نصايح لتطويل الشعر عن تجربة 😃
أنا طول حياتي من و انا صغيرة شعرى ما ييطولش بسرعة
و غير كدا أنا أصلاً بحب شعرى وهو قصير فكان كل ما يطول حبة أقصه خالص
و فعلاً عملت كدا من حوالي 9 شهور و قصيته زي رابونزل كدا 😂😂
في لحظة عصبية و تهور
و قررت بعدها أني عاوزه أطوله هاقولكم علي اللي عملته و نفع معاي
قي البداية أنا شعرى جات له فترة كان بيسقط بغباء و خف جدا جدا
و دا اللي خلاني أقصه
لأن قلبي كان بيوجعني كل ما أسرحه و ألاقيه بيقع بالمنظر دا
و الحمد لله بدأ يرجع تاني و غير كدا طول 💃
1: الأهتمام بالتغذية و الفيتامينات و المكملات الغذائية
الكلام المعروف دا😂😂 بس الفكرة أن فعلا أي مشكلة ظاهرية حلها بيبتدي من الأساس الأهتمام بالأكل مظبوط و البروتينات كويس سواء لحوم أو بقوليات و اخد الحديد و الزنك بإنتظام و شرب السوايل بالشكل الكافي خلصنا من خطوة التغذية
2: نبدأ بغسل الشعر ، نصيحة و عن تجربة الشامبوهات دي أكتر حاجة بتضر الشعر و بتنشفه نبعد عن الشامبوهات بالذات اللي فيها صوديوم و سلفات و نتجه للحاجات الطبيعية و الطبية ، في شركات كتير دلوقتي بتعمل منتجات طبيعية و شامبوهات مافيهاش صوديوم دا غير أن صابونة زى صابونة زيت الزيتون حلوة جدا و أنا قعدت فترة طويلة أستخدمها بالنسبة لخطوة الشامبو دي فأنا بقالي سنين مابستعملش أي شامبو 😎 و دا فرق معاي جدا + أني بقدر الأمكان بحاول ما أستخدمش غير الحاجات الطبيعية
* تعديل * في حاجة نسيتها مهمة جدا و هي أن ممكن تستخدموا شامبو جونسون للأطفال أقل ضرر جدا من الشامبوهات التانية جربته فترة بالذات لما بغسل حمامات الزيت بس باردو أفضل الحاجات الطبيعية
و كمان حاجة افتكرتها لما جربتها كانت حلوة جدا بس للاسف ما استمرتش عليها و هي أنك تغسلي شعرك بميا من الفلتر أو ميا معدنية أو تغلي ميا و تسيبيها تبرد خالص و تستخدميها .. الفترة اللي كنت بعمل فيها كدا كان فعلا شعرى مش بينشف و لا بيهيش بسبب الكلور اللي في الميا و الأملاح الزيادة
3: إستخدام مشط خشب للتسريح ، بلاش البلاستيك
الخشب مابيسببش أستاتيكية في الشعر زي البلاستيك غير أنه بيمص الدهون الزيادة علي الشعرة ، ع العموم يعني أي حاجة أقرب للطبيعة أفيد للجسم و الجسم بيقدر يتفاعل معاها و يستفيد منها اكتر
4: الإهتمام بحمامات الزيت ، أنا وصلت في فترة كنت بعمل كل يوم ، بحط كمية قليلة علي الشعر و الفروة و ادلكهم قبل ما انام و أصحي أغسل شعرى ، دا مش صح اوي أنا عارفة بس لكل واحد طبيعة شعر مختلفة و لاااااازم نركز في الحتة دي لازم الواحد يعرف نوع شعره عشان يختار له الأنسب ، بس فعلا الزيوت بتفرق جداااا … من اكتر ماسكات الشعر اللي بحبها و حمامات الزيت
*البيض و العسل و زيت الزتون* دا ماسك رائع جدا و عن تجربة … *زيت جوز الهند و زيت الزتون* …* زيت الجرجير و زيت جوز الهند* .. و زيت حبة البركة دا فظييييع حطي كمية قليلة جدا و دلكي بيها فروة راسك و نامي بيه و لما تصحي أغسلي شعرك … أو استخدميه كحمام زيت مع زيت جوز الهند و زيت الزتون معلقة صغيرة منه كفاية اوي … سواء هاتحطي أنتي الزيت أو تجيبي خلطات زيوت جاهزة
المهم الإستمرار و علي الأقل مرة واحدة في الأسبوع و هاتحسي بالنتيجة في وقت قليل
* تعديل *
بالنسبة للزيوت لازم أاكد أن أي حمام زيت من ساعة الي 5 ساعات مايزدش عن كدا و لو حد بيستخدم الزيوت للتسريح فتبقى كمية قليلة علي الشعر بس .. بلاش الزيت يفضل ع الفروة مدة طويلة عشان بيسبب تراكم الزيت و الدهون علي فروة الراس و بيقفل المسام و بيسبب قشرة … فناخد بالنا و أنا أكدت علي زيت جوز الهند لأن هو من أخف الزيوت و الشعر و الفروة بيمتصوها بسرعة ، ، للتسريح أو لتدليك الفروة نختار زيوت خفيفة جدا حمامات الزيت مش مشكلة لأنها هاتتغسل
5: طريقة تسريح الشعر :
دا بقي أهم عامل بالنسبة لي .. تغير أتجاه جذور الشعر بإستمرار
غلط جداااا أنك تفضلي عاملة شعرك بطريقة معينة ، يعني في ناس دايما عاملة كحكحة أو دايما عاملة ديل حصان و هكذا ، دا غلط جدا لازم نغير أتجاه الشعرة نفسها بإستمرار ، أكتر حركة بحبها و اللي فعلا بتعمل فرق هي أن وقت النوم بعمل شعرى كحكة لقدام كدا 😂 صحيح شكلها بيبقى مسخرة بس هي بتفرد الشعر لما تصحي من النوم كمان لما بتتعمل كدا بتغير إتجاه الشعر لقدام و لما تصحي تسريحه عادي دا بيفرق ، يعني الأهم ماتثبتيش و ماتعوديش شعرك علي اتجاه واحد أقسميه مرة من النص و مرة تلت و تلتين و مرة لميه لفوق و مرة علي جمب و هكذا و فعلا هاتحسي بفرق
6: تدليك فروة الراس :
قبل النوم نزلي راسك شوية بحيث الدم يوصل أسرع للراس و اعملي تدليك لفروة الراس في شكل حركات دائرية عكس عقارب الساعة لمدة خمس الي عشر دقايق دا ييحفز البصيلات و بينشط الدورة الدموية في فروة الراس بس باردو أهم حاجة الاستمرارية
7: أدي شعرك الحرية :
😂😂 خليه ينطلق ، ماتربطهوش دايما خليه يتنفس ، مافيش مانع أنك وقت النوم تسيبيه مفرود بعد ما تعملي له مساج لو مش حابة تسبيه مفرود الصبح ، بالذات للبنات المحجبة لازم شعرك يتنفس
* تعديل *
نسيت اقول أن من الحاجات اللي ساعدتني جدا اني دايما بقص الأطراف
ماتخافوش م الخطوة دي بالعكس دا بيطول الشعر فعلا
كل شهر قصوه بس حاجة بسيطة أد واحد سم بس أو أقل
8: أعرفي شعرك محتاج أيه :
لازم تفهمي شعرك و تشوفي اللي ناقصه عشان تقدرى تهتمي بيه صح ، هل هو محتاج ترطيب و لا هو محتاج أنك تمديه بالبروتين اللازم لتغذيته و هكذا .. حبي شعرك جداااا و حسي هو محتاج أيه ، و الله يا جماعة الخطوة دي مهمة جدااا و الكل دايما بيتريق علي بس فعلا بتفرق ع الأقل نفسيا ، حبي شعرك أي كان أيه طبيعته و عامليه حلو و بحنيه حتي و انتي بتسرحيه و بتهتمي بيه و كلميه ” و الله ما بهزر ”
الرسول قال لنا ” من كان له شعر فليكرمه ”
فليكرمه !! شايفين الكلمة
أي حاجة حتي الجماد لما بتعامليها حلو بترد لك المعاملة
عاملي شعرك حلو و حبيه و كلميه * و الله مابهزر *😃😂
و أفهمي هو محتاج أيه هتلاقيه زي الفل معاكي ❤
و في النهاية ربنا يبارك للكل في شعره لأن دا نعمة و الله نعمة لازم كل ما الواحد يسرح شعره أو يبص له يحمد ربنا عليها كتيييير جدااااا
