قصة رائعة جدا ادعوكم لقراءتها تابع قصة ڪوليـــا بجميع اجزائها

قصة رائعة جدا ادعوكم لقراءتها تابع قصة ڪوليـــا بجميع اجزائها

جوجل بلس

‏‏‏‏‏‏‏‏‏‏ 📝📚 #قصــــــــص_وروايــــات 📚

🧖🏻‍♀♥ ڪوليـــا♥🧖🏻‍♀
➰ الجزء الأول➰

علق بتم ليصلك كل جديد

✭في منتصف الليل كان لؤي وأصحابة مجتمعين في دكان العم عبدالرزاق الي هو ابو لؤي وكان كل واحدفيهم يحكي قصص وكانت الجلسة حلوه ومبسوطين شباب الحاره

✭ابولؤي:يلا يا شباب انابروح للبيت الان الوقت تأخر تصبحوا ع خير الشباب:وانت من اهل الخير ياعم ابو لؤي : يا لؤي لا تتأخر وغلق الدكان بدري وادي للشباب عصير وكيك

✭لؤي:حاضر يا ابي ولا عليك …… والشباب ما بدي لهم شي كل مره يخسرونا ومامنهم غير الخساره علي:والله غصب عنك عمي قالي ادي وانت ما عليك الا تنفذ كلامه الكل:ايوه والله انك عتدي ابولؤي:هههههههه…. الله معكم لا تتأخر يا لؤي
روح ابو لؤي للبيت الي يبعد عن البقالة دقائق بس
ام لؤي:وين ابنك؟
ابو لؤي:الناس يقولوا اهلآ وسهلآ نورت بيتك تعشيت
ام لؤي:انا اسفه بس انا قلقت ع ابني وحيدي الساعة وحده وانت روحت وحدك وابنك في البقالة ابولؤي:مالش صلي ع النبي الي يسمع عيقول ان ابنش عمره10 سنين لا تخافي هكذا
ابنش قده رجال وما يحصله الا كل خير ولو في شي ولا شي اصحابه معه والمسدس في الدرج ام لؤي:يالله …. نفسي افهم كيف انت هكذا ابنك وحيدك كل مره تخليه في الشارع للفجر وانت تروح تنام ولا همك شي وعادك تقولي ع المسدس وبعدها صح ان ابني عمره 20 بس في نظري عاده ابن سنه
ابو لؤي: استغفرالله العظيم كل يوم ونحنافي هذا الخبر ابنش ما رضي يروح واصحابه عنده ايش افعل اطردهم من البقالة ؟
ام لؤي :ايوا لو جلوسهم با يضر ابني امنعهم يجلسوا الولد مابينام خالص وكيف اهاليهم ما يسألوا عن اولادهم لهذي الساع
ابولؤي :والله ما باقي لش الا هذا تتحكمي في اولاد الناس كمان خلي ابنش ع راحته ولا تضغطي عليه ولا تضغطي عليا لو سمحتي
ام لؤي سكتت ماعرفت ايش ترد بس هي كانت تخاف ع ابنها قوي لأنه وحيدهاومالها غيره بس كانت تضغط ع لؤي قوي بتصرفاتها وتمنعه من كل شي هو يحبه وكانت تنزعج من تعلق لؤي باصحابه وكانت تضغط عليه بأشياء كثيرة لدرجة ان لؤي يحب يقضي معضم اوقاته في الشارع او في غرفته عشان يهرب من امه وتصرفها الي يزعجه معضم الأوقات
ام لؤي: والله لو يحصل لأبني شي ما أسامحك عمري
ابو لؤي:انتي من زمان وانتي تحسي ان ابنش با يحصله شي ومارضيتي تدخليه المدرسه الا بعدما وقع عمره9 وبالغصب من خوفش هذا الي ماله معنى استودعيه الله وان شاءالله ما يحصله شي بس انتي اصلآ بلا إيمان
ام لؤي:طبيعي اخاف ع ابني وحيدي
ابولؤي:ووحيدي انا كمان بس يا مره غلقي هذا الموضوع لانه ليل ما اشتي اتعصب وارفع صوتي قررت ام لؤي تسكت لأنها حست فعلآ بأن زوجها تعصب
في البقالة علي:يلا يا شباب كل واحديحكي لنا قصة مرعبة حصلت معه او مع غيره خالد:انا ما حصل معي اي موقف مرعب او سمعت عنه
هيثم:لا تصدقوا خالد هو يشتيي يغلق الموضوع لانه يخاف من هذي القصص
لؤي:انا عن نفسي ما اصدق هذي القصص
علي:إي نوع من القصص ما تصدقها؟

لؤي:قصص الجن وما جن
علي:بس الجن مذكورين في كتاب الله
لؤي:ونعم بالله انا اعرف انهم موجودين بس كل الي يقولك ان الجن ظهروا لهم كذابين الله عمل بيننا وبينهم عشاء وما نقدرنشوفهم وما يقدروا يعملوا فينا شي

✭خالد:بس يقدروا يتلبسوا في اي شي ويظهروا لك مش شرط انهم يظهروا بهيئتهم الحقيقية….. اعوذبالله من الشيطان الرجيم هيثم:هههههههه قد قلتلكم انه جبان الكل :هههههههههههههههه علي:يلا احكوا لي قصص عنهم
خالد:انا با روح تأخر الوقت وابي بيتصل من أول والتلفون صامت الكل :هههههههههههه
هيثم:روح روح من غير اعذار خالد:تصبحوا ع خير
الكل:وانت من اهل الخير
علي:يلا احكوا
هيثم:انا بحكي لكم قصه حقيقية حصلت في قريتنا
لؤي:يلا ايش ورانا نسمع
هيثم:كان يماكان في قديم الزمان .. علي:بطل خباله واقطب مش وقت اسبيستون
الكل:ههههه
هيثم :كان في موكب زفاف جاي لقرينا في الليل واغاني ورقص وجنان تقريبآ كانوا حوالي 8 سيارات ووقفوا في مكان معروف انه مكان الجن ما اتذكر ليش وقفوا في ذيك المنطقة ولكن حصل شي محد قدر يفسرة للأن
علي:ايش حصل؟
هيثم:في 3 رجال اختفوا
لؤي:كيف اختفوا؟
هيثم:تذكرت الان ليش وقفوا في هذي المطقة كانوا محصورين والثلاثه الي نزلوا اختفوا بعد ما سمعوا الباقين اصوات تخوووووووف ما قدروا ينزلوا من السيارة من كثر الخوف الي كان فيهم بسبب الأصوات الي سمعوها فقرروا يهربوا من المكان بس وهم يشغلوا السيارات كان في شي معلق خلف كل سيارة وكانوا اشكال غريبة محد قدر يركز ع الاشكال بس قالوا كان في احسام تطير
علي :اعوذ بالله من الشيطان الرجيم … وقفت شعر جسمي

✭لؤي :كمل كمل خلينا نسمع الخرط هيثم:طيب ….. وبعدها حاولوا يشغلوا السيارات وتحركوا بسرعه بس للأسف انقلبت السيارات بسبب السرعة والظلام وما عاشوا الا بعضهم وتقريبآ ماتوا 21شخص نسوان ورجال

✭لؤي:طيب لو كان الطريق ظلام كيف شافوا الجن الطائر؟
هيثم:اساسآفي
هذي المنطقة لو تمر اي سيارة مضويه تطفي وما تشتغل الا بعد ما تخرج منها وما اظن ان الي نجوا من الموت بايكذبوا وهذي مش اول حادثه تحصل هناك لؤي:من الطبيعي تحصل حوادث بسبب الظلام وانا عن نفسي ما اصدق هذي الخزعبلات

علي:طيب و3 المفقودين فسرلي وين راحو

✭لؤي: ايش دراك انهم مفقودين لوكانوا صبروا وانتظروهم كانوا لقوهم بس اول ما سمعوا الأصوات هربوا والله واعلم ايش هي الأصوات الي سمعوها يمكن صوت كلب او ذئب او صرصور الليل ههههههههههه

علي:انا با قولك قصة با تصدقها
اكيد لؤي:ما اظن اني ممكن اصدق هذي الاشياء

✭هيثم:انت لازم نأخذك للبيت المسكون الي في الحارة الي ورانا محد يقدر يقرب من هذيك الحارة بسبب الي يحصل هناك اكيد بعدها با تصدق
لؤي:هيا قوموا الان نسير…

🚫 يسعدنا مشاركة الرواية مع من تحب لكن لا نحلل حذف التوقيع لأي سبب كان ..

⬅ .. يتبع الــجـــــزءالثاني ..➡

 

 

‏‏‏‏‏‏‏‏‏‏ 📝📚 #قصــــــــص_وروايــــات 📚

🧖🏻‍♀♥ ڪوليـــا♥🧖🏻‍♀
➰ الجزء الثاني➰

✭لؤي:يلا قوموا نسير الان تحركوا علي:صح انا شجاع بس مش لهذي الدرجة
هيثم:وانا مستحيل اسير في ذاك البيت في هذا الوقت
لؤي:قولي ايش بيحصل في البيت المسكون خليني اضحك

✭هيثم:مش وقت الساعه 2 خلينا نروح
لؤي :طيب انتظروا اغلق البقالة ونروح جمعه
علي:ويحكي لنا هيثم عن البيت المسكون في الطريق
لؤي :فكره لاني مابقدر اتحمل لبكره لازم يحكي لي الان ما بش معي صبر
خرجوا الشباب من البقالة وهيثم بدء الكلام
هيثم :البيت المسكون الي في الحارة الي ورانا قصته ان هذا البيت بنوه فوق مقبرة واي حد يسكن هذا البيت يحصل له بلاوي لؤي:مثل ايش ؟

✭هيثم:كان في عائلة مكونه من 4 اشخاص سكنوا في هذا البيت اول يوم كان كل شي طبيعي بعد فتره كانوا يسمعوا بعد نص الليل اصوات أشياء تتحرك في الحمام و الحنفية تنفتح وتتسكر واللمبه تطفي وتولع كل اشويه يعني كان يحسوا باشياء مش طبيعية بالبيت بس حاولوا يتجاهلوها بس كل يوم الرعب يزيد اكثر واكثر
لؤي:ليش؟ ايش الي حصل اختصر باقي اشويه ونوصل
علي:خلاص يا هيثم لا تتكلم والله اني بدأت اخاف والدنيا ليل لؤي:باخي بطل الخوف والله ياهيثم ما تدخل بيتكلم الا بعد ما تكمل القصة

✭هيثم: طيب ….. في يوم سمعوا اصوات غريبه راحوا يشوفوا لقوها دمة سوداء داخل البيت رغم ان الأبواب كلها مغلقة وغير هذا كانت واحده من افراد العائلة تقوم كل يوم وشعرها مقصوص وما تعرف من ايش السبب ولا كانت تلقي أثرشعرها المقصوص علي:اعوذبالله ياهيثم خلاص خوفتني
لؤي:روح انت ياعلي لو انت خايف اصلآ كل هذا الكلام خرافات وما اصدق انا اشتي احلل القصة بالمنطق اكيد الأصوات الي كانوا يسمعوها في الحمام صادره من الجيران او كانوا يتوهموا واما اللمبه يمكن كانت خاربه والدمه السوداء اكيد دخلت من الباب او من الطاقة من غير ما يلاحظ احد والشعر المقصوص اكيد في حد قص شعرها واخذ الباقي
هيثم:اناعارف انك ما تصدق هذي القصص ولكن تحليلك كله غلط وماله معنى الي يشتي ينفي هذي القصص يدي مبرر مقنع
لؤي:طيب كمل
هيثم: عمومآ في حوادث كثير حصلت في ذيك الحارة ومنها الأنتحار لقوا حاولي 6 اشخاص منتحرين بنفس الطريقةوجنبهم دمه سوداء ميته
علي:اسألتكم بالله لا تتكلموا عن هذا الموضوع
لؤي:صح الان أكتفيت والساعه 3 ابي بايقتلني علي:يوووووووووووووو
هيثم ولؤي:مالك !!!؟ ليش بتصيح؟ علي:اعوذبالله من الشيطان الرجيم شوووفوا الدمه _قطة _ السوداء الي جنب القمامة
لؤي:وين؟
هيثم:مالك ما بتشوفها ؟…..جنب الكيس الأسود

✭لؤي:يعني كيف باشوفها وهي سوده وجنب كيس اسود هههههههههه علي:لاتضحك مش وقت الضحك والله لا تروحوني للبيت وبعدها روحوا
هيثم:الحمدالله علي انضم لخالد هههههههههه
لؤي:هههههه….. يلا بسرعة تأخرنا وصلوا الشباب علي وبعدها هيثم وكان لؤي اخر واحد لان بيته ابعد منهم وكان في الشارع لوحده وكان يتخيل كل اشوية ان في حديمشي وراه وكان حاسس ان في حد يراقبه حاول يمشي بسرعه فجئةسمع صوت وراه التفت وعينه جت في عيون الدمه عيونها تلمع وفي نفس الوقت الكلاب نبحت من الخوف تسمر لؤي مكانه وغمض عيونه واخذ نفس وكان يقول لنفسه لؤي:اعوذبالله مافيش حاجة هي دمه بس
وفتح لؤي عيونه وما لقي الدمه مكانها راح للبيت جري وصل البيت وحاول يفتح الباب بهدوء بس للأسف الي كان خايف يحصل حصل اول ما فتح الباب شاف امه جنب الباب تنتظرة يدخل عشان تبدء تعاتبة ع التأخير
ام لؤي:حمدالله ع السلامة …. في واحد محترم يدخل البيت في هذا الوقت
لؤي:يما االله يحفظش مافي داعي تقولي لي كل يوم نفس الكلام
ام لؤي :والله يابني لو انت تفهم كلامي ماكنت باقولك نفس الكلام لؤي:ايش افهم ؟
ام لؤي:ابعد عن اصحابك الي مايجي من وراهم الا الخراب لؤي:انتي تشتيني ابعد عن كل الناس واجلس مثل النسوان تحتش لا خرجة ولا عمل
ام لؤي:لو هذا الشي بايخليك بخيروسالم انا مستعده اعمله واخليك جنبي
لؤي:من الي با يضرني لوخرجت؟ ولا لواشتغلت ؟
ام لؤي:اهم شي عندي انك تبعد عن اصحابك
لؤي:انا اسف يمه مستحيل ابعد عن اصحاب الطفوله عشان وهم في راسش
ام لؤي:وهم في راسي قدك مثل ابوك بتقول اني اتوهم
لؤي:يما صلي ع النبي ليش بتبكي الان انا ما اسخي ع دموعش تنزل بسببي ولكن حاولي تفهمي اني كبرت ولازم اعيش حياتي ولي حريتي اصاحب من ما اشتي طالما انهم ما يفعلوا شي غلط ومن حقي اشتغل ومن حقي اعيش حياتي اتاخر او اروح بدري لا تخافي عليا انا كبرت يمه الله يحفظش ولا تقلقي عليا

✭ام لؤي : يا ابني انت وحيدي وانا ام وقلب الام ضعيف لعند اولادها اذا تاخرت خارج اقلق عليك واتخيل ان في عصابة خطفتك او سيارة صدمتك
لؤي: ههههههههههههه يما الله يحفظش بطلي تتفرجي ع المسلسلات الخليجية شوفي مسلسلات اجنية افضل

ام لؤي:ههههههههههه
لؤي:الله لايحرمني من ضحكتش يا احلى ام
ام لؤي :ولا يحرمني منك ومن عافيتك …. تعشيت

✭لؤي:ايوا تعشيت وتعبان بدخل انام وانتي نامي
ام لؤي:طيب ادخل لغرفتك ادفيك واروح انام
لؤي:يعني مافيش فائدة انا كبرت مانيش جاهل
ام لؤي :خلاص خلاص فهمت روح نام باس لؤي راس امه ودخل ينام وكان يفكر بكل الي حصل معه اليوم وبدء يحس بخوف من هذي المواضيع ونام من غير ما يحس في نفسه في الصباح دخلت ام لؤي الغرفة تصحي ابنها وتأكله قبل ما يروح البقالة واول مادخلت للغرفة

✭ام لؤي:صباح الخير يانظر…… يو وين الولد؟….. ياعبدالرزاق …. يا رجال تعال بسرعة ابو لؤي جرى بسرعه للغرفة عشان يعرف ليش مرته بتصيح
ابو لؤي:خير يا مره ليش بتصيحي ؟
ام لؤي:ابني مش موجود في غرفتة ابو لؤي:حسبي الله عليش ونعم الوكيل
ام لؤي:مالك بتحسبن عليا ابني مش موجود في غرفته

✭ابو لؤي:ابنش انا ارسلته يدي البضاعه ولو تزيدي تفعلي هذي الحركات اقسم بالله لا اسيرش بيت اهلش جننتيني وجننتي الولد ام لؤي خافت من تهديد زوجها وسكتت ولؤي ماروح يتغدا ولا يتعشى وهي ماقدرت حتى تتصل تطمن ع ابنها بسبب تهديد زوجها طبعآ ابو لؤي سبق لؤي للبيت ولؤي بعد ما روحوا من عنده اصحابه قرر يغلق الدكان ويروح وسمع صوت من بعيد جاي لعنده وكل اشويه يقرب ويقرب بس كان ظلام وما قدر يركز واول ما شاف انصدم وتجمد مكانه من الخوف ……

🚫 يسعدنا مشاركة الرواية مع من تحب ..

⬅ .. يتبع الــجـــــزءالثالث ..➡

 

‏‏‏‏‏‏‏‏‏‏ 📝📚 #قصــــــــص_وروايــــات 📚

🧖🏻‍♀♥ ڪوليـــا♥🧖🏻‍♀
➰ الجزء الثالث➰

✭لؤي انصدم من الشي الي قرب منه حاول يركز بس كان مصدوم ومش عارف وكان يفحس عينه عشان يتأكد لو ان الشي الي بيشوفه حقيقي ولا لا بس بعد ما فتح عينه تأكد انه حقيقي وسرح كان يقول لنفسه ايش الي خرج هذا الجمال للشارع في هذا الوقت ما احلها سبحان الي خلقها قطعت حبل افكاره بصوتها وهي بتناديه وتقول:يا اخ لو سمحت ساعدني امي بتموت مابش في البيت غيري لؤي :حاضر يختي ابشري وين البيت ماقدرت ترد عليه لانها كانت تبكي اشرت له يلحق ورها وطبعآ كان لؤي يمشي بعدها ومش عارف لوين وصلوا لحارة كلها ظلام بدء
لؤي يحس بالخوف والقلق
لؤي:يا اختي وين المكان ؟ قولي لي ردت عليه:خلاص وصلنا الان بس انت اسرع انا خرجت من البيت وامي كانت تاعبة قوي مش عارفه اذا هي بخير او لا
لؤي :ان شاءالله بخير لا تقلقي المشكلة مابش تكسي في هذي الحاره وصلوا البيت ولؤي قبل ما يدخل البيت لقي مجموعة دمم واقفين يتفرجوا له حس بالخوف وكان يشتي يرجع بس صوت البنت وهي تبكي خله ينسي الخوف

✭طلعت البنت وشافت امها وقالت: يما قومي يما جبت لش من يساعدنا نروح للمستشفي يمااااا
لؤي: ابعدي اشوية لو سمحتي ….. البقاء لله شدي حيلش امش ماتت

✭بكت البنت ع امها بااعلى صوت:امي مستحيل تخليني لحالي هي اكيد مدوخه حاول تصحيها يلا ….يما قوي حاولت مره واثنين بس مافي اي حركة تأكدت انها ماتت حضنت لؤي وكانت تبكي ولؤي خاف من تصرفها هذا وانصدم بس فسر تصرفها بأن البنت خايفه وما عندها حد تأثر بسبب حزنها وماقدر يروح الا بعدما يطمن عليها لؤي:صلي ع النبي يختي الله يرحمهاادعي لها ….. اتصلي لاي حد من اهلش يجي عندش انا لازم اروح
قالت له :مابش معي احد انا وامي لوحدنا مقطوعين من شجرة
لؤي:طيب حاولي تهدئي طيب روحي كلمي جيرانكم
ردت عليه:الجران هينا ما حد يوقف مع احد كلهم جبناء وكل واحد يتخبي في بيته حاولت اطلب منهم يساعدوني عشان اخذ امي للدكتور بس محد رضي وضيعت الوقت لغاية ما وصلت عندك وانت ساعدتني بس بعدما فات الأوان وامي ماتت
لؤي :طيب حاولي انش ما تبكي ياا….. ايش اسمش ؟ ردت عليه :اسمي كوليا
لؤي:كوليا اسم غريب كوليا:لوسمحت يا اخي ممكن تساعدني وندفن امي
لؤي:اكيد ولا عليش انا بجلس في الشارع لغاية ما يأذن الفجر ونصلي عليها وندفنها
كوليا :لالالا امي ما ينفع تنتظر للفجرعندها السكر وجسمها اساسآانسلخ انا با غسلها وانت صلي عليها وحدك لانه مستحيل اقبل ان الجيران يصلوا ع امي وهم السبب في موتها لؤي:بس يا كوليا ما ينفع لازم ننتظر والصلاة عليها ….

✭كوليا:لو سمحت هذي وصيةامي ولازم انفذلها الوصية واذا ما قدرت انا با عمل كل شي بنفسي لؤي:حاضرولا يهمش انا باصلي عليها وانتي قومي غسليها كوليا:شكرآ انت شهم وانا مستحيل انسي الي عملته وباحاول اني اردلك الجميل
لؤي:الله المستعان هذا واجبي وإي شخص مكاني با يفعل نفس الي بفعله
قامت كوليا وغسلت امها وبعدها راحوا الاثنين يقبروها وروحوا لؤي :عظم الله اجرش يا كوليا كوليا:واجرك …. ليش انت واقف اتفضل ادخل
لؤي:لا خلاص انا لازم اروح الوقت اتاخر كوليا :بس انا خايفه انام لوحدي
لؤي:لا تبكي لو سمحتي انا ما احب حد يبكي قدامي …. ايش افعل انا ما ينفع ادخل البيت انتي بنت لوحدش
كوليا:ادخل لوسمحت واول ما انام روح لؤي:ماينفع يا كوليا ايش با يقولوا الناس
كوليا:محد داري بحد في هذي الحاره ومافي شي انا واثقة اني ما اعمل شي غلط
لؤي:طيب انا بخرج اول ما تنامي كوليا:تمام اتفقنا شكرآ يا لؤي عبدالرزاق
لؤي:كيف عرفتي اسمي ؟ كوليا :سمعت صاحب القبر لما يسألك انت لؤي عبدالرزاق وانت قلتله ايوه
لؤي:ايوا طلع صاحب ابي وعشان كذا رضي يخارجنا بسرعه ويقبرها في هذا الوقت او كان با يفكرنا قتلنها
كوليا:شكرآ لك ما كنت عارفه كيف كنت بعمل من غيرك
لؤي :يلا الان ادخلي نامي مابش وقت

✭كوليا:هذا اذا قدرت انام
دخل لؤي للبيت وكوليا جابت البطانية وحاولت تنام وكانت كل ما تغمض عيونها تتذكر امها وتبكي و لؤي يتفرج لها ويزعل عليها بس مايقدر يعملها اي شي بعد ساعه نامت كوليا وجلس
لؤي يتأمل في ملامحها الجميلة كانت بيضاء جدآ وانفها طويل وعيونها وساع ورموشها كثيف بالمختصر كانت حلوه وجذابه قام لؤي وخرج دلادلا من البيت وباله وقلبه عندها كتب لها في ورقه قبل ما يخرج لا تقلقي اول مااقوم من النوم باجي اطمن عليش خرج لؤي من البيت وشاف نفس الدمم جنب الباب وتذكرالي حصل معه وهرول للبيت هروله دخل للبيت والحمدالله ان تهديد ابوه لأمه نفع كانت نايمه ارتاح لؤي ودخل ينام ومستعجل متى يجي الصباح عشان يروح لكوليا نام وهو بيفكر في جمالها ووحدتها وكان يفكر في حل يقدر فيه شيوفها كل يوم وايش العذر الي با يقوله لأبوه الصباح عشان لا يروح بدري ويفتح البقاله في الصباح ام لؤي:تعالي كل يا لؤي لؤي:لقميني انا مستعجل ما اقدر اجلس
ابولؤي:مالك

✭مستعجل مابش زباين هذا الوقت
لؤي: انا مش رايح للبقاله
ابو لؤي:طيب وين رايح ؟
لؤي:رايح السوق قالوا في بضاعه حلوه جايه اشتي اروح اشوفها واقولك اذا ينفع اجيبها ولا لا ابولؤي:طيب سير وانتبه تتاخر ام لؤي :طيب زيد كل هذي اللقمة لؤي:تسلمي يا امي …… يلا خاطركم الاب والأم :الله معك
راح لؤي جري لبيت كوليا واخذ معه اكل لان كوليا ما اكلت شي من امس وكان بيفكرويسأل نفسه معقوله اني حبيتها من أول نظره اكيد حبيتها لأني مهتم فيها قوووي وما فارقت تفكير ولا ثانية ومالها حد وحيدة وصل للبيت ولقى الباب مفتوح وافتجع ع كوليا ودخل جري للبيت ……..

⬅ .. يتبع الــجـــــزءالرابع ..➡

‏‏‏‏‏‏‏‏‏‏ 📝📚 قصــــــــص وروايــــات 📚

🧖🏻‍♀♥ ڪوليـــا♥🧖🏻‍♀
➰ الجزء الرابع➰

✭ــــــــــــــــــــــلؤي : كوليا…….. يا كوليا …… وين هذي البنت؟

✭ــــــــــــــــــــــلؤي دورفي كل البيت ومالقى لها إي أثر قبل ما يخرج من البيت حس ان في حد ماسك يده ماقدر يلتفت من الخوف وحاول يشوف من الي ماسك بيده
التفت ولقى
كوليا تبكي وتقوله : لا تروح انا خايفة
لؤي: خوفتيني وين كنتي !؟ من وين جيتي ما شفتش ؟
كوليا: انا كنت في الحمام
لؤي: بس انا دورت في كل مكان وكنت خارج ادورش في الحوش كوليا:انا اشم شم اكل انا جوعانه لؤي:انا كنت عارف انش جوعانه عشان كذا اديت معي اكل انتي اعملي الشاهي بس
كوليا:شكرآ لك ….. الان بعمل تحب السكر خفيف؟

✭ــــــــــــــــــــــلؤي:اعملي الي تشتيه اهم شي ناكل راحت كوليا ورجعت بثواني ومعها الشاهي
لؤي: بسم الله مسرع جبتي الشاهي
كوليا:انا سريعة والجوع خلاني اسرع اكثر
لؤي:طيب تعالي كلي ورايه عمل
كوليا:يعني باترجع تخليني وحدي
لؤي:ايش افعل انتي لازم تتعودي ع الوحده انا ما يفع اجي عندش كل يوم انتي بنت لحالش وبا يتكلموا عليش الناس الناس مالها الا الظاهر كوليا:خلاص الان كل وبعدين نتفاهم
لؤي:طيب كلي وبعدها نزور امش يمكن ترتاحي
كوليا:طيب
اكلوا ويعدها تكلموا اشويه وتعرفوا ع بعض اكثر وكانت كوليا تبكي كل ما تتذكر امها ولؤي يهديها بعد ساعه راحوا للمقابر وصاحب المقابره سلم ورحب في لؤي راحت كوليا عند قبر امها وكانت تبكي وتشكي لها :يما ليش خليتيني وحدي انا خايفه من كل شي انتي مصدر الأمان والان رحتي وخليتيني اعاني يما ارجعي
لي كان لؤي يسمعها وتنزل دموعه من غيرما يحس تأثر من كلامها وكان يفكر كيف يقدر يساعدها من غير ما يسبب لها الأذى
لؤي:خلاص يا كوليا لا تبكي انتي كذا بتعذبيها

✭ــــــــــــــــــــــتلفون لؤي رن …… الو …
ابو لؤي: يا ابني وين انت التاجر جى ويشتي الزلط سير ادي الزلط من البنك بسرعة
لؤي:الان باسير ولا يهمك
ابو لؤي:ايش عملت بموضوع البضاعة؟
لؤي:اي بضاعه؟ …… هاااا ايوا رحت شفتها وما تخارج
ابو لؤي: خير ان شاء الله اهم شي ما تتأخر الرجال منتظر
لؤي:نص ساعه وانا عندك ان شاءالله غلق لؤي وقال لكوليا تقوم عشان يروحهاوبعدها يشوف عمله كوليا:يعني باتخليني لوحدي ؟ لؤي:يابنت الناس ايش افعل اقولش ماينفع اني اشوفش كل يوم وادخل بيتكم ما ينفع الناس يا يتكلموا عنش
كوليا:حرام عليك حس فيني انا خايفه واشتيك توقف معي في هذي الفتره احس ان القدر جمعنا لحكمة عشان تحميني وتساعدني لؤي:صدقيني انا لازم ابعد عشان تتعودي انا في الأول والاخير واحد غريب وانتي لازم تتعودي ع هذا الشي وانا بين فتره وفتره با اجي اطمن عليش
بكت كوليا وقالت له طيب مثل ما تشتي اخذها للبيت وراح البنك يدي الفلوس وروح البقالة وطول الوقت وهو يفكر في كوليا ويمنع نفسه من التفكير فيها وقرر انه ما يزيد يروح لها بس كل ما يتذكر دموعها يزعل عليها اكثر في الليل كانوا الشباب متجمعين في البقالة وكان لؤي مش مركز معاهم وباله مشغول ع كوليا ولأول مره كان يتمنى الشباب يروحوا
هيثم:مالك يا لؤي اليوم انت مش طبيعي بالك مش معنا
علي:ايوا والله انو صدق ايش بتفكر ؟
خالد:اكيد بيحب سرحان مثل العشاق
هيثم:مستحيل لؤي يحب من غير ما يقلي صح ولا انا غلطان يا لؤي؟ علي:لؤي ….. واووو لؤي لؤي:ها ….. بتكلمني ؟
خالد:قلتلكم الولد بيحب محد رضي يصدقني هههههههه
لؤي:مالك انت عارف اني مش حق هذا الخبر
هيثم:انا اشهد انك جلف وما تعرف الرمنسيه رغم انك فارس الأحلام لكل بنت بس فاشل في العواطف علي:سبحان الله …… الله رزقك بالطول والجمال و اخذ منك العواطف
خالد:حرام عليكم تقولوا هكذا مابش حد حنون مثل لؤي
لؤي:كل واحد فيكم قالب نفسه دكتور نفسي ويحللني ….يلا قوموا روحوا اشتي اروح انام ما نمت من امس
هيثم:كيف لك با تروح 12 ابوك با ينصدم

✭ــــــــــــــــــــــالكل:ههههههههههههههه
علي:طيب يلا قوموا نروح وانا والله ابي بدء يتضايق من التاخير هيثم:خلاص اسبقوا انتوا وانا باغلق البقالة واروح مع لؤي
لؤي :ايوا روحوا انتم ونلتقي بكره ان شاء الله

✭ــــــــــــــــــــــخالد:يلا يا علي قوم اقطب قبل ما يجتمعوا الكلاب في الحاره الكل :هههههههههه رواحوا الشباب وغلق لؤي البقالة
هيثم:يلا قولي مالك اليوم؟مابش حد غيري الأن احكي
لؤي: مافيني شي
هيثم:انت أخي وصاحبي واعرفك لو انت متضايق ؟والله انو فيك شي

لؤي:لو فيني شي انت اول شخص باتعرف وما بقد اخبي عليك بس هذي الأيام مشغول في البضاعات وضغوطات خليها ع الله
هيثم:مش مصدقك بس ما بضغط عليك تتكلم ووقت ما تشتي تتكلم انا موجود وبسمعك
لؤي:اكيد اذا في شي باقولك ع طول تطمن ياغالي
راح هيثم لبيتهم ولؤي وصل لباب البيت وما قدر يدخل قرر يروح يطمن ع كوليا ويروح بسرعه لأن قلبه ما طاوعه
وصل لحارتها وركز ان الظلام الي
في هذك الحاره مش طبيعي ولا بيت فيه ضوء رغم أن الساعه مش متأخرة نفس امس خرج تلفونه من جيبه وولع الكشاف وحس بخوف لأنه تذكر الدمه السوداء وكلام هيثم

✭ــــــــــــــــــــــلؤي:اعوذ بالله مابش شي من متى وانا اخاف من هذي القصص والله ان كوليا شجاعة اكثر مني خرجت امس الليل من غير ما تخاف اساسآ كونها ساكنه في هذا المكان لوحدها يعتبربأنها بطلة العالم بالشجاعة بس والله اني ظالم…
البنت تترجاني اجلس معها وانا قاسي صح كلام الشباب ان شاءالله تسامحني كوليا وتفهم موقفي انا ابعد لأني خايف ع سمعتها قطع حبل افكاره واحد رجال طويل وقف قدامه فجئة رغم ان لؤي طويل وعريض بس الرجال كان اطول منه لؤي غمض عينه من الخوف وقال اعوذبالله من الشيطان من انت؟ خوفتني وفتح عينه وافتجع أكثر لأنه مالقي الرجال الي كان واقف قدامه …

⬅ .. يتبع الــجـــــزءالخامس ..➡

 

 

‏‏‏‏‏‏‏‏‏‏ 📝📚 قصــــــــص وروايــــات 📚

**🧖🏻‍♀♥ ڪوليـــا♥🧖🏻‍♀**
➰ **الجزء الخامس**➰

✭ــــــــــــــــــــــلؤي فتح عينة والرجال أختفى حس بخوف مش طبيعي غمض عينه وحاول يمشي وطول الوقت يقراء الأذكار وزاد قلقه ع كوليا وصمم أكثر يروح يشوفها ويطمن عليها وصل بيت كوليا ودق الباب والباب انفتح تلقائي

✭ــــــــــــــــــــــلؤي: كوليا …… كوليا……… مالقي كوليا في البيت دور في كل مكان حتى الحمام ومالقها قلق عليها اكثر وجلس يفكر وين ممكن تروح وخمن ان كوليا يمكن تروح المقابر خرج للبيت وقرر يروح للمقبرة يتأكد وصل لؤي للمقابر ولقى العم ناجي

✭ــــــــــــــــــــــالعم ناجي: آهلين يابني ايش اداك في هذا الوقت
لؤي ارتبك وما يشتي يسأله عن كوليا وقاله: جيت ازور جدي
العم ناجي:في هذا الوقت ؟
لؤي:ايوا حلمته وقلت لازم اجي اقراء له الفاتحة
العم ناجي:تفضل ادخل
شكر لؤي العم ناجي ودخل ……. وشاف كوليا نايمه جنب قبر أمها حزن عليها كثير وراح يصحيها لؤي:مالش ليش جيتي هنا ؟ كوليا:انا خايفة انام لوحدي ومحد يحس فيني غيرامي
لؤي:انا اسف قومي نروح الان وانا بجلس معش لغاية ما تنامي

✭ــــــــــــــــــــــفرحت كوليا وقالت له: شكرآ انت اطيب شخص شفته في حياتي
لؤي:طيب الان مش وقت قومي اخرجي قبلي عشان العم ناجي ما يعرفش انش معي وانا بلحقش كوليا:طيب …… بس لا تتاخر لاني خايفة
لؤي: قالك خايفه …. الخايف ما يجي في هذا الوقت للمقابر …..يلا اسبقي

✭ــــــــــــــــــــــسبقت كوليا وخرجت وانتظر لؤي 5 دقائق ولحقها وقبل ما يخرج وقفه العم ناجي وقاله :يا ابني قبر جدك في الجهة اليمين
لؤي:ها …. ايوا… انا عارف …. بس ضعيت الطريق مع الظلام

✭ــــــــــــــــــــــالعم ناجي:تعال معي انا با رويك لؤي:لالا مايحتاج يا عم قد قريت الفاتحة للكل
العم ناجي: خلاص ع راحتك لؤي:شكرآ ياعم ….. تصبح ع خير العم
ناجي:وانت من اهل الخير
روح لؤي هو وكوليا ومثل كل مره انتظرها تنام وروح وكان طول الوقت يفكر في حل عشان كوليا ومالقي وقبل ما يروح ابوه اتصل لخالد وعلي وهيثم يسأل عليه وقالوا له انهم تفارفوا قبل ساعتين ابوه طار من عيونه النوم وقلق ع ابنه وحاول يتصله تلفونه مغلق وزاد قلقه اكثر وفي ذاك الوقت
دخل لؤي للبيت لؤي: مساء الخير اليوم انت تنتظرني بدل امي
ابو لؤي :قصدك صباح الخير وين كنت للان؟
لؤي ارتبك وقاله: كنت مع الشباب في البقاله
ابولؤي:الشباب قالوا انكم تفارقتوا قبل ساعتين بين اقول وين كنت؟ لؤي انكر وقال: لا تصدقهم هم كذبوا عليك عشان لاتزعل وتعصب فوقي ابولؤي:انتبه هذا الشي يتكرر ولا بايوقع لك خبرثاني ولا تكون تغلق تلفونك
لؤي:حاضر يا ابي ولا عليك ….. تصبح ع خير لازم اقوم الصبح اسير ابسر البضاعة
ابولؤي:طيب سير نام وبكر الصبح انا بحاجتك في البقاله معي مشوار بكره وانت اجل موضوع البضاعه لبعد بكره
لؤي: حاضر راح لؤي ينام وكان يفكر في الحل الي يقدر فيه يحمي كوليا ويخفف خوفها
في الصباح قام لؤي اكل وخرج يفتح البقالة وابوه راح للمشوار ولكن لؤي ماقدر يجلس في البقالة وقرر يروح يطمن ع كوليا غلق البقالة وراح عند كوليا وشافها مجهزه له الصبوح وكل شي جلس ياكل معها ويتكلموا ونسي الوقت ابوا لؤي وصل للبقالة وشافها مغلقة تعصب وهثيم راح يطمن ع لؤي ويسأله وين كان امس
هيثم:السلام عليكم ياعم كيف حالك
ابو لؤي:الحمدلله
هيثم:وين لؤي اليوم ؟
ابولؤي:والله مالي علم انا قلتله يجلس في البقالة لانه معي مشوارلقيتها مغلقه ….. وليش امس تكذبوا عليا واقلقتوني وتقولوا انكم ماتعرفوا وين لؤي وهو قالي انه كان معاكم …. كله هذا خوف عليه عشان لا اصيح فوقه
هيثم ارتبك ومش عارف ايش يرد وتعجب من كلام ابو لؤي واستغرب ليش لؤي كذب ع ابوه بس قرر يماشي العم لغاية ما يسأل لؤي وين كان امس وقاله:ايوا ياعم سامحنا

✭ــــــــــــــــــــــابو لؤي:عادي يا ابني اهم شي الان تتصل لعند علي او خالد واسألهم وين لؤي تلفونه مغلق رغم اني امس نبهته ما يغلق التلفون

✭ــــــــــــــــــــــهيثم:هذا لؤي قد جى
لؤي:السلام عليكم
ردوا السلام عليه
ابولؤي:وين كنت ؟مش قلتلك تجلس في البقالة؟
لؤي:انا اسف سرت الجامعه اختبر هيثم انصدم لانه عارف ان لؤي ما يشتي يسجل هذي السنه
ابولؤي:خير وكيف كان الاختبار؟
لؤي:تمام الحمدلله

✭ــــــــــــــــــــــابولؤي:خلاص انت اجلس انا باسير ارتاح وادي لك الغداء واجي
لؤي:حاضر … سيرالله معك

✭ــــــــــــــــــــــراح ابولؤي وهيثم استلم لؤي بالأسئلة

✭ــــــــــــــــــــــهيثم :وين كنت امس ؟ وليش كذبت ع ابوك ؟ومن متى تشتي تسجل في الجامعة؟
لؤي:انا في قسم ؟مالك بتحقق معي انا كنت امس في النت ونسيت الوقت وخفت ابي يصيح لذالك كذبت والجامعه قررت اسجل وغيرت رأي ايش فيها ؟ هيثم:سبحان الله خليتنا نروح لانك تعبان وفيك نوم وبعدها سرت للنت لؤي:ايوا لاتعصبني طار النوم ولا تحقق معي انا مش طفل

✭ــــــــــــــــــــــهيثم سكت وقال بينه وبين نفسه: انا عارف انك بتكذب وانك مخبي عليا شي خطير بس انا بعرف اكتشف ايش هذا الموضوع الي بتخبيه عليا وراك وراك والزمن طويل يا لؤي
عدا الوقت وجى وقت الليل والشباب في البقالة
هيثم :يلا يا شباب نروح العم عبدالرزاق بدء يتضايق من تأخير لؤي قاموا الشباب ولؤي ما قال ولا كلمة وفرح لانهم بايروحوا عشان يروح عندكوليا في الشارع هيثم:ياشباب ما تلاحظوا ان لؤي متغير
علي:ايوا لحظت هذا الشي هيثم:وبدء يكذب ع ابوه
خالد:بأيش كذب؟
حكى لهم هيثم كل شي وقرروا يراقبوا لؤي من بكره وين بيروح اما لؤي راح عند كوليا وقالها عن الحل الي يقدر فيه يشوف كوليا كل يوم وقرر يتزوجها من دون علم اهله لانهم بايرفضوا يتزوج في هذا الوقت
كوليا : انا مقدره انك مهتم فيني وتشفق عليا بس مش لدرجة انك تتزوجني
لؤي:انا ما شفق عليش ولا شي انا باكون اسعد انسان اذا وافقتي تتزوجيني يشهد الله انش سرقتي قلبي من اول لحظه شفتش فيها..

✭ــــــــــــــــــــــحاول لؤي يقنع كوليا ع الزواج وانه يحبها بس ما اقتنعت بسهوله بعد ساعه من النقاش اقتنعت كوليا وقالت له لازم يفاتح اهله في موضوع الزواج عشان ما تشتي تتزوج بالسر
لؤي:انا باكلم امي اليوم بس لو رفضت او وافقت انا جاي بكره الصبح مع الشيخ معش بطاقة صح كوليا:ايوا معي بطاقة
لؤي:ان شاء الله مايقولي لازم ولي أمر
كوليا:انت اشرح له كل شي لؤي:أكيد ان شاء الله ….. يلا انا لازم اروح الان عشان اقوم الصبح ادور ع شيخ من خارج الحاره عشان ابي ما يعرف
كوليا: طيب لا تتاخر .. اليوم بانام مبسوطه وما بخاف
لؤي:تصبحي ع خير يا احلى زوجة في العالم
خرج لؤي من عند كوليا وكان مبسوط وتمنى انه يوصل للبيت ويلقى امه صاحيه عشان يفاتحها بموضوع الزواج وصل البيت ومالقى حد في الصاله ينتظره
قال بينه وبين نفسه:احسن انها نايمه انا متأكد لو افاتحها في الموضوع با ترفض بحجه اني عادني صغير وما كملت الدراسه واساسآ ما بتخليني اتزوج وحده من اختياري لأنها خايفه احبها اكثر منها لكن اذا تزوجت وبعدها اكلمها باترضى بالأمر الواقع والله بتزوج كوليا بكره لوحصل ايش ما حصل بس من وين بدي شيخ ؟؟؟

✭ــــــــــــــــــــــكان لؤي طول الليل يفكر ويخطط ايش با يفعل بكره وكيف با يتعذر عشان ما يفتح البقاله الصباح وقرر يتصل لأبوه الصباح ويقوله انه في الجامعه وما با يقدر يداوم الا في العصر في الصباح خرج لؤي بدري قبل ما امه وابوه يصحوا وراح يدور ع شيخ وحكى له كل الي حصل وان كوليا مقطوعة من شجرة والشيخ وافق انه يعقد لهم وقبل ما يروح عند كوليا اتصل لأبوه وقاله انه في الجامعه وراح لؤي لعند كوليا وكانت الفرحه باينه عليه كان هيثم يشوف لؤي بس لؤي ما شاف هيثم
هيثم:ماله هذا من اول اسلم عليه وما يشوف …. ومن هذا الي معه ؟ وصل لؤي للبيت وقال لكوليا تتجهز لانه با يسألها الشيخ لو هي موافقه ووافقت كوليا وتم الزواج وكانوا الأثنين مبسوطين
لؤي:مبروك
كوليا:انا للأن مش مصدقة ؟انت مجنون
لؤي:انا مجنون من اول يوم شفتش يا حبيبت قلبي

✭ـــــــــــــــــــــكوليا: احرجتني ….. انا حزينة كنت اتمنى امي تكون معي وتزفني وامك ترحب فيني والبس الفستان الأبيض مثل كل بنت بس كل شي حصل بسرعه وانا راضيه
لؤي:خلاص يا حياتي لا تبكي انا اوعدش اني با عوضش ع كل شي واهلي با كلمهم مصيرهم يعرفوا وامش ادعي لها اكيد هي الان مرتاحه في قبرها لانش معي وانا اوعدش اني احافظ عليش وما ازعلش طول عمري

✭ـــــــــــــــــــــكوليا:انا عارفه انك با تحافظ عليا من غير ما تقول انت الان كل شي بنسبه لي الأم والأب والأخ والأخت والزوج والحبيب والصديق ما عندي في هذي الدنيا غيرك
لؤي:الله الله الله كل هذا الكلام لي؟ ….. وين هذا الكلام مخبى انا ما اعرف عنش الا الحزن

كوليا:طبعآ كل الكلام هذا لك انت لولاك انا كنت ميته

✭ـــــــــــــــــــــلؤي:بعيد الشر عنش يا روحي انا عشان هذا الكلام تستحقي اخرجش للمطعم وناكل احلى اكل
كوليا: ياسلام يلا انا جوعاااااانه لؤي:البسي بسرعه انا بروح اوقف التكسي عشان محد يشوفنامع بعض

✭ـــــــــــــــــــــكوليا :حاضر الان بالبس
خرجوا ياكلوا ويتمشوا وانبسطوا وراحوا المقبره عشان كوليا تزور امها وروحوا البيت
في المغرب
ابو لؤي:وين انت يا ابني اقلقتني عليك انا قلتلك لا تغليق تلفونك
لؤي:انا اسف يا ابي انا كنت في الجامعة وبعدها خرجت انا والشباب نتمشى ونسيت افتح التلفون
ابو لؤي:انت اصبحت مهمل للبقاله وما تركز في عملك هذي الأيام مالك في شي بأيش مشغول بالك
ارتبك لؤي من كلام ابوه وما عرف ايش يرد
ابو لؤي:قول يا ابني مالك في شي ؟
لؤي:يا ابي انا بين اهم الجامعه انا لازم ادرس ضاع من عمري الكثير وانا اشتي اخلص الدراسه عشان اشتغل واتزوج

✭ـــــــــــــــــــــابولؤي:والله يا ابني وانا كمان اشتيك تدرس وتتزوج الله يوصلني ليوم عرسك والله لعملك عرس يحكوا عنه الناس سنه كامله بأذن الله لؤي قال بينه وبين نفسه:الله وصلك ليوم عرسي يا ابي ههههههههههه
ابو لؤي:مالك بتضحك؟
لؤي:من الفرحه اشتي اكمل الدراسه واتزوج عشان العرس الي قلت عنه ابولؤي:هههههههههههه…… ولا عليك الله يطول بعمري وانا اعملك كل الي في نفسك يا وحيدي
لؤي:الله يحفظك يا اعظم اب في الدنيا
ابولؤي:يلا انا اليوم تعبت با روح وانت كمل وروح بدري
لؤي:انا بتأخر اليوم يا ابي بعد أذنك معي عرس

✭ـــــــــــــــــــــابو لؤي:طالما انك كلمتني بسمح لك تتأخر 2 وانت بالبيت

✭ـــــــــــــــــــــلؤي باس رأس ابوه وقاله: شكرآ 2 وانا بالبيت بأذن الله
روح ابو لؤي للبيت ولؤي كان في البقاله طفشان وخايف يتأخر في البقاله والشباب يجوا جلس للساعه 10 ومحد جى من الشباب كانوا مشغولين غلق لؤي البقاله وراح عند كوليا اول ما خرج

✭ـــــــــــــــــــــهيثم وصل للبقاله لانه كان يشتي يشوف لؤي ويسأله ليش مختفي؟ وليش ما سلم عليه ؟ومن الرجال الي كان معه ؟بس لقى البقاله مغلقه اتصل عند لؤي تلفونه مغلق قرر يتصل لعند ابولؤي يسأله لأنه قلق عليهم مش من عوايدهم يغلقوا البقاله بدري
هيثم:الو ……. كيف حالك ياعم ؟ ابولؤي:الحمدلله يا ابني وانت كيف انت ؟
هيثم:الحمدالله ….. وين لؤي يا عم ؟
ابولؤي:لؤي في البقاله…… ليش انت وينك ؟ماسرتوا للان العرس قالي انه معكم عرس اليوم

✭ـــــــــــــــــــــهيثم ارتبك وقال:الا معنا عرس انا اتصلت اتاكد لو لؤي في البقاله او في البيت
ابولؤي:يا ابني انتبهوا تتاخروا الله يرضي عليكم انصح صاحبك كل يوم بيروح لي قرب الفجر
هيثم:حاضر ياعم ولا عليك من عيوني با انصحه

✭ـــــــــــــــــــــابولؤي:الله يحفظك يا ابني انت صاحبه واخوه الله يديم عليكم المحبه
هيثم:آمين ياااااارب يلا يا عم خاطرك واسف ع الأزعاج
ابولؤي:الله معك يا ابني
انهى هيثم المكالمة وكان مصدوم وخايف ومحتار مش عارف وين لؤي بيروح حس ان صاحبه متغير قوي وتأكد من كل الشكوك

✭ـــــــــــــــــــــوقال:والله انك بتعمل شي غلط طالما انك بتكذب ع ابوك وعليا اكيد في سبب خطير والله يا لؤي اني با راقبك بكره واعرف وين بتسير ومن بتساير انت اخي وصاحبي وانا لازم احميك وبعد عنك كل غلط الله يبعد عنك رفقاء السوء كان يظن هيثم ان لؤي تعرف ع شلة شباب فاسدين اتصل لخالد وعلي واتفقوا ان بكره لازم يراقبوا لؤي ويعرفوا وين بيسير؟؟ …

⬅ .. يتبع الــجـــــزءالسادس والأخير ..➡

 

 

‏‏‏‏‏‏‏‏‏‏ 📝📚 قصــــــــص وروايــــات 📚

**🧖🏻‍♀♥ ڪوليـــا♥🧖🏻‍♀**
➰ **الجزء السادس والأخير**➰

✭ــــــــــــــــــــــفي اليوم الثاني
الشباب تعمدوا ما يروحوا عند لؤي ولا يتصلوا وطبعآ لؤي ما أهتم لغيابهم وكان فرحان
الشباب كانوا جالسين جنب البقالة في مكان ما يقدريشوفهم لؤي فيه عشان اول ما يخرج يلحقوه ويعرفوا وين بايروح الساعه 11

✭ــــــــــــــــــــهيثم:والله ان لؤي مش طبيعي ولا اتصل يسأل علينا قبل اسبوع لو تأخرنا أشويه يجلس يتصل ويقولنا تعالوا ومن هذا الخبر وامس واليوم ما شفناه ولا اتصل
علي:والله انك صادق انامتأكد ان فيه شي
خالد:اسكتوا اسكتوا ….. لؤي خرج هيثم:طيب استعدوا
خالد:هههههههه بانسير نقاتل او كيف؟
علي:الله يستر
هيثم :مش وقت خفة الدم نحنا لازم نعرف ايش الشي الي مخبيه علينا لؤي وليش متغير غلق لؤي البقالة ومشي لبيت كوليا والشباب بيلحقوه من غير ما يحس فيهم
هيثم:وين باسير هذا ؟
خالد:وطي صوتك بايسمعنا

✭ــــــــــــــــــــعلي:ايوه صح امشوا دلا
هيثم:ماله قد با يصول للحارة المسكونه

✭ــــــــــــــــــــخالد:اعوذبالله من الشيطان
علي:انا ما بقدر الحقه انا باروح هيثم:ياشباب لا تروحوا خلوكم معي هذا صاحبنا ولازم نساعده لو هو في مشكلة وانا الأن تأكدت انه في مصيبه
خالد:وانا كمان بس ليش جى هذا المكان
علي:اكيد جى يستكشف المكان بعد ما قاله هيثم عن القصص الي بتحصل في هذي الحاره
هيثم:خلونا نشوف لوين بايروح بالضبط
خالد:الله يستر والله اني خايف عليه وعلينا
هيثم:فضول لؤي هذا خطر عليه هو جى هناعشان يتأكد من كلامي لأنه مش مصدق كلامي في
بيت لؤي
ام لؤي: اتصل لأبني انا قلقانه عليه ابو لؤي:ابنش في البقاله مع اصحابه ام لؤي:يارجال حرام عليك ابني با يضيع هكذا لا اكل ولا نوم ولا راحه

✭ــــــــــــــــــــابو لؤي :ايش افعل ؟ قد كلمت امس هيثم بطريقة غير مباشرة ع التأخر باتشوف لو في تغير اليوم اذا ما جى الساعه 1 بتصله واصيح فوقه يروح
ام لؤي:حاضر بس قلبي قابضني اليوم
ابو لؤي:انتي من يوم ما خلفتيه وقلبش قابضش عليه
نرجع للشباب

✭ــــــــــــــــــــوقفوا الشباب في زغط صغير بعيد عن لؤي بمسافه بسيطه وشافوا لؤي يدخل الببيت

هيثم:اعوذبالله من الشيطان الرجيم
خالد:مالك ايش شفت لا تفجعني
علي:ابعد اشويه خليني اشوف وين لؤي……… وين دخل بيت من هذا؟
خالد:هيثم رد علينا مالك ساكت
هيثم:تذكروا البيت الي قلتلكم انه كل مره يلقوا فيه حد ميت وجنبه دمه سوداء
علي:ايوا لا تذكرني اعوذ بالله من الشيطان الرجيم
هيثم:هو هذا نفس البيت الي دخل فيه لؤي الأن
الكل:اعوذبالله من الشيطان الرجيم
خالد:ايش با نفعل الان ؟ليش لؤي دخل هذا البيت هو مجنون
علي:انا خايف يحصله شي
هيثم :وانا كمان عشان كذا لازم نخرجه من هذا البيت الأن قبل ما يحصله شي
خالد:كيف تقول هذا الكلام انت عارف اني مستحيل اقرب من هذا البيت
علي:وانا للان مستغرب ع نفسي لاني قدرت ادخل هذي الحاره …. وكيف عرفت ان هو هذا البيت ومن الظلام ما تقدرتشوف يدك
هيثم:انا متأكد انه هذا البيت هو البيت المسكون الي يموتوا فيه الناس والي جنبه كمان مسكون انا مستحيل اخلي لؤي يجلس في ذاك البيت دقيقة انا باسير اخرجه ابوه امني عليه
خالد:انا مستحيل اخليك تقرب لذاك المكان
علي:لازم نتشجع يا خالد مابش وقت تعالوا نسير نخرج لؤي من هذا البيت قبل ما يحصله شي
خالد:يلا بسم الله نتوكل ع الله والله با يحمينا من كل شر
هيثم:اقرائوا الأذكار وهاتوا يدكم عشان نكون اقوى وما نخاف
خالد:لحظه ليش ما نتصل له ونقوله يخرج

✭ــــــــــــــــــــهيثم :فكره لحظه با تصل .. مغلق يلا بسم لله لا تضيعوا الوقت ع الفاضي هاتوا يدكم خلونا نتوكل ونسير
مسكوا الشباب يد بعض وقبل ما يخطوا خطوتهم الاولى سمعوا أصوات مخيفه حسوا بخوف ولكن ما استسلموا ومشوا اشويه ولقوا ثعبان كبير جنب باب البيت وكان شكله مخيف ما قدروا يتحركوا من الخوف وكانوا يقولوا بسم الله واعوذبالله من الشيطان الرجيم بصوت عالي وخائف ومالقوا نفسهم غير بيهرولوا لحارتهم
هيثم:يووووووووو كيف با نفعل ؟

✭ــــــــــــــــــــعلي:نحنا عملنا الي علينا وماباقي غير الدعاء
خالد:والله مش قادر اتنفس انتوا شفتوا الي شفته ونحنا بنجري ؟
علي:الحنش الكبيرررررررر قصدك
خالد:يعني ما شفتوه
هيثم: ايش قد شفت ؟
خالد:رجال ضخم ما يبان راسه من طوله
الكل:اعوذبالله من الشيطان الرجيم
علي:تعالوا نسير لبيت ابو لؤي نكلمه هيثم:مالك والله محد بايصدقنا وليش اصلآ نسير نقلق الرجال
خالد:والحل ؟
هيثم:نجلس جنب بيتهم واول ما يجي لؤي نسأله ليش سار البيت المسكون

✭ــــــــــــــــــــعلي:ايش ضمنك انه ع يروح بعد الي شفناه
هيثم:ننتظر ساعه واذا ما روح نكلم ابوه ونسير لعنده
خالد:انا صراحه بنتظر معاكم لكن ولا باسير مكان اعوذبالله ما بقدر انام سنه بعد الي شفته اليوم
علي:تعالوا نجلس مش قادر اوقف وشغل قرآن بتلفونك
هيثم:اكيد با شغل ولا تقلقوا حارتنا أمان انتظروا الشباب لؤي وكانت الدقائق تساوي ساعات من الخوف والقلق عليه وابو لؤي وام لؤي كمان كانوا قلقانين ع ابنهم حسوا انه فيه شي بس في نفس الوقت ما قالوا لبعض عشان ما يزيد القلق
بعد ساعه
هيثم:والله اني قلقااااااان ع هيثم قوي ياريت ما انتظرنا ساعة وتصرفنا
علي : والحل يا شباب نسير نكلم ابوه ونبري ذمتنا
خالد:نسير ندي شيخ الجامع ونرجع للحاره المسكونه ونخرج لؤي ونروح
هيثم:اسكتوا دقيقه ……كاني اسمع صوت دعسات في حد جاي
علي:شغل القرآن ولا تطفيه
خالد:لؤي!!!.هذا لؤي ياشباب الحمدالله
هيثم:يا لؤي ….يالؤي
علي:الحمدلله انك بخير

✭ــــــــــــــــــــانصدم لؤي لما شاف الشباب جنب بيتهم
لؤي:خير ليش انتوا هنا في هذا الوقت
هيثم:وين كنت ؟
لؤي:كنت في الأنترنت ليش تسألني
هيثم:بطل الكذب انت ما كنت في الأنترنت
علي:نحناعرفنا كل شي وعرفنا وين بتسير
لؤي:اسير وين ما أسير مالكم دخل انا حر في حياتي
لؤي كان يظن أن الشباب عرفوا انه متزوج

✭ــــــــــــــــــــخالد:لا انت مش حر في حياتك نحنا ما نقدر نسكت وانت تعرض نفسك للخطر
لؤي:ليش الي يتزوج يعرض نفسه للخطر انا تزوجت البنت ع سنة الله ورسوله صح اني تزوجت من رواء امي وابي بس اهم شي في الحلال الشباب:تزوووووووجت !!!!!!!؟
لؤي: ايوا تزوجت ….. طيب انتوا ايش الي عرفتوه ؟
هيثم:نحنا لحقناك وشفناك عرفنا انك بتسر للبيت المسكون لؤي:هههههههههههههههههههههههههههه ضحكتني البيت الي شفتني لدخله بيت زوجتي كوليا
الكل:اعوذ بالله من الشيطان الرجيم
لؤي :مالكم ههههههه

✭ــــــــــــــــــــهيثم:لؤي انت من جدك البيت الي دخلت فيه هو نفس البيت الي كنت اقولك عنه ان سكانه يموتوا وجنبهم الدمه
لؤي:ههههههههههه اكيد انت غلطان وتشتيني ابعد عن كوليا عشان كذا تقول ان البيت مسكون

✭ــــــــــــــــــــهيثم:اقسم بالله ما اكذب عليك … ومن هذي كوليا وكيف عرفتها ؟
لؤي:هذي البنت ساعدتها لأن أمها ماتت وبعدها حبيتها وتزوجتها
علي :كل هذا الحب حصل في اقل من اسبوع

✭ــــــــــــــــــــلؤي:الحب يحصل من ثانية واحدة هيثم:يا لؤي انت والله انك دخلت البيت المسكون
لؤي:كيف البيت مسكون وكوليا بخير ولا حصل فيها شي من يوم ما امها ماتت وهي بتنام لوحدها ولا يوم قالت لي ع هذا الموضوع
خالد:اعوذبالله من الشيطان الرجيم انا سمعت ان ذاك البيت محد سكن فيه من قبل 10 سنوات
هيثم:يعني احتمال البنت الي شفتها اعوذبالله من الشيطان الرجيم ….. جنية
لؤي:ههههههههههههههههههههه مالك والله ما جني الا انت كوليا ملاك ع هيئة بشر
علي:مش وقت الضحك الان بيقولولك ان البيت ماسكنوا فيه من قبل 10 سنوات
لؤي:خلاص الان با نحل الموضوع تعالوا معي لعند كوليا وشوفها لو هي جنية
هيثم :يلا تعال نسير الان
علي:اول شي نسير ندي شيخ ونسير معه للبيت المسكون لؤي:هههههههه طيب سير ادي وانا بتصل لأبي واقوله اني بتأخر أخذوا الشباب الشيخ وتحركوا للبيت المسكون واول ما وصلوا للحاره حسوا بقشعريره وقفت شعر أجسامهم
الشيخ:اذكروا الله لا تخافوا يشباب اللهم انا نستودعك أنفسنا بسم الله الرحمن الرحيم وصلوا لباب البيت

✭ــــــــــــــــــــلؤي قال:اتفضلوا يا جبناء مالكم خايفين فتح الباب واول ما شاف البيت انصدم التفت يمين ويسار وشاف الغبار كله ملان البيت ومافيش فيه عفش وشبك العنكبوت في كل مكان ولكن ما استسلم ونادى كوليا
لؤي:يا كوليا تعالي وين انتي ؟كل مره تفعل معي هذي الحركات اكيد متخبايه في الحمام ….. بس وين سار العفش كان قبل اشويه كل شي نظيف ومرتب والعفش موجود هيثم:صلي ع النبي يا لؤي واستعيذبالله من الشيطان الرجيم
لؤي:مالك انا اتكلم جد كان كل شي تمام قبل ما اروح للبيت …. ياكوليا يا كوليا تعالي وين انتي بيقولوا عليش جنيه
الكل:اعوذبالله من الشيطان الرجيم
لؤي:اكيد راحت للمقبره عند امها
الشيخ:يا ابني كل شي واضح يا ريت تستوعب الكلام الي بنقولك عليه من اول انت لقيت جنية وتزوجتها
لؤي:هههههههههه طيب تعالوا معي للمقبره عشان تصدقوني كوليا انسانه وهذا بيتهم
علي:يارب احمي لؤي وابعد عنه كل اذى
هيثم:تعال يا لؤي خلينا نروح
لؤي: ابعد يدك انا ما بروح الا بعد ما تشوفوا كوليا وتصدقوني
خالد:كيف نصدقك والبيت اكبر دليل واضح انه مهجور محد دخل فيه من سنين
الشيخ :هيا ياشباب خلونا نروح المكان مش مريح
لؤي:انا ما بروح الا بعد ما اشوف كوليا واسألها اذا الي بتقولوا عليه صدق او لا
هيثم:تعوذمن الشيطان يا لؤي خلينا نروح ونجي الصبح نشوفها
لؤي:ابعد يدك يا هيثم انا قلتلك ما ادي خطوه الا بعد ما اكلمها اكيد هي با تروح الان مسكوا الشباب لؤي وخرجوه بالغصب وكان يصيح وجاله انهيار عصبي واغمى عليه ومافتح عينه الاوهو في الجامع كان الشيخ يقراء عليه القرآن طول الوقت لغاية ما هدء واتصل هيثم يستأذن من ابو لؤي ان لؤي ينام عنده عشان لا يقلق عليه أكثر لو شاف حالته وابو لؤي وافق بس حس انه في شي
في الصباح
ابو لؤي راح يفتح البقالة وشاف العم ناجي وسلم عليه
ابو لؤي:عاش من شافك يا رجال العم ناجي:الله يحفظك تسلم لك وحشه
ابو لؤي:ليش ولا بتتصل ولاشي
العم ناجي :تلفوني ضايع … اسمع انا جيت ابسرك واقولك شي واسير مابش معي وقت
ابولؤي:تفضل قول … محتاج شي ولا شي ؟
العم ناجي:لالاتسلم …. انا جيت اكلمك ع ابنك لؤي
ابو لؤي:لؤي!!!!خير ايش قد فعل؟
العم ناجي:ابنك لؤي مش طبيعي اجى لعندي قبل اسبوع في الليل قرب الفجر وطلب مني احفر قبر ودفع لي الزلط وخلاني ادفن القبر ومابش داخله احد انا قلت انه شارب شي ولا شي وما اهتميت واليوم الثاني جى بالظهروقف جنب القبر ورجع خرج واليوم الي بعده جى باليل وقالي انه جى يقراء الفاتحة لجده ووقف نفس مكان القبر الفاضي وكان يكلم نفسه وخرج وانا شكيت انه في شي لحقت بعده وشفته يدخل للحاره المسكونه ونفس البيت الي كانت تحصل فيه الجرائم وقلت هذا الشي ما بقدر اسكت عنه وجيت اكلمك تشوفلك حل لأبنك
ابو لؤي:اعوذبالله من الشيطان الرجيم الشيخ:السلام عليكم ابو لؤي والعم ناجي:وعليكم السلام الشيخ:كيف حالك يا أبو لؤي

✭ــــــــــــــــــــابو لؤي:كنت بخير والحمدلله ….سمعت خبر الأن يشيب شعر الراس واشتي منك تساعدني
الشيخ:خير ان شاء الله ؟….. ايش قد سمعت ؟
ابولؤي:ابني يا شيخ بيسير المقابر والحاره المسكونه ناجي شافه وجى يقولي
الشيخ:حتى انا جيت اقولك عن هذا الخبر …. بس مش عارف من اين ابدء
ابولؤي:يالله ايش قد حصل قولي يا شيخ

✭ــــــــــــــــــــالشيخ: ابنك بيسير للبيت المسكون والظاهر ابنك تزوج بجنية
ابو لؤي :اعوذ بالله من الشيطان الرجيم …… يارب احمي لي ولدي ؟وين ابني الان ؟

✭ــــــــــــــــــــالشيخ:مالك يارجال صلي ع النبي لا تبكي ابنك بخير هو عند هيثم لولا الله ثم اصحابه لكان ابنك في خطر اكبر بس اصحابه شكوا ان فيه شي ولحقوه وشافوه يدخل للبيت المسكون وساعدوه وكلمنه بان البيت مسكون والبنت الي يعرفها جنية وطبعآ ما صدقنا واخذنا للبيت وشاف بعينه كل شي وهو الان عند هيثم لا تقلق انا با عالجه بأذن الله
ابو لؤي:الله يحفظك يا شيخ عالج ابني ما عندي الا هو والله لو يحصله شي انا باموت وامه كمان مالنا غيره

العم ناجي: صلي ع النبي يا عبدالرزاق انت لازم تقوي ابنك ولا تضعف ابدآ قباله
الكل:عليه الصلاة والسلام
في بيت هيثم
لؤي:الله يخليك يا هيثم خليني اسير لبيت كوليا اتأكد

✭ــــــــــــــــــــهيثم:يا لؤي كوليا مالها وجود افهم
لؤي:انا احبها وما باصدق حد غيرها…. خليني اسير هذي المره وانهي كل شي لازم اقتنع
هيثم :طيب اصبر اتصل للشيخ واساله …. وين التلفون
راح هيثم يدور التلفون واستغل لؤي الفرصه وهرب من البيت واخذ تكسي عشان يوصل بسرعه وهيثم ما يلحقه وصل لؤي للبيت المسكون ودخل من دون ما يخاف لانه مش مصدق كلامهم
لؤي:كوليااا ….. تعالي ياكوليا .. كلهم بيقولولي انش جنية تعالي نثبت لهم انهم كذابين

✭ــــــــــــــــــــظهرت له كوليا وقالت: صح كلامهم انا جنية
لؤي:وين كنتي وانا بين ادورش من امس
كوليا :انا جنية افهم
لؤي:لا تكذبي ….. كيف جنية وانا اشوفش

✭ــــــــــــــــــــكوليا:للان انت مش مصدق هذي القصص؟انا ظهرت لك لانك ما صدقت اصحابك لما كانوا يحكولك عنا تذكر الدمه السوداء الي ظهرت لك في ذاك اليوم هي انا انا عملت كل هذي القصه وجبتك للبيت لأني كنت ناويه افعل فيك نفس الي كنت افعل في الناس الي كانوا ينكروا وجودنا وما يصدقوه كنت اخليهم ينتحروا بس للأسف انا حبيتك وما قدرت أقتلك او أخليك تنتحر لاني حسيتك مختلف عنهم لذاك وافقت اني اتزوجك وعشيرتي طردوني بسبب هذا القرار وتخلوا عني
لؤي: وانا كمان حبيتش ومش هامني انش جنيه او انسيه انتي احلى بنت في العالم شفتها وراضي فيش وما بتخلى عنش

✭ــــــــــــــــــــكوليا :بس هذا مش شكلي الحقيقي انا متلبسه في هيئة انسان ولازم تشوف شكل الحقيقي عشان يستمر زواجنا

✭ــــــــــــــــــــلؤي:انا موافق وراضي في شكلش
كوليا:لا تتسرع شوف شكلي اولآ
لؤي:انا مستعد
ظهرت كوليا بشكلها الحقيقي للؤي واول شي فيها تغير رجالها الي كان نفس رجل الغنم ورفع رأس لؤي عشان يشوف شكلها واول ما شافها قال:لااااااااااااااااااااااااااا اعوذبالله من الشيطان الرجيم
ام لؤي:بسم الله ع ولدي ……لؤي …. لؤي …..قوم ياروحي انتم بتحلم
لؤي:الحمدالله انو حلم الحمدددددددددللله ….. اشكرش يا امه انش قيمتيني كان قلبي بايوقف الحمدلله انه حلم

✭ــــــــــــــــــــام لؤي:مالك ….. ليش بترتجف هكذا …. ايش قد حلمت ؟
لؤي:حلمت اني اتزوج جنية اعوذبالله من الشيطان الرجيم

✭ــــــــــــــــــــام لؤي:بسم الله عليك اعوذبالله من الشيطان الرجيم ….. خلاص بعد هذا الحلم انا قررت اني ازوجك بنت جيرانا
لؤي: انا مشتيش اتزوج بعد الحلم هذا بس قولي لي اي وحده فيهم يمكن اغير رأي ههههه
ام لؤي:الكبيره جوليا

✭ــــــــــــــــــــلؤي:اعوذبالله من الشيطان الرجيم لا اشتي كوليا ولا جوليا اشتي بنت اسمها رزيقه تقيه زمبقه اي اسم غير الي نهايته ي والف

✭ــــــــــــــــــــام لؤي:خيرت الله قوم الان اتوضى وصلي قدوا ظهر وسير ادي غداء لأبوك قام لؤي صلى واتصل بعدها لهيثم يساببه
لؤي :ولا تزيد تحكي لنا عن اي قصه مرعبة بسببك امس حلمت حلم الله لا يرده
هيثم:ايش حلمت شكلك انظميت لخالد وعلي هههههه
لؤي:ايو انا معهم بعد اليوم باقوى قوتي
هيثم:هههههه احكي لي الحلم شكله قوي ههههه حكى لؤي لهيثم كل الحلم وحكى له عن كوليا ههههههه
هيثم:هذا ما قدوش حلم هذا فلم هندي ههههههههههه
لؤي:اضحك اضحك انت ما حسيت بالي حسيته بس عجبني موقفكم في الحلم دخلتوا ساعدوني للبيت المسكون ونعم الأصحاب
هيثم:لو كان حقيقه والله ما اخطي خطوه وخلي كوليا تشبع فيك
لؤي:اعوذبالله من الشيطان لا تذكرني فيها .
صحيح ان الجن مذكورين في القرآن الكريم وانهم مخلوقات مثلنا بس مش كل الأساطير عنهم حقيقية نسمع كثير عن قصص خرافية واحد شاف جني وانشل وواحد شاف جنيه ومات وواحد صور جنية وجنن ومن هذا القصص ملاااان الله عز وجل عمل بيننا وبين الجن حجاب عازل ما نقدر نشوفهم ع هيئتهم الحقيقية ممكن نشوفهم وهم متلبسين في هيئة كائن اخر لذالك لا تصدقوا اي حد يقولكم انه شاف هذي المخلوقات مثل الي رجله حمار ومدري ايش ومعه قرن الله وحده عارف أشكالهم كيف هي انا ما احب افتي كثير في هذا الموضوع لكن هذا من وجهة نظري والله واعلم اذا كانت حقيقة او لا واحب اسمع معلوماتكم في هذا الموضوع

✭ــــــــــــــــــــهذي كانت رسالتي في هذي القصة انتهت القصة بعد ما صحى لؤي من الكابوس الي شافة واتمنى انكم استمتعتم بالدخولكم في حلم لؤي

🚫 يسعدنا مشاركة الرواية مع من تحب لكن لا نحلل حذف التوقيع لأي سبب كان ..

⬅ .. انــــتــــهـــــت ..➡