين مناخد من مرقة الدجاج شوي و منضيفها على الفول حتى يستوي

ومنتركه حتى يتنشف شوي و ياخد لون بس بدون اضافة اي بهار عشان يضل لونه اخضر

بعدين منغسل الارز و منبهرة بالبهارات السابقة

ومنصفي الدجاج من المرقة و منخليه على جنب

ثم منطبق المقلوبة بالطنجرة كما يلي

اول اشي منحط رشة من الارز بقاع الطنجرة

ثم منضيف طبقة من الفول الاخضر ثم نضع الدجاج

ثم منخلط الارز مع كمية الفول الي ضلت و منحطه فوقهم

طبعا منضيف مرقة الدجاج او اللحمة على الارز ومنخليها لتستوي و منقدمها و صحة وهنا